المازبەك اتامبايەۆ: ءۇنىمدى ءوشىرۋدىڭ جالعىز جولى – مەنى ءولتىرۋ (ۆيدەو)

/uploads/thumbnail/20190408105544322_small.jpg

7 ءساۋىر كۇنى بىشكەكتە 2010 جىلعى ءساۋىر وقيعاسىندا قازا تاپقانداردى ەسكە الۋعا ارنالعان ميتينگ-رەكۆيەم ءوتتى. شارانى قىرعىزستاننىڭ الەۋمەتتىك-دەموكراتيالىق پارتياسى ۇيىمداستىردى. ميتينگ سپيكەرىنىڭ ءبىرى ەلدىڭ ەكس-پرەزيدەنتى المازبەك اتامبايەۆ بولدى.

سپيكەر رەتىندە قولىنا ميكروفون العان اتامبايەۆ قازىرگى پرەزيدەنتتىڭ كەي ارەكەتىن سىنعا الدى. سونىمەن قاتار ءىىم مەن ۇقك باسشىلارىنا زاڭدى بۇزباۋىن تالاپ ەتتى.

«بيىل 63-كە تولدىم. اۋليە ەمەسپىن، جاڭىلىستىم، حالىق الدىندا كىنالى بولدىم. ناعىز مۇسىلمان رەتىندە كىنامدى مويىندايمىن. شىن ءسوزىم – وسى. موينىڭا اۋىر كىنا ارتىلسا، ونى اشىق ايتا ءبىلۋىڭ كەرەك. حالىقتان ەمەس، قۇدايدان قورقامىن»، - دەپ مونولوگىن باستادى اتامبايەۆ.

«30 جىل بۇرىن قۇداي ماعان ۇيىپ-توگىپ بايلىق بەردى. قالانىڭ ءدال ورتالىعىنان مەشىت سالۋعا جەر تاپتىم. قالا سىرتىنداعى زاۋىتتاردى ساتىپ الدىم، باسشىلارمەن كەلىسىمگە كەلدىم. بار قيىندىقتى وتكەردىم. ال ءقازىر بايلىقتىڭ دا، بيلىكتىڭ دە كەرەگى جوق. قىرعىزستاندا تازا، ءادىل بيلىك ورناسا دەيمىن. جاستار بەكەر قان توكپەسە ەكەن. بۇرىندارى 2005 جىلعى ناۋرىز ريەۆوليۋسياسىن ۇرلاعان باكييەۆ دەپ ايتۋشى ەدى، ءقازىر جەەنبەكوۆتىڭ بيلىگى ءساۋىر ريەۆوليۋسياسىنا قول سۇعىپ جاتىر. مەن سوعان الاڭدايمىن»، - دەدى اتامبايەۆ.

ەكس-پرەزيدەنتتىڭ سوزىنشە، قازىرگى بيلىك كىناسىز ادامداردى تورعا قاماپ وتىر. «مەنى دە تۇرمەگە جاپپاق. ودان دا ولتىرە سالىڭدار، حالقىم ءدىن-امان بولۋى ءۇشىن ءوزىمدى قۇربان ەتۋگە دايىنمىن. مەن الداندىم. اينالامدا ءبارى «سوورونباي – سەنىڭ دوسىڭ» دەيدى، قالايشا الدانبايسىڭ؟ كونستيتۋسيا بويىنشا پرەزيدەنت ازاماتتاردىڭ ەركىندىگىن، قۇقىعىن شەكتەمەۋ كەرەك. ءبىراق جەەنبەكوۆ كونستيتۋسياعا قارسى شىعىپ جاتىر»، - دەدى تاعى.

«ەڭ باستىسى ەلىمىزدە تىنىشتىق بولسا ەكەن. الايدا بيلىك حالىققا قارسى كۇش قولدانسا، ءىس ناسىرعا شابادى. حالىقتىڭ قاھارى كۇشتى، ونى توقتاتۋ مۇمكىن ەمەس. سول ءۇشىن «توقتاڭدار!» دەگىم كەلەدى. مۇنى مەن ايتپاعاندا كىم ايتادى؟ مەن شىقپاعاندا كىم شىعادى؟ قاجەت بولسا، جالعىز ءوزىم «اق ۇيگە» بارامىن.

حالىق تاعى كوتەرىلە مە دەپ قورقامىن. «جەەنبەكوۆتى اتامبايەۆ اكەلدى» دەپ ايتا ما دەپ الاڭدايمىن. حالىق مەنى قاشىپ كەتەدى دەپ ويلايدى، ءبىراق مەنىڭ ءۇنىمدى ءوشىرۋدىڭ جالعىز جولى – ءولىم. تۇرمەدە دە ءۇنسىز جاتپاسپىن. قۇداي مەن حالىق الدىندا اقپىن. ەشقايدا قاشپايمىن، بۇل – مەنىڭ ەلىم، وتانىم!» - دەپ ءسوزىن قورىتىندىلادى اتامبايەۆ ميتينگىدە.

ايتا كەتەيىك، وتكەن اپتادا جوعارعى كەڭەس ەكس-پرەزيدەنتتەرگە قول تيگىزبەۋ قۇقىعىنان اجىراتۋ جونىندە زاڭ جوباسىن ءۇشىنشى وقىلىمدا ءبىر داۋىستان قابىلدادى.

بۇعان دەيىن كونستيتۋسيالىق پالاتا «ەكس-پرەزيدەنتكە قول تيگىزبەۋ قۇقىعىن الىپ تاستاۋ سوڭعى پرەزيدەنتكە يمپيچمەنت جاريالاۋ پروسەدۋرالارىنان جەڭىل بولماۋى كەرەك» دەگەن پىكىرىن بىلدىرگەن.

«پرەزيدەنتتىڭ كەپىلدىكتەرى جونىندەگى» زاڭعا وزگەرتۋ ەنگىزۋ بويىنشا جوعارعى كەڭەستەگى «ونۇگۇۇ-پروگرەسس» فراكسياسىنان يسحاك ماسالييەۆ پەن «رەسپۋبليكا – اتا ۇۋرتتان» كۋرمانكۋل زۋلۋشيەۆ ۇسىنىس بىلدىرگەن. پارلامەنت بۇل زاڭ جوباسىن بىلتىر جەلتوقسان ايىندا ءبىرىنشى وقىلىمدا كوپشىلىك داۋىسپەن ماقۇلداعان.

ەكس-پرەزيدەنتكە قول سۇعىلماۋدى الىپ تاستاۋ جونىندە العاش رەت 2018 جىلى بىشكەك جىلۋ ەلەكتر ورتالىعىنداعى اپاتتان كەيىن كوتەرىلدى. دەپۋتات ماسالييەۆ بۇعان تىكەلەي پرەزيدەنت المازبەك اتامبايەۆتىڭ قاتىسى بارىن ايتقان.

ۇسىنعان: گۇلىم جاقان

پىكىر قالدىرۋ

قاتىستى ماقالالار