تۇركىستان وبلىسى سايرام اۋدانىندا «شەرزاد-1» شارۋا قوجالىعى جۇمىس ىستەپ كەلەدى. 2000 جىلى نەگىزى قالانعان قوجالىق ءىرى قارا مالىن وسىرۋمەن اينالىسادى. تۇركىستان وبلىسى اكىمىنىڭ باسپا ءسوز قىزمەتى ۇيىمداستىرعان پرەسس-تۋر بارىسىندا جۋرناليستەر اتالعان شارۋاشىلىق نىسانىندا بولىپ، اتقارىلىپ جاتقان جۇمىستارمەن تانىستى.

بۇگىندە قوجالىقتىڭ مەنشىگىندەگى مال باسى سانى 120-دان اسىپ جىعىلادى. مەكەمە باسشىسى شارۋاشىلىق اۋقىمىن تاعى دا كەڭەيتە ءتۇسۋدى جوسپارلاپ وتىرعانىن ايتادى.

«مەن بۇل شارۋانى ەكى سيىرمەن باستاعانمىن. الدىمەن ءوسىرىپ، سەمىرتىپ بىرەۋدى ەكەۋ ەتۋ ءۇشىن جاس تاناشىقتارعا اۋىستىردىم. مالدىڭ باسى قۇرالا تۇسكەننەن كەيىن مەملەكەتتىك باعدارلامامەن كاسىپكەرلەردى قولداۋ باعىتى بويىنشا كومەك الدىم. بۇل دا شارۋامنىڭ ىلگەرىلەۋىنە ۇلكەن سەپتىگىن تيگىزدى. مال باسى سانىن ارتتىرا تۇسكىم كەلەدى. ءبىراق، تەحنيكا جەتكىلىكسىز، ەندى مەملەكەتتىك قولداۋدىڭ ارقاسىندا وسى قاجەتتىلىككە قول جەتكىزىپ الۋدى كوزدەپ وتىرمىن»، – دەدى شۋحراد ابدۋكاريموۆ.

قازىرگى تاڭدا قوجالىق ءسۇت ءوندىرۋدى دە قولعا العان. كۇنىنە 2 توننا ءسۇت ءوندىرىپ، «فۋدماستەرگە» وتكىزىپ كەلەدى. مۇندا 80 مەن 150 مىڭ تەڭگە ارالىعىنداعى جالاقىمەن 7 ادام تۇراقتى جۇمىسپەن قامتىلعان.

بۇگىندە بۇل كاسىپكەردىڭ اتقارىپ وتىرعان جۇمىسى كوپشىلىككە ۇلگى بولىپ وتىرعانىن ايتادى اۋداندىق اۋىل شارۋاشىلىق ءبولىمىنىڭ ماماندارى. ماسەلەن، زاۋرە سانسىزبايەۆا ۇيىندە 5 سيىر بايلاپ باعىپ وتىر. ودان كۇن سايىن 70-80 ليتر ءسۇت الىپ، دۇكەندەر مەن ءسۇت وڭدەيتىن سەحتارعا وتكىزىپ كەلەدى. بۇگىندە شارۋا كاسىبىنىڭ اۋقىمىن كەڭەيتۋ ماقساتىندا تولەبي اۋدانىنان جەر الىپ، قورا سوعىپ مال باسى سانىن كوبەيتۋدى جوسپارلاپ وتىر.

ۇسىنعان: گۇلىم جاقان