تاڭەرتەڭگى ساعات 9-دان اسقان ۋاقىت. جۇمىسقا اسىققان جۇرت ءنوپىرىنىڭ سايابىرسىعان ءساتى. ەلوردا شەتىنەن قالاعا قاتىنايتىن اۆتوبۋس باعدارشامنىڭ قىزىل تۇسىنە توقتاپ تۇرعان وزگە كولىككە كەلىپ سوعىلادى. اراعا ءبىراز سەكۋند سالىپ، سوققىعا تاپ بولعان باسقا ماشيناداعى ادامدار اۆتوبۋسقا جاقىنداي باستادى.

اۆتوبۋس الدىمەن وزگە قوعامدىق كولىكپەن سوقتىعىسقان. ەكى ورتادا جانشىلىپ قالعان سوڭعى جولاۋشىنىڭ دەنەسى قۇتقارۋشىلار مەن كومەككە كەلگەن ازاماتتاردىڭ قولىمەن شىعارىلىپ جاتىر. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىنە سۇيەنىپ حابارلايدى.

ءدال قازىرگى ۋاقىتتا جاراقات العانداردىڭ بارلىعىن جەدەل جاردەم كولىكتەرى اۋرۋحانالارعا الىپ كەتكەن. ءقازىر جولدى اۆتوبۋستاردان بوساتۋ جۇمىستارى جالعاسىپ جاتىر.

وقيعا ورنىنا جەدەل جاردەمنىڭ جيىنى 15 بريگاداسى كەلگەن. سوڭعى اقپارات بويىنشا، 2 ادام كوز جۇمدى. 36 ادام جاراقات الدى. 7 ازامات اۋىر جاعدايدا. ولاردىڭ ءومىرى ءۇشىن دارىگەرلەر كۇرەسۋدە. زاۋرەش وتەمىسوۆا سوعىلعان اۆتوبۋستىڭ ىشىندە بولعان ەكەن. اۋىر سوققىدان مۇرنى سىنعان.

«ادەتتەگىدەي جۇمىسقا بارا جاتقانمىن. اۆتوبۋس ءىشى اپات كەزىندە جارتىلاي بوس بولعان. قولىممەن بەتىمدى جاۋىپ قانا ۇلگەردىم. ءبىر ساتكە ەسىمنەن تانىپ قالىپپىن. كوزىمدى اشسام، ادامدار ايقايلاپ، شۋلاپ جاتتى»، - دەيدى زاۋرەش وتەمىسوۆا.

كوز جۇمعانداردىڭ ءبىرى 301ء-شى باعىتتاعى، جىلدامدىقپەن كەلىپ سوعىلعان اۆتوبۋستىڭ جۇرگىزۋشىسى، 53 جاستاعى اباي وسپانوۆ. ەكىنشىسى 24-تەگى جولاۋشى ايزات نۋرەكەنوۆا. 

«بۇل ارەكەت ق ر قك 345 بابى بويىنشا، ياعني، جول ءجۇرۋ ەرەجەسىن ورەسكەل بۇزىپ، وسىنىڭ سالدارىنان 2 جانە ودان دا كوپ ادامداردىڭ ولىمىنە اكەپ سوققان باپ بويىنشا سوتقا دەيىنگى تەرگەپ-تەكسەرۋ جۇمىستارى باستالىپ6 ساراپتامالار تاعايىندالادى، ونىڭ ىشىندە سوت-مەديسينالىق ساراپتاما، اۆتوتەحنيكالىق ساراپتاما»، دەپ مالىمدەدى قالالىق پوليسيا دەپارتامەنتىنىڭ ءباسپاسوز-حاتشىسى سوفيا قىلىشبەكوۆا.

ءتىلشى: كامەراعا ءتۇسىپ قالعان بەينەگە قاراعاندا اۆتوبۋس تەجەگىشىن باسپاعانداي كورىنەدى. اۆتوبۋستىڭ تەحنيكالىق جاعدايى قالاي بولعانىن بىلمەك بولىپ اۆتوپارككە بەتتەدىك. ونداعىلار 2014 جىلى شىعارىلعان قوعامدىق كولىكتە ءمىن بولماعان دەپ وتىر.

«تولىقتاي بارلىعىن مەحانيك تەكسەرىپ، پەچاتىن قويىپ بەرگەن عوي.  كۇندەلىكتى تەكسەرىلەدى مە؟  كۇندەلىكتى تەكسەرەدى، كەشكە كىرگەندە جانە تاڭەرتەڭ.  اۆتوبۋستىڭ تورموزى ۇستاماي قالدى دەگەن بولجام، مۇمكىن بە؟  جوق، بۇل جەردە مۇمكىن ەمەس»، - دەدى اۆتوپارك مەحانيگى مەيرام مۇسايەۆ.

ءتىلشى: تاعى ءبىر بولجام، جۇرگىزۋشىنىڭ دەنساۋلىعى سىر بەرۋى مۇمكىن. اباي وسپانوۆتىڭ 9 جىلداي تاجىريبەسى بار. اۆتوپارككە ەكى جىل بۇرىن كەلىپتى. قىزمەتتە دە، دەنساۋلىعىندا دا ءمىن بولماعان، قۇجات بويىنشا.

«جۇرگىزۋشى تاڭعى ساعات 6-30-دا مەديسينالىق تەكسەرۋدەن وتكەن. دەنساۋلىعىندا ءمىن بولماعان. ەگەر ءوزى جايسىز سەزىنسە، رەيسكە شىقپاۋشى ەدى. جىل سايىنعى تەكسەرۋدەن سوڭعى رەت 4 اي بۇرىن ءوتتى. جۇمىسقا جارامدى دەگەن قورىتىندى بار»، دەپ ايتتى "استانا LRT"  كومپانياسىنىڭ باسقارما ءتوراعاسى بەكمىرزا يگەنبەردينوۆ.

اۆتوپارك باسشىلىعى جۇرگىزۋشى مەرەكەلىك دەمالىستان سوڭ جۇمىستاعى ەكىنشى كۇنىنە كىرىسكەن دەيدى.

وقيعانىڭ ناقتى سەبەبىن ەندى ءتارتىپ ساقشىلارى انىقتايتىن بولادى. مەرت بولعان اۆتوبۋس جۇرگىزۋشىنىڭ ارتىندا 4 بالاسى قالعان ەكەن. تۋىستارىمەن تىلدەسكەنىمىزدە، ول كەزىندە چەرنوبل اپاتىنىڭ سالدارىمەن كۇرەسكە قاتىسقانىن بىلدىك. ال قاپىدا كوز جۇمعان جولاۋشى ايزات ءبىر بالانىڭ جالعىزباستى اناسى بولىپتى.

ۇسىنعان: نازەركە لابيحان