نەگىزى جۇرتشىلىقتىڭ كوزقاراسىن ءبىلۋ ءۇشىن حالىق اراسىندا ساۋالناما ءجيى جۇرگىزىلىپ تۇرادى. بۇل كەرەك نارسە. ال وسىدان بىرنەشە اپتا بۇرىن استانا قالاسىنىڭ اتاۋى وزگەرگەنىنەن جۇرتشىلىق حاباردار. ال بۇعان قازاقستاندىقتاردىڭ كوزقاراسى قانداي؟ ساۋالناما ناتيجەسى كورسەتكەندەي، قازاقستاندىقتاردىڭ باسىم كوپشىلىگى استانا اتاۋىنىڭ وزگەرگەنىن جاعىمدى تۇردە باعالايدى. سۇرالعانداردىڭ 42 پايىزى بۇل ەلباسىنىڭ اتىن ەستە قالدىرۋ ماقساتىندا جاسالعان دۇرىس قادام دەپ وتىر.

ايتا كەتەر ءبىر جايت، جۇرتشىلىقتىڭ كوزقاراسىن ءبىلۋ ءۇشىن (http://demos.kz/rus/index.php؟poll=76) جۇرگىزىلگەن ساۋالناماعا استانا، الماتى، شىمكەنت قالالارى مەن ەلىمىزدىڭ 14 وبلىس ورتالىعىنان 1813 ادام قاتىسقان. ساۋالناما 29 جانە 30 ناۋرىز ارالىعىندا جۇرگىزىلگەن.

زەرتتەۋ ناتيجەسىنە سەنسەك، قازاقستاندىقتاردىڭ باسىم كوپشىلىگى، ياعني 87 پايىزى ەلباسىنىڭ جۇمىسىن جاعىمدى تۇردە باعالاپ وتىر. ساۋالعا جاۋاپ بەرگەن رەسپوندەنتتەردىڭ 44 پايىزى ونىڭ ءوز ەركىمەن پرەزيدەنتتىك لاۋازىمنان كەتۋىن  ۋاقىتىندا جانە ابىرويلى جاسالعان قادام دەپ سانايدى.

جالپى العاندا، نازاربايەۆتىڭ بيلىكتى بەرۋ پروسەسىن قازاقستاندىقتار وڭ باعالايدى: رەسپوندەنتتەردىڭ 44 پايىزى نازاربايەۆتىڭ بيلىكتەن كەتۋ تۋرالى شەشىمىن ماقۇلدايدى، 23 پايىزى ابىرجىعان كۇي تانىتقان، 16 پايىزى بيلىك ترانزيتىنە بەيتاراپتىعىن بىلدىرگەن جانە ولار ەلباسىنىڭ مەملەكەت باسشىسى رەتىندە قالا بەرەتىنىن قولداعان. ساۋالعا جاۋاپ بەرگەندەردىڭ 12 پايىزى سوڭعى كۇنگە دەيىن ول بيلىكتە قالۋى كەرەك دەپ سانايدى.

جالپى ساۋالناما بارىسىندا نازاربايەۆتىڭ پرەزيدەنت رەتىندەگى جۇمىسىن اسىرەسە اعا ۇرپاق وكىلدەرى جوعارى باعالاعان: 60 جاستان اسقان ازاماتتاردىڭ 90 پايىزى ونىڭ قىزمەتىن جاعىمدى دەپ ەسەپتەيدى. ال 30-39 ارالىعىنداعى جاستاردىڭ 82 پايىزى ەلباسىنىڭ قىزمەتىنە وڭ باعا بەرگەن.

ساۋالناماعا قاتىسقان ازاماتتاردىڭ 50 پايىزى  قازاقستاندا بەيبىتشىلىك ورناتۋدا نازاربايەۆتىڭ ەڭبەگى ەرەن بولدى دەگەن پىكىردە.  ولار ەلىمىزدەگى ەتنيكارالىق تاتۋلىقتى نىعايتۋ مەن  قازاقستاندا تۇراقتىلىقتى ساقتاۋدا تۇڭعىش پرەزيدەنتتىڭ ۇلەسى وراسان زور ەكەنىن ايتادى.

ال جاقىندا عانا پرەزيدەنتتىك لاۋازىمىنا كىرىسكەن قاسىم-جومارت توقايەۆ تۋرالى جۇرتشىلىقتىڭ پىكىرى قانداي؟ ساۋالناما بارىسى كورسەتكەندەي،  سۇرالعانداردىڭ 40 پايىزى پرەزيدەنتتىككە ۇمىتكەرلەردىڭ ىشىندە مەملەكەت باسشىسىنا ەڭ لايىقتى كانديدات قاسىم-جومارت توقايەۆ دەپ سانايدى.

ال پرەزيدەنتتىك لاۋازىمعا كىرىسكەن قاسىم-جومارت توقايەۆتىڭ الدىندا قانداي مىندەتتەر تۇر؟ ساۋالناماعا جاۋاپ بەرگەندەردىڭ 43 پايىزى ءبىرىنشى ۋاقىتتا نازاربايەۆ العا قويعان ماقساتتاردى، اتاپ ايتقاندا الەۋمەتتىك مەملەكەتتىك باعدارلامالاردى ورىنداۋ كەرەكتىگىن العا تارتادى. رەسپوندەنتتەردىڭ 20 پايىزى الەۋمەتتىك باعدارلامالاردى ءالى دە بولسا جالعاستىرۋ كەرەك دەپ سانايدى. ساۋالناماعا قاتىسقانداردىڭ 24 پايىزى جەمقورلىقپەن كۇرەس ەكىنشى ماسەلە بولۋى كەرەك دەپ ەسەپتەيدى. ال 12 پايىزى شاعىن جانە ورتا كاسىپكەرلىكتى دامىتۋ ماسەلەسىمەن اينالىسقان ءجون دەگەن پىكىردە.