رەسەيدىڭ بۇرىنعى قارجى ءمينيسترى، ەسەپ پالاتاسىنىڭ باسشىسى الەكسەي كۋدرين «ازىرگە اقش ەكونوميكاسى السىرەمەيدى» دەگەن پىكىردە.
ونىڭ ايتۋىنا قاراعاندا، «اقش تاراپى ءالى 40 جىلدان استام ۋاقىت بويى الەمدىك ەكونوميكادا باسىمدىق تانىتادى. سودان كەيىن عانا بارىپ امەريكالىقتاردىڭ ەكونوميكاسى السىرەي باستايدى». ول بۇل پىكىرىن «موسكۆا. كرەمل. پۋتين» اتتى باعدارلاما بارىسىندا ايتتى.
–الەمدىك سوعىس پەن باسەكەلەستىك الداعى ۋاقىتتا ەكونوميكا سالاسىندا بولادى. ازىرگە الەمنىڭ ءبىر-اق ەلى عانا ەكونوميكادا باسىمدىعىن تانىتىپ وتىر. بۇل جاعداي 40 جىلعا سوزىلۋى مۇمكىن. سودان كەيىن عانا بارىپ اقش ەكونوميكاسى السىرەي باستايدى، –دەپ مالىمدەدى ول اتالعان باعدارلاما بارىسىندا.
الەكسەي كۋدريننىڭ ايتۋىنا قاراعاندا، ءقازىردىڭ وزىندە ترامپتىڭ ءبىرجاقتى ساياساتىنىڭ ارقاسىندا اقش تاراپى وراسان زور تابىس تاۋىپ وتىر. ءبىر عانا سىرتتان كەلەتىن جۇڭگو تاۋارلارىنا ساۋدا سالىعىن سالۋ ارقىلى ەل بيۋدجەتىنە ميلليارد دوللار قوسىمشا پايدا ءتۇسىپ وتىر. ءبىراق اقش ەكونوميكاسىنداعى ايرىقشا سەرپىلىسكە وزگە ەلدەر قىزعانىشپەن دە قاراپ وتىرعانىن جاسىرماۋ كەرەك.
ءبىراق اقش ەكونوميكاسى سونشالىقتى سەرپىندى دامىپ جاتقانىنا قاراماستان، ەلدىڭ اسكەري شىعىنى مەن بەرەشەگى جىل سايىن ارتىپ بارادى. 2019 جىلدىڭ اقپان ايىنداعى اقش -تىڭ سىرتقى قارىزى 22 تريلليون دوللارعا جەتتى. سوڭعى ءبىر ايدىڭ وزىندە سىرتقى بەرەشەك 90 ميلليارد دوللارعا ءوسىپ، 22،01 تريلليون دوللاردى قۇرادى.
وكىنىشكە قاراي، دونالد ترامپتىڭ پرەزيدەنتتىككە تۇسەر الدىندا حالىققا بەرگەن ۋادەسى ورىندالماي قالدى. CNN اقپارات اگەنتتىگىنىڭ حابارلاۋىنا قاراعاندا، سوڭعى ايدا اقش-تىڭ سىرتقى قارىزى 2 تريلليون دوللارعا ارتقان. ال باراك وبامانىڭ 8 جىل مەملەكەتتىك باسقارۋى كەزىندە سىرتقى بەرەشەك 9 تريلليون دوللارعا عانا ارتقانىن ايتا كەتەيىك.
