ءال-فارابي اتىنداعى قازۇۋ رەكتورى، اكادەميك عالىم مۇتانوۆ باستاعان ۋنيۆەرسيتەت دەلەگاسياسى م.لومونوسوۆ اتىنداعى ممۋ-دە (ماسكەۋ ق.، رف) وتكەن «ۋنيۆەرسيتەتتەر، قوعام جانە ادامزات بولاشاعى» حالىقارالىق فورۋمىنا قاتىستى دەپ جازادى Qamshy.kz اقپارات اگەنتتىگى ۋنيۆەرسيتەتتىڭ باسپا ءسوز قىزمەتىنىڭ دەرەگىن نەگىزگە الىپ. «جاڭا ۇرپاق ۋنيۆەرسيتەتى: 4.0 تراەكتورياسى» تاقىرىبىنداعى قازاقستاندىق جەتەكشى جوعارى وقۋ ورنى باسشىسىنىڭ بايانداماسى فورۋمنىڭ قاتىسۋشىلارى اراسىندا ۇلكەن قىزىعۋشىلىق تۋدىردى.

فورۋم جۇمىسىنا مىڭداعان جەتەكشى رەسەيلىك جانە شەتەلدىك جوعارى وقۋ ورىندارىنىڭ رەكتورلارى، حالىقارالىق ۇيىمدار وكىلدەرى، جاپونيا، فرانسيا، گەرمانيا، ۇلىبريتانيا، يسپانيا، يتاليا، گرەسيا، جۇڭگو، قازاقستان، يران، ەگيپەت جانە باسقا ەلدەردىڭ تانىمال مەملەكەتتىك قايراتكەرلەرى مەن ساراپشىلارى قاتىستى.

ولار جاھاندانۋ ءداۋىرى مەن قازىرگى زاماننىڭ سىن-تەگەۋرىندەرى جاعدايىندا جوعارى مەكتەپتتەردى دامىتۋدىڭ جانە عالامدىق ءعىلىمي-بىلىم بەرۋ، تەحنولوگيالىق جانە گۋمانيتارلىق كەڭىستىكتى ۇيلەستىرۋدە جوعارى وقۋ ورىندارىنىڭ ءرولىن ارتتىرۋدىڭ ماڭىزدى ماسەلەلەرىن تالقىلادى.

فورۋمنىڭ پلەنارلىق وتىرىستارى ادامزاتتىڭ ءعىلىمي-بىلىم بەرۋ جانە مادەني دامۋىنداعى ۋنيۆەرسيتەتتەردىڭ تاريحي ءرولىن تالقىلاۋعا، سونداي-اق قازىرگى زاماننىڭ جاھاندىق ماسەلەلەرىن ەڭسەرۋگە ارنالدى.

ءىس-شارانى اشا وتىرىپ، م.لومونوسوۆ اتىنداعى ممۋ رەكتورى، ەۋرازيالىق ۋنيۆەرسيتەتتەر اسسوسياسياسىنىڭ پرەزيدەنتى، اكادەميك ۆ.ا.سادوۆنيچيي ۋنيۆەرسيتەتتەردىڭ قوعامداعى ماڭىزدى ميسسياسىن اتاپ ءوتتى. «گۋمانيتارلىق ءبىلىم بەرۋدى بارىنشا دامىتۋ كەرەك، ول تاريح، مادەنيەت، انا ءتىلى جانە ونەرگە نازار اۋدارا وتىرىپ، جاھاندانۋ جاعدايىندا ءسوزسىز پايدا بولاتىن مورالدىق جانە رۋحاني اۋىتقۋلاردى تەڭگەرە الادى»، - دەدى ول.

قازاقستاننىڭ جەتەكشى جوعارى وقۋ ورنى – ءال-فارابي اتىنداعى قازۇۋ-دىڭ رەكتورى، اكادەميك ع.مۇتانوۆتىڭ جاڭا بۋىنداعى ۋنيۆەرسيتەت ۇلگىسىن قالىپتاستىرۋ تاجىريبەسى تۋرالى بايانداماسى جاندى قىزىعۋشىلىق تۋدىردى. «ءتورتىنشى بۋىن ۋنيۆەرسيتەتىنىڭ مودەلى حالىقارالىق تاجىريبە نەگىزىندە جاسالعان جانە جوعارى تەحنولوگيالىق ءارى رۋحاني-ادامگەرشىلىك پلاتفورمالاردىڭ سيمبيوزىنا نەگىزدەلگەن. ول جاس ۇرپاقتىڭ الەمنىڭ ازاماتتارى رەتىندە ىزگىلىكتى جانە تۇراقتى قوعام قۇرۋدا الەۋمەتتىك جاۋاپكەرشىلىگىن قالىپتاستىرۋعا باعىتتالعان»، - دەدى رەكتور. بۇل مودەل قازۇۋ-دا «ءال-فارابي - Smart City» جوباسى ارقىلى ءىس جۇزىندە كورىنىس تابۋدا ەكەندىگىن العا تارتتى. فورۋمنىڭ قاتىسۋشىلارى ۇسىنىلعان ۇلگىگە قولداۋ كورسەتىپ، ونىڭ وزەكتىلىگى مەن سۇرانىسقا يە ەكەندىگىن  اتاپ ءوتتى.

فورۋم اياسىندا، سونداي-اق، ەۋرازيالىق ۋنيۆەرسيتەتتەر اسسوسياسياسىنىڭ قۇرىلتايى وتكىزىلىپ، عىلىم جانە ءبىلىم سالاسىنداعى ىنتىماقتاستىق تۋرالى مەموراندۋمدارعا قول قويىلدى.

ۇسىنعان: اسەل بولات قىزى