قىرعىزستاننىڭ بۇرىنعى پرەزيدەنتى المازبەك اتامبايەۆ بۇل پىكىرىن 17 ناۋرىزدا بىشكەكتە وتكەن اقسى وقيعاسىندا قۇربان بولعانداردى ەسكە الۋ شاراسىندا ايتقان، دەپ جازادى Qamshy.kz اقپارات اگەنتتىگى ازاتتىق راديوسىنىڭ مالىمەتىنە سۇيەنىپ.

“ءومىر بويى وتباسىلىق اۆتوريتارلىق رەجيممەن كۇرەسە ءجۇرىپ، ءىشىن كورمەي، سىرتىن عانا كورىپ، وسىنداي ادامدى بيلىككە الىپ كەلگەنىم ءۇشىن كەشىرىم سۇرايمىن” دەدى اتامبايەۆ.

اتامبايەۆ قازىرگى بيلىكتى "وتباسىمەن باسقارۋ جولىنا ءتۇستى" دەپ ايىپتاپ، ودان باس تارتۋعا شاقىرعان. ەكس-پرەزيدەنت بيلىك بۇرىنعى پرەزيدەنت قۇرمانبەك باكييەۆتىڭ ءىزىن قايتالاپ، ءوزىن سىناعان ازاماتتاردى قۋدالاپ جاتىر دەپ ايتقان.

"ءقازىر ءتىپتى بالالارعا دا تيىسەتىن بولدى. بۇل بيلىك ودان دا قورقىنىشتى - ولار قورقىتۋ ءۇشىن ءبارىن تۇرمەگە وتىرعىزىپ جاتىر" دەگەن اتامبايەۆ.

ءدال وسى كۇنى اقسى اۋدانىنداعى ەسكە الۋ شاراسىندا سويلەگەن قىرعىزستاننىڭ قازىرگى پرەزيدەنتى سوورونباي جەەنبەكوۆ "بيلىكتەگى تامىر-تانىستىقپەن كۇرەسكەن ازامات رەتىندە" ەشقاشان "وتباسىمەن باسقارۋ جۇيەسىنە" جول بەرمەيتىنىن ايتىپ، وزىنە دەيىنگىلەردى سىناعان.

"ءبىر كەزدەرى مەملەكەتتى قىلمىستىق توپ باسقارعان كەزدەر بولدى. وعان قوعامنىڭ ءوزى دە كوز جەتكىزىپ كەلەدى. ءبىز حالىقتىڭ ارمان-مۇراتىن جاقسى بىلەمىز. حالىق بەكەردەن-بەكەر "تۋرا بيدە تۋعان جوق، تۋراسىز بيدە يمان جوق" دەپ ايتپاعان. مەنەن باستاپ بيلىكتىڭ ءۇش تارماعى مۇنى ۇمىتپاۋى كەرەك. وتباسىلىق كلانمەن كۇرەسكەندەردىڭ الدىڭعى قاتارىندا بولعان ازامات رەتىندە ايتارىم، ەشقاشان وتباسىمەن باسقارۋعا جول بەرمەيمىن" دەپ ايتقان.

قىرعىزستاندا بۇرىنعى پرەزيدەنت اتامبايەۆ پەن قازىرگى پرەزيدەنت جەەنبەكوۆ اراسىنداعى جاعدايدىڭ ناشارلاپ كەتكەنى ءجيى ايتىلادى. 2018 جىلدىڭ اياعىندا اتامبايەۆ جەرگىلىكتى سايتتاردىڭ بىرىنە بەرگەن سۇحباتىندا پرەزيدەنت بىرەۋلەر ارقىلى "وزىنە ىقپال ەتۋگە تىرىسىپ وتىر" دەپ ايىپتاعان.

سوورونباي جەەنبەكوۆ 2017 جىلى پرەزيدەنت سايلاۋىندا سايلاۋشىلاردىڭ 54 پايىزىن جيناپ، جەڭىسكە جەتكەن. ونى پرەزيدەنتتىككە قىرعىزستاننىڭ سوسيال-دەموكراتيالىق پارتياسى ۇسىنعان. سول كەزدە پرەزيدەنت بولىپ تۇرعان المازبەك اتامبايەۆ ونى ەرەكشە قولداعان.

2002 جىلى ناۋرىزدىڭ 17-ىندە بيلىككە نارازىلىق ءبىلدىرىپ، بەيبىت شەرۋگە شىققاندارعا ميليسيا قارۋ قولدانعان. وقيعا سالدارىنان التى ازامات قازا تاپقان، ونداعان ادام زارداپ شەككەن.

ۇسىنعان: نازەركە لابيحان