ءماجىلىس ءۇيى، 8 ءساۋىر. ءماجىلىس ءتوراعاسى نۇرلان نىعماتۋلين قاتاردىڭ استاناسى دوحا قالاسىندا ءوتىپ جاتقان پارلامەنتارالىق وداقتىڭ 140-شى اسسامبلەياسى الاڭىندا رەسەيدىڭ مەملەكەتتىك دۋما سپيكەرى ۆياچەسلاۆ ۆولودينمەن كەزدەستى دەپ حابارلايدى Qamshy.kz اقپارات اگەنتتىگى.

تاراپتار قازاقستان مەن رەسەي پارلامەنتارالىق ىنتىماقتاستىعىنىڭ وزەكتى ماسەلەلەرىن تالقىلاپ، ونىڭ زور الەۋەتى مەن ودان ءارى دامىتۋعا قاتىستى ورتاق ماقساتتاردى اتاپ ءوتتى.

كەزدەسۋ بارىسىندا نۇرلان نىعماتۋلين قازاقستان وسىعان دەيىن ەلىمىزدىڭ تۇڭعىش پرەزيدەنتى نۇرسۇلتان نازاربايەۆتىڭ رەسەي پرەزيدەنتى ۆلاديمير پۋتينمەن قول جەتكىزگەن كەلىسىمدەرىن جۇزەگە اسىرۋدى، سونداي-اق، رەسەيمەن ستراتەگيالىق ءوزارا ءىس-قيمىلدى نىعايتۋدى جالعاستىراتىنىنا توقتالدى. بۇل جولدا ءماجىلىس سپيكەرى ەكى ەلدىن پارلامەنتتەرى اعىمداعى جىلعى پارلامەنارالىق ءىس قيمىلدارعا باسا نازار اۋدارا وتىرىپ، ءوز ۇلەسىن قوسا بەرەتىنىنە سەنىم ءبىلدىردى.

ءوز كەزەگىندە، مەملەكەتتىك دۋما ءتوراعاسى ۆياچەسلاۆ ۆولودين رەسەي مەن قازاقستان اراسىنداعى قارىم-قاتىناستاردىڭ دامۋ قارقىنىنا كوڭىل ءبولىپ، بۇل باعىتتا ەكى ەل پرەزيدەنتتەرىنىڭ وراسان جۇمىستار اتقارىپ جاتقانىن ايتتى. ۆ.ءۆولوديننىڭ پىكىرىنشە، وسى رەتتە قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازاربايەۆتىڭ ءرولى وتە زور.

ن.نىعماتۋلين مەن ۆ.ۆولودين اعىمداعى جىلدىڭ 23-24 قىركۇيەگىندە نۇر-سۇلتان قالاسىندا وتەتىن ەۋرازيا ەلدەرى پارلامەنتتەرى سپيكەرلەرىنىڭ IV كەڭەسىنە دايىندىق ماسەلەلەرىن دە تالقىلادى. مەملەكەتتىك دۋما سپيكەرى اتاپ وتكەندەي، كوپتەگەن ەلدەردىڭ قىزىعۋشىلىعىن ەسەپكە الا وتىرىپ، كەڭەس جۇمىسىن الداعى ۋاقىتتا دا جۇزەگە اسىرۋ قاجەت. ۆ.ءۆولوديننىڭ پىكىرىنشە، بۇل اشىق ديالوگ اياسىندا كوپتەگەن ماڭىزدى ماسەلەلەردى تالقىلاۋعا جانە شەشۋگە مۇمكىندىك بەرەدى.

ۇسىنعان: فاريزا جومارت قىزى