كەشە الەۋمەتتىك جەلىدە وسكەمەندىك بالاقايدىڭ تۇسىرگەن بەينەجازباسى جاريالانعان ەدى. دوسجان ەسىمدى بالا ءۇيىنىڭ اۋلاسىنداعى بالالار الاڭىنىڭ كۇيىن ايتىپ، بيلىكتەگىلەرگە نازىن بىلدىرگەن. سول بالاقايمەن بۇگىن قالا اكىمى جاقسىلىق ومار كەزدەستى دەپ حابارلايدى Qamshy.kz اقپارات اگەنتتىگى altaynews.kz سايتىنىڭ دەرەگىن نەگىزگە الىپ. 

شاھار باسشىسى دوسجان دۋلاتۇلىنا بەلسەندى ازاماتتىق پوزيسيا تانىتقانى ءۇشىن العىس ءبىلدىرىپ، ونىڭ ارەكەتى قالانىڭ ەرەسەك تۇرعىندارى ءۇشىن ۇلگى بولاتىنىن ايتىپ ءوتتى.

— ءقازىر قالادا مىڭداعان اۋلا بار. ولاردىڭ كوبىنە 40 جىلداي ۋاقىت جوندەۋ جۇرگىزىلمەگەن. ماسەلەنى كەشەندى شەشۋ ءۇشىن وبلىس اكىمى دانيال احمەتوۆتىڭ باستاماسىمەن «مەنىڭ اۋلام» باعدارلاماسى جۇزەگە اسىرىلۋدا. پيك ءوتىنىش بەرگەن بارلىق اۋلا بيۋدجەت ەسەبىنەن تولىقتاي جوندەلەتىن بولادى. وكىنىشكە وراي، ءدال وسى اۋلا وتكەن جىلى ءوتىنىشتى دۇرىس بەرمەگەن، سونىڭ سالدارىنان اۋلا جوندەلەتىندەردىڭ تىزىلىمىنە كىرمەي قالعان، - دەدى جاقسىلىق ومار.

مامانداردىڭ ايتۋىنشا، مەكەمە باعدارلاما اياسىندا اۋلانى جوندەۋگە ءوتىنىش جاساعان. ءبىراق قۇجاتتار دۇرىس ازىرلەنبەگەندىكتەن، ءوتىنىش قابىلدانبادى. پيك-تىڭ جۇمىسى قاناعاتتاندىرمايتىنىن تۇرعىندار دا راستاپ وتىر. ال كووپەراتيۆتىڭ ءتوراعاسى بۇل كەزدەسۋگە كەلمەي قويعان ەكەن.

قالا اكىمى تۇرعىن ءۇي جاعدايىن ساقتاۋ مەن جاقسارتۋ ءۇشىن تۇرعىنداردىڭ بەلسەندى قاتىسۋى قاجەت ەكەنىن ەسكەرتتى. سەبەبى پيك قىزمەتىن تۇرعىنداردىڭ وزدەرى عانا باقىلاي الادى.

ال دوسجاننىڭ ايتقان نازىنا كەلەر بولساق، جاقسىلىق ومار 2019 جىلى جوندەلۋگە ءتيىس اۋلالاردىڭ ءتىزىمى بەكىتىلىپ قويعانىن ايتتى. الايدا بالانىڭ كوڭىلىن قالدىرماي، بەلسەندىلىگىنە قولداۋ كورسەتۋ ءۇشىن قالا بيۋدجەتىنەن ۇنەمدەلگەن قاراجات ەسەبىنە اۋلانى جوندەتۋگە ۋادە ەتتى.

ۇسىنعان: اسەل بولات قىزى