قاراعاندى وبلىسىندا ايەلى مەن قىزىن قاعىپ ولتىرگەن جۇرگىزۋشىگە ۇكىم شىقتى، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىنە سۇيەنىپ.

قايعىلى وقيعا 2018 جىلدىڭ قاراشاسىندا قاراقۇدىق اۋىلىنان ءۇش شاقىرىم جەردە بولعان. كەشكىسىن وتباسى قاراعاندىدان شىعىپ، ۇيىنە كەلە جاتادى. ولار قالاداعى تۋىستارىنىڭ ۇيلەنۋ تويىنا بارىپتى. نەگىزىندە رولدە سوتتالۋشىنىڭ باۋىرى وتىرعان ەدى، سەبەبى ەر ادام ىشىمدىك ىشەتىنىن ءبىلىپ، توي الدىندا كولىكتى ايداپ قايتۋدى وتىنگەن. 

ءبىراق قايتار جولدا ماس ەر ادام كولىكتى ءوزىم جۇرگىزەمىن دەپ ايعايعا باسادى. ايەلىمەن دە، باۋىرىمەن دە جانجالداسىپ، كولىكتەگىلەردىڭ ءبارىن سىرتقا قۋىپ شىعادى.

ايەل قىزىمەن بىرگە اۋىلعا قارا جاياۋ جۇرە بەرەدى، ولار اسفالت جولدان شىعىپ، جان جولمەن كەتىپ بارا جاتقان. سوتتالۋشىنىڭ باۋىرى ولاردان بىرنەشە مەتر وزىپ كەتەدى، تاعى ءبىر جولاۋشى ايەل – سول اۋىلدىڭ تۇرعىنى، كەرىسىنشە، ارتتا قالىپ قويىپتى. رولگە مىنگەن ماس وتاعاسى ساناۋلى مينۋتتاردا ايەلى مەن قىزىن قاعىپ كەتەدى.

سوتتالۋشىنىڭ ايتۋىنشا، رولگە قالاي وتىرعانىن بىلمەيدى ەكەن، سوققىدان سوڭ عانا ەسىن جيعان. اتىپ شىعىپ قاراسا، قىزى جولاۋشى ايەلدىڭ قولىندا، ايەلى كولىكتىڭ ارت جاعىندا التى مەتردەي جەردە جاتىر. ايەل سول جەردە جان تاپسىرسا، اۋرۋحاناعا جەتكىزىلگەن جەتى جاسار قىز بىردەن كوماعا تۇسكەن. ميىنا قاتتى زاقىم كەلىپ، وزدىگىنەن تىنىس الا الماعان كورىنەدى. دارىگەرلەر بالانىڭ ءومىرىن ساقتاپ قالۋ ءۇشىن كونسيليۋم شاقىرىپتى، ءبىراق جاراقاتى تىم اۋىر بولعاندىقتان، ءبۇلدىرشىن قىز ءبىر تاۋلىككە جەتپەي كوز جۇمادى.

وتاعاسى كىناسىن تولىعىمەن مويىندادى. سوت ونى 345-باپتىڭ 4ء-بولىمى بويىنشا ايىپتى دەپ تانىپ، بەس جىلعا باس بوستاندىعىنان ايىردى. سونداي-اق كولىك ايداۋعا تىيىم سالدى.

ۇسىنعان: نازەركە لابيحان