بەلگىلى جۋرناليست ساتتار ساپاربەكوۆ ومىردەن وزىپتى. مارقۇمنىڭ ءمايىتى بۇگىن – ءساۋىردىڭ 3ء-ى كۇنى ساعات 11.00-دە ءوز وتباسىنان شىعارىلادى ەكەن. بۇل تۋرالى بايبوتا قوشىم-نوعاي Facebook-تەگى پاراقشاسىندا حابارلادى.

«ساتتار ساپاربەكوۆ بىزدەن باقانداي ون جاس ۇلكەندىگى بار اعامىز-تۇعىن. «ون جاس ول دا قۇرداس» دەپ، 1971 جىلى قازاقتىڭ مەملەكەتتىك ۋنيۆەرسيتەتىنە وقۋعا بىرگە قابىلدانىپ، قاتار قۇربىداي بولىپ كەتتىك. ۋنيۆەرسيتەتتى تامامداعان سوڭ ۇزاق جىل «لەنينشىل جاس» (قازىرگى «جاس الاش») گازەتىندە قىزمەت ىستەدى. قازاق جۋرناليستيكاسىندا ۇلكەن ورنى بار قالامگەر ءدۇرالى دۇيسەباي فەيسبۋكتەگى پاراقشاسىندا 2017 جىلعى مامىردىڭ 20-سى كۇنى: «ساتتار اعا ساپاربەكوۆ (بۇگىندە ساتتار ءجۇسىپ) – قازاق جۋرناليستيكاسىنا قوماقتى ۇلەس قوسقان اعا بۋىن جۋرناليستەردىڭ ورتاسىنان ويىپ ورىن الاتىن تۇلعا. قاراپايىم، ەلدىڭ الدىنا ءتۇسىپ كەتۋ سەكىلدى «جەلاياقتىق قارقىندى» تىم ۇناتا قويمايتىن، وزىندىك بايسالدى، بايىپتى جولىمەن اقىرىن ءجۇرىپ، انىق باسقان وسى اعانىڭ قول استىندا بىر-ەكى جىل جۇمىس ىستەگەنىم بار. «لەنينشىل جاستا»، ارتىق اۋىس ءسوزى جوق، باستىق رەتىندە دە وكتەمدىك بايقاتپايتىن اردا ازامات. اتتەڭ، جۋرناليستيكادان ءسال ەرتە كەتىپ، «بۇعىپ» قالعانداي كورىنگەن. ءبىراز قيىن-قىستاۋ كەزەڭدى دە باستان كەشتى دەپ ەستىپ قالعانىمىز بار. ەر جىگىتتىڭ باسىنا نە كەلىپ، نە كەتپەيدى! ساتتار اعا سەكىلدى ازاماتتار تالاي قيىندىقتان تالاي رەت اتتاپ-بۇتتاپ ءوتىپ شىعىپ ءجۇر عوي. استاناعا كەتىپ قالعاندىقتان با، الماتىداعى اعادان قول ءۇزىپ قالعانداي ەدىك. سوڭعى كەزدەرى فب-دا كوزگە تۇسە باستادى»، – دەپ جازىپتى. ال ءدال وسى كۇنى ەرمۇرات باپي: «مەنەن تۋرا ءبىر مۇشەل ۇلكەندىگى بار اعاتايىما جەلىدەگى بەلسەندىلىگى، قوعام ءومىرىنىڭ قيتۇرقىسىنا قامكوڭىل قاسيەتى، ءىنى-قارىنداستارىنا ونەگە بولارلىق اعالىعى ءۇشىن ءتانتىمىن»، – دەپ لەبىز ءبىلدىرىپتى. بۇل سوزدەر جۋرناليست ساتتار ساپاربەكوۆتىڭ قالامگەر رەتىندە قادىر-قاسيەتىن اڭعارتادى عوي دەيمىن»، - دەپ جازدى بايبوتا قوشىم-نوعاي مارقۇم جۋرناليست جايىندا.

ساكەڭنىڭ يمانى سالامات بولسىن! جانىنا جانناتتان جاي بۇيىرسىن! ارتىندا قالعان قوس قۇلىنى ۇزاق جاساپ، ەل-جۇرتى امان بولسىن!

ۇسىنعان: گۇلىم جاقان