دجوردج ستينني – اقش-تا ءولىم جازاسىنا كەسىلگەن ەڭ جاس «قىلمىسكەر». ءيا،  XX عاسىردا 14 جاستاعى بوزبالا «قىلمىسكەر» اتاندى، ەشقانداي تەرگەۋسىز، دالەلسىز، كۋاگەرسىز، ءتىپتى زاڭسىز...

سوت زالىندا دوردج قولىنا ءىنجىل ۇستاپ تۇرىپ، كىناسىز ەكەنىن دالەلدەمەك بولدى. الايدا تۇك شىقپادى. سەبەبى سوتقا قاتىسۋشىلار دا، سوت تورەشىلەرى دە، ادۆوكاتتار دا اق ءناسىلدى بولدى. سوت وتىرىسى ەكى ساعاتقا سوزىلدى، ال ۇكىم 10 مينۋتتا كەسىلدى. كامەلەت جاسقا تولماعان بالا ەكى قىزدىڭ ولىمىنە كىنالى دەپ تانىلدى.

11 جاستاعى بەتتي مەن 7 جاستاعى مەريدىڭ ءولى دەنەلەرى دجوردج تۇراتىن ءۇيدىڭ ماڭىنان تابىلعان ەدى. ەكى قىزدى بازبىرەۋ زورلاپ، ءولتىرىپ، دەنەلەرىن شىركەۋ ماڭىنداعى شىركەۋگە لاقتىرىپ كەتكەن. دجوردجىڭ اتا-اناسىنا بالالارىنا جاقىنداتپاق تۇگىلى، تۇرمەدە دە كەرەكتى دۇنيەلەرىن بەرىپ جىبەرۋگە تىيىم سالدى. اقىر سوڭىندا بيلىكتىڭ بۇيرىعىمەن قالادان دا قۋىلدى.

ءولىم جازاسىنا كەسىلگەنگە دەيىن بالا 81 كۇنىن اتا-اناسىنان جىراقتا، جالعىز ءوزى وتكىزدى. ونىڭ تۇسىنىكتەمەلەرىن، اقتالۋعا ارەكەتتەنگەن سوزدەرىن اق ناسىلدىلەر عانا تىڭدادى. ءتىپتى ادۆوكاتى دا بالاعا جولاي المادى. ال سوتتا بالانىڭ كىناسىز ەكەنىن دالەلدەمەك بولعان قۇجاتتار نەگىزسىز نەمەسە قاتە دەپ تانىلدى. ءتىپتى ارحيۆتەردە بالانىڭ ءولىم جازاسىنا كەسىلگەنى جايلى ءبىر ءتۇيىر قاعاز عانا ساقتالىپتى. ونىڭ ءوزى زاڭداستىرىلماعان.

1944 جىلدىڭ 16 شىلدەسىندە 14 جاستاعى بوزبالا كولۋمبيا تۇرمەسىندە ءولىم جازاسىنا كەسىلدى. تۇرمە قىزمەتكەرلەرى بالانى قالاي ءولتىرۋ كەرەكتىگىن ۇزاق ويلاندى. ناتيجەسىندە، ەلەكترلىك ۇستەلگە قولدارىن بايلاپ وتىرعىزىپ، باسىنان 5، 380 ءۆولتتى وتكىزۋ ارقىلى ولىمگە قيدى.

ال 70 جىلدان كەيىن وڭتۇستىك كاروليندەگى سوت دجوردجىڭ كىناسىز ەكەنىن دالەلدەدى.

الكولۋ قالاسىنىڭ قاق ورتاسى تەمىر جولمەن بولىنگەن. ونىڭ ءبىر جاعىندا اق ناسىلدىلەر تۇرسا، ەكىنشى جاعىن قارا ناسىلدىلەر مەكەندەدى. ال قىزدار گۇل الۋ ءۇشىن وزگە اۋدانعا ءوتىپ كەتكەن سوڭ ءىز-تۇسسىز جوعالعان. جەرگىلىكتى تۇرعىن سوتتا قىزداردىڭ سوڭعى رەت ستيننيمەن سويلەسىپ تۇرعانىن كورىپ قالعانىن ايتتى. بالانىڭ كىنالى ەكەنىن دالەلدەيتىن جالعىز سەبەپ – وسى.

1988 جىلى امەريكالىق جۋرناليست، جازۋشى ديەۆيد ستاۋتتىڭ «كارولين قاڭقالارى» اتتى كىتابى شىقتى. وندا ءستيننيدىڭ ءومىرى بەينەلەنگەن. 1989 جىلى ءدال وسىنداي اتاۋمەن رەجيسسەر دجون ەرماننىڭ ءفيلمى ەكراننان كورسەتىلە باستادى. دجوردجىڭ ءرولىن سومداعان كەنني بلەنك «ەڭ ۇزدىك اكتەر» اتاعىن جەڭىپ الدى. ءستيننيدىڭ وقيعاسىنا قاتىستى رەجيسسەر چارلز بەرنەتتىڭ «83 كۇن» اتتى ءفيلمى دە شىقتى. فيلمدە ءستيننيدىڭ ىسىنە قاتىستى شىنايى قۇجاتتار كورسەتىلگەن.

گۇلىم جاقان