سوڭعى ءجۇزجىلدىقتىڭ ىشىندەگى ەڭ ءىرى تەراكتىنىڭ ءبىرى 1925 جىلى 16 ساۋىردە بولگاريا استاناسى سوفيا قالاسىندا كوممۋنيستەردىڭ ۇيىمداستىرۋىمەن ورىن اللدى. رەسمي دەرەكتەر تەراكت جوسپارىنىڭ الدىن الا ماسكەۋدە قۇرىلعانىن ايتادى، الايدا ءورىستىلدى ۋيكيپەديا تەراكت ۇيىمداستىرۋشىلارى جايلى ءبىر اۋىز ءسوز جازباعان.

قاندى قىرعىننىڭ ماقساتى – مەملەكەت باسىنداعىلاردىڭ كوزىن جويۋ جانە III بوريس پاتشادان باستاپ ەل ۇكىمەتى مەن اسكەري باسقارمانى قۇرتۋ. كرەملدەگى ۇيىمداستىرۋشىلاردىڭ جوسپارى بويىنشا، تەراكت ناتيجەسىندە  بيلىك جويىلىپ،  ەلدىڭ قۇرىلىمدىق كۇشى السىرەپ، اسكەردىڭ بولگاريا كومپارتياسىن جاۋلاپ الۋىنا مۇمكىندىك تۋعىزۋ ءارى «پرولەتارلىق ريەۆوليۋسيا» ورناتىلۋى ءتيىس بولدى.

جارىلىس «دەموكراتيالىق كەلىسىم» پارتياسىنىڭ دەپۋتاتى، گەنەرال كونستانتين گەورگييەۆتىڭ جانازاسىن شىعارۋ راسىمىندە قاسيەتتى اپتا سوبورىندا ورىن الدى. سەبەبى راسىمگە ەلدىڭ ساياسي تۇلعالارى تۇگەلدەي دەرلىك قاتىستى. جارىلىستىڭ سالدارىنان 134 ادام قازا تاپتى. قازا تاپقاندار – سوفيا اكىمى، پوليسيا باسشىسى، 12 گەنەرال، 15 پولكوۆنيك، 7 پودپولكوۆنيك، 3 مايور، 9 كاپيتان جانە 3 دەپۋتات ءارى شىركەۋدەگى حورعا قاتىسقان بىرنەشە وقۋشى. 

جارىلىستىڭ سالدارىنان 500-گە جۋىق ادام ءتۇرلى جاراقات الدى. ولاردىڭ 79-ى قايتىس بولىپ، قازا تاپقانداردىڭ سانى 213-كە جەتتى. ونىڭ ۇستىنە جارىلىس پاسحا مەيرامىنا قارسى قاسيەتتى بەيسەنبى كۇنى ورىن الدى.

كوممۋنيستەردىڭ باستى نىساناسى بولعان III بوريس پاتشا، ۇكىمەت باسشىسى مەن وزگە مينيسترلەر امان قالدى. تەراكتىنى جاساعاندار مەن ۇيىمداستىرۋشىلاردى پوليسيا دەرەۋ انىقتادى. ءتىپتى تەررورشىلار ۇيىمداسقان پاتەردەن ماسكەۋدەن كەلگەن بۇيرىق حات تا تابىلدى.

مامىردىڭ 1-ىنەن 11-ىنە دەيىنگى ارالىقتا سوفيا قالاسىندا بولگار كوممۋنيستىك پارتياسىنىڭ مۇشەلەرىنە قاتىستى سوت ءىسى ءجۇردى. ناتيجەسىندە بىرنەشە ادام ءولىم جازاسىنا كەسىلدى. تاعى بىرنەشەۋى ماسكەۋگە قاشىپ ۇلگەردى.

سول كەزدەگى سسرو بيلىگى تەراكتىگە قاتىسى بارىن استە جاسىردى. ءتىپتى قازا تاپقان 200-دەن اسا ادام ءۇشىن قايعىرعان ماسكەۋ بولمادى، جوسپاردىڭ ورىندالماي قالعانىنا اشىنباسا...

الايدا جاساعان قىلمىسى جانىن جەگىدەي جەپ، ارىن مازالاعان ءبىر ادام عانا بولدى. اسكەري ۇيىمنىڭ ۇيلەستىرۋشىسى ۆلاديمير نەستەروۆيچ جارىلىستىڭ قۇپيا قۇجاتتارىن جاريالاماۋدى ءوتىنىپ حات جازىپ، ءوزى گەرمانياعا تايىپ تۇردى.

ال نەستەروۆيچ 1925 جىلدىڭ تامىزىندا ماينس قالاسىنداعى ءدامحانالاردىڭ بىرىندە
وگپۋ سىرتقى ىستەر ينستيتۋتىنىڭ باسشىسى م. تريليسسەردىڭ بۇيرىعى بويىنشا ەكى نەمىستىڭ قولىنان ۋلانىپ قايتىس بولدى.

ۇسىنعان: گۇلىم جاقان