اكىمدەر جاپپاي الەۋمەتتىك جەلىگە تىركەلىپ، جەكە نومىرلەرىن جاريالاپ جاتىر. تاپسىرما سولاي! وسى ارقىلى ءار سالاداعى پروبلەمالاردى حالىقتىڭ ءوز اۋزىنان ەستىمەك.  ەلورداداعى ءبىرقاتار شەنەۋنىككە حابارلاسىپ جاڭا يدەياعا دەگەن كوزقاراسىن بىلگىمىز كەلگەنىمەن، ءبىرقاتارى تەلەفوندارىن كوتەرمەدى دەپ حابارلايدى Qamshy.kz اقپارات اگەنتتىگى تۋرالى ەۋرازيا ءبىرىنشى ارناسىنىڭ دەرەگىن نەگىزگە الا وتىرىپ. 

مەملەكەت باسشىسى اكىمدەردىڭ باسىن قوسىپ جيىن وتكىزگەندە «حالىقپەن بايلانىستى كۇشەيتىڭدەر!» - دەپ تاپسىرما بەرگەن ەدى. پرەزيدەنت ايتتى، تالاپ ورىندالۋ كەرەك. بار وڭىرگە ءبىرىنشى بولىپ نۇر-سۇلتاننىڭ شەنەۋنىكتەرى ۇلگى كورسەتتى. 
 ەلۆيرا جۇرگەنبايەۆا، قالا اكىمىنىڭ باسپا ءسوز حاتشىسى:  "نۇر-سۇلتان" قالاسىنىڭ اكىمى باقىت تۇرلىحان ۇلى جەكە ءنومىرىن جاريالاۋ ارقىلى حالىقپەن تىكەلەي وزدەرى بايلانىسۋى قاجەت دەگەن تاپسىرما بەردى. ول تاپسىرما ورىندالۋى ءتيىس. سوندىقتان باسقارما باسشىلارى، اۋدان باسشىلارى بۇگىنگى تاڭدا جەكە سۇراقتارعا جاۋاپ بەرىپ ، تۇرعىندار قانداي دا ءبىر پروبلەمامەن شاعىمدانسا سول پروبلەمانى شەشۋ جولىندا  وزدەرى اينالىسىپ جاتىر. بۇل حالىققا كەرەك دەپ ويلايمىن، حالىقپەن تىعىز بايلانىستا بولۋى ءۇشىن، پىكىرىن ءبىلۋ ءۇشىن. دۇرىس دەپ ويلايمىن. ءبىر عانا سول جاريالاۋمەن توقتاپ قالماي ءبىراز حالىقتى وزىنە شاقىرىپ جوبالارىن ءار اي سايىن بولماسا،ماۋسىم سايىن جاريالاپ وتىرسا نۇر ۇستىنە نۇر بولادى — دەيدى.

ءدال وسى اقپارات شىققان سوڭ اتقارۋشى بيلىك وكىلدەرى حالىقپەن بايلانىستى كۇشەيتەتىن بولىپتى دەپ ءبىر قۋاندىق ەمەس پە؟ نۇر-سۇلتان قالاسىنداعى اۋدان اكىمدەرىنە قوڭىراۋ شالىپ كوردىك.

الدىمەن  ەسىل اۋدانىنىڭ اكىمى تولەگەن زاكاريانوۆقا حابارلاسايىق.
«ابونەنت قوڭىراۋ قابىلداي المايدى»

تەلەفونى ءسونىپ تۇر. ءبىر شارۋالارمەن جۇرگەن شىعار، بىلمەيمىز. ءارى قاراي كەتتىك. ەندىگى كەزەكتە جاڭادان قۇرىلعان بايقوڭىر اۋدانىنىڭ اكىمى ەرلان قاناليموۆقا حابارلاسايىق. 
حابارلاستىق، المايدى. 

بايقوڭىر اۋدانىنىڭ اكىمى دە تەلەفونىن كوتەرمەدى. ءۇمىتىمىزدى ۇزبەيىك. ەندى سارىارقا اۋدانىنىڭ اكىمىنە حابارلاسامىز.
حابارلاستىق. المايدى. 

سارىارقا اۋدانىنىڭ اكىمى دە جاۋاپ بەرمەدى. ال ەندى الماتى اۋدانىنىڭ اكىمىنە حابارلاستىق، المايدى.

باحتيار ماكەن، ق ر پارلامەنتى ءماجىلىسىنىڭ دەپۋتاتى: جاۋاپ بەرگەننەن كەيىن ساپاسىنا قاراۋ كەرەك. ول ءنومىردى بەرىپ قويىپ، ەرتەڭ دۇرىس دەڭگەيدە جاۋاپ بەرىپ حالىقتىڭ كوپتەگەن سۇراعىنا ءدۇرىس جاۋاپ بەرسە دۇرىس. ءبىراق ەرتەڭ ول ءنومىر قۇر كوزبوياۋشىلىق ءۇشىن تۇرسا دۇرىس ەمەس. 

البەتتە جوعارىدان تاپسىرما بەرىلسە، ورىنداۋى شارت. ءبىراق سول ءىستىڭ ءوزىن اقىلعا سالىپ اتقارسا كەم -كەتىگى بولماس ەدى. بلوگەر امانگەلدى قۇرمەت ۇلى وسىنى مىسالعا كەلتىرەدى. جاقسى، اكىمدەر مەن ءبولىم باسشىلارىنىڭ ءنومىرىن جازىپ قويدى دەلىك. 1 ميلليون  استام تۇرعىنى بار شاھاردىڭ شەنەۋنىكتەرى قايسىبىرىنە جاۋاپ بەرىپ ۇلگەرەدى دەگەن زاڭدى سۇراق تۋىندايدى. 

امانگەلدى قۇرمەت ۇلى، جۋرناليست: مەسسەندجەردە سىزگە تالاپ قويىپ وتىرعان، ماسەلەسىن قويىپ وتىرعان ادامنىڭ دەرەكتەرى ناقتى كورسەتىلىپ تۇرادى. اۋديوجازبا جولداساڭىز دا، جازباشا سۇراق قويساڭىز دا،ول تىركەلىپ وتىرادى. ال تەلەفونمەن "مەن سىزگە حابارلاسىپ ايتالىق ماسەلەم بار"دەسەم، ونى قانشالىقتى تىركەپ وتىرۋ مۇمكىندىگى بار. كولىكتە كەلە جاتۋى مۇمكىن، جينالىستا وتىرۋىڭمۇمكىن. سوندىقتان بىردەن تەلەفون بەرگەن كەزدە سول اكىمنىڭ، باسقارما باسشىسىنىڭ قاتىسۋىمەن قۇرىلعان ءتۇرلى توپتاردىڭ، مەسسەندجەر توپتاردىڭ بولعانى دۇرىس پا دەگەن ازاماتتىق كوزقاراسىم بار. 

ءجۋرناليستىڭ ايتۋى ورىندى-اق. ءبىراق تاجىريبەلى SMM، ممم مامانداردى اكىمدىككە جۇمىسقا الۋ ءۇشىن ولاردىڭ سۇراۋىنا ساي جالاقى تولەۋ كەرەك. ايتپەسەڭ ءوز ءىسىن جاقسى بىلەتىن اككى قىزمەتكەردى از اقشاعا الا تاڭنان كەشكە دەيىن كەڭسەدە وتىرعىزىپ قويا المايسىڭ. اكىمدەر مەن ءبولىم باسشىلارىنىڭ ءنومىرىنىڭ جاريالانعانىنا 6 كۇن بولدى. ءبىرازى تەلەفونىن كوتەرمەدى. شاعىم تىڭداپ شارشاپ قالعان بولار. ءارى قاراي بۇل ناۋقان قالاي جالعاسادى ەكەن. ونى دا كورەرمىز.

ۇسىنعان: فاريزا جومارت قىزى