مەملەكەت باسشىسى توقايەۆ ەگەمەن قازاقستان جانە ايقىن گازەتتەرىنە سۇحبات بەردى دەپ جازادى Qamshy.kz اقپارات اگەنتتىگى. اتالمىش سۇحباتتا پرەزيدەنت قازاق ءتىلىنىڭ قازىرگى حال-احۋالى تۋرالى ءوز پىكىرىن بىلدىرگەن. 

قاسىم-جومارت توقايەۆ مەملەكەتتىك ءتىلدىڭ مارتەبەسىن كوتەرۋ ماقساتىنداعى جۇمىستاردىڭ جالعاسىن تاباتىنىن ايتتى. 

"قازاقتىڭ ءتىلى – قازاقتىڭ جانى! حالقىمىزدىڭ تاريحى دا، تاعدىرى دا – تىلىندە. مادەنيەتى مەن ادەبيەتى دە، ءدىلى مەن ءدىنى دە – تىلىندە. ۆ.رادلوۆ ايتقانداي، قازاق ءتىلى – ەڭ تازا ءارى باي ءتىلدىڭ ءبىرى. ءتىل وتكەن تاريحپەن عانا ەمەس، بۇگىن مەن بولاشاقتى بايلا­نىس­تىراتىن قۇرال. مەنىڭشە، ءتىلدىڭ تۇعىرى دا، تاعدىرى دا بەسىكتەن، وتباسىنان باستالادى. وتباسىندا انا تىلىندە سويلەپ وسكەن ءبۇلدىر­ءشىننىڭ تىلگە دەگەن ىقىلاسى تەرەڭ، قۇرمەتى بيىك بولادى. وسى تۇرعىدا، بالاباقشالاردا، مەكتەپتەردە مەملەكەتتىك ءتىلدىڭ مارتەبەسىن كوتەرۋدى نازاردا ۇستاۋ قاجەت"، - دەيدى مەملەكەت باسشىسى. 

سونداي-اق پرەزيدەنت لاتىن گرافيكاسىنا كوشۋ جۇمىستارى دا كەزەڭ-كەزەڭىمەن جالعاسىن تاباتىنىن جانە قوعامدىق پىكىرگە باسا نازار اۋدارىلاتىنىن اتاپ ءوتتى. 

"كەز كەلگەن ۇلتتىڭ ءالىپبي تاڭداۋى تەك جازۋ ۇلگىسىن تاڭداۋ ەمەس. بۇگىندە قازاقستان حالقى دا زامانا كوشىنەن قالماي، لاتىن گرافيكاسىنا نەگىزدەلگەن ءالىپبيدى تاڭداۋعا بەل بۋىپ وتىر. كورشى مەملەكەتتەردىڭ كوپ­شىلىگى لاتىن گرافيكاسىن تاڭدادى. الەمدەگى اقپاراتتاردىڭ 90 پا­يىزى لاتىن گرافيكاسىندا جارىق كورەدى. ال اقپاراتقا كىم يەلىك ەتسە، عىلىم مەن تەحنولوگياعا دا سول يە بولادى. قازاق ءتىلىنىڭ لاتىن الىپبيىنە كوشۋى – رۋحاني جاڭعى­رۋدىڭ ەڭ شەشۋشى كەزەڭدەرىنىڭ ءبىرى. بۇل قوعامدىق وي مەن ساناعا تۇپكىلىكتى وزگەرىس جاسايتىن قادام. وسىعان وراي، ەلباسىنىڭ لاتىن الىپبيىنە كوشۋ تۋرالى جارلىعى شىقتى. ەلىمىزدە قازاق ءتىلىنىڭ لاتىن گرافيكاسىنا نەگىزدەلگەن ءالىپبيىن پايدالانا باستاعان قۇ­رىلىمدار بار. «ەگەمەن قازاق­ستان» گازەتىنىڭ دە ءبىر بەتى وسى ءالىپ­بيمەن جارىق كورىپ جاتىر عوي. لاتىن الىپبيىنە كوشۋ كەزەڭ-كەزەڭىمەن جالعاسا بەرەدى. ناقتى بەلگىلەنگەن كەستە بار. سول جۇيەدەن اۋىتقىمايمىز. ءبىراق قوعامدىق پىكىر، ءالىپبيدى قولدانۋ بارى­سىن­داعى ارتىقشىلىقتار مەن ولقى­لىقتار ەسكەرىلەدى"، - دەيدى قاسىم-جومارت توقايەۆ. 

ۇسىنعان: اسەل بولات قىزى