نۇر-سۇلتان قالاسىنىڭ اكىمى باقىت سۇلتانوۆتىڭ نازارىنا!

بۇل ماقالاعا ارقاۋ بولعان ماسەلە – نۇر-سۇلتاننىڭ لاي، بالشىق كوشەلەرى...

ەلوردامىزدىڭ بالشىققا باتقان كوشەلەرى تۇرعىنداردى ابدەن شارشاتتى. Qamshy.kz اقپارات اگەنتتىگىنىڭ رەداكسياسىنا حابارلاسقان «ۆەنا ورامى» (جك «ۆەنسكيي كۆارتال» - رەد.) تۇرعىن ءۇي كەشەنىنىڭ ءبىر توپ تۇرعىندارى وزدەرىنىڭ جاعدايلارىن ايتىپ، رەداكسياعا  شاعىمداندى. ولاردىڭ ماسەلەلەرىن ەستىگەندە ەلوردانىڭ اتاۋى نۇر-سۇلتان بولىپ وزگەرگەنىنە راسىندا دا ىڭعايسىزدانىپ كەتەدى ەكەنسىڭ.

ق ر تۇڭعىش پرەزيدەنتىنىڭ ەسىمىن يەلەنگەن قالا تۇرعىندارىنىڭ زارىن ەستىگەن كوپشىلىك جاعالارىن ۇستادى. تەلەديداردان كورىپ جۇرگەن ەرتەگىدەگىدەي تاپ-تازا، اپ-ادەمى استانامىزدىڭ جاعدايى مۇلدە ءبىز ويلاعانداي ەمەس ەكەن.

«ۆەنا ورامى» تۇرعىن ءۇي كەشەنىنىڭ تۇرعىندارىنىڭ ايتۋىنشا، بالشىققا باتقان كوشەدە ءجۇرىپ-تۇرۋ مۇمكىن ەمەس، ءتىپتى، قاجەت كەزدە جەدەل جاردەم قىزمەتىن پايدالانۋ دا مۇڭ بولىپ وتىر ەكەن.

«ءبىر كۇنى 80 جاستاعى انامنىڭ جاعدايى كۇرت ناشارلاپ، جەدەل جاردەم شاقىرتقان بولاتىنبىز. تۇرعىن ۇيگە باراتىن جول جوق، سوندىقتان ول ۋاقىتىلى كەلمەدى. ءتىپتى «ۆەنا ورامى» تۇرعىن ءۇي كەشەنىنە كىرىپ-شىعاتىن دا جول جوق»، - دەپ شاعىمداندى تۇرعىنداردىڭ ءبىرى.

تاعى ءبىر ماسەلە – ۇيالى بايلانىس.  بۇل تۇرعىن ءۇي كەشەنىندە ۇيالى بايلانىس قىزمەتى دە دۇرىس ىستەمەيدى ەكەن.

ايتا كەتەيىك، «ۆەنا ورامى» - ەحرو قالاشىعىنا جاقىن ماڭدا ورنالاسقان جانە 2018 جىلى عانا قولدانىسقا بەرىلگەن جاڭا تۇرعىن ءۇي كەشەنى.

وسى ورايدا اتالمىش كەشەننىڭ تۇرعىندارى قالا اكىمدىگىنە ءوز شاعىمدارىن ايتۋدا.

«قۇرمەتتى نۇر-سۇلتان قالاسىنىڭ اكىمدىگى، ەلباسىنىڭ ەسىمىن يەلەنگەن قالانىڭ اتىنا وسىنشالىقتى كىر كەلتىرۋگە بولا ما؟! دۇرىس جول جوق. وقۋشىلاردىڭ مەكتەپتە بارىپ-كەلۋى – ۇلكەن مۇڭ. جەدەل جاردەمنىڭ كەلۋى قيىن. اسىرەسە، اياعى اۋىر كەلىنشەكتەردى اۋرۋحاناعا جەتكىزۋ كەزىندە «تەربەتىلگەن» جەدەل جاردەم كولىگىنە وتىرۋ قانشالىقتى اۋىر ءارى ءقاۋىپتى ەكەندىگى بارشامىزعا ءمالىم. مۇمكىن اكىمدىك قىزمەتكەرلەرى استانامىزدى تەك وزدەرىنىڭ كرەسلوسىندا تەربەتىلىپ وتىرعانداي سەزىنە ما ەكەن؟ جوق. ولاي ەمەس!

اكىمدىك قىزمەتكەرلەرى استانانىڭ بالاما جاعدايىن كورگىسى كەلسە، جك «ۆەنسكيي كۆارتال» جاققا ءبىر كەلىپ كەتسىن. تۇرعىندار قالاعا شىعار كەزدە كولىكتەرى لاي بولىپ شىعىپ، ۇلكەن كوشەلەردى لاستايدى ەكەن. بىزدەگى لاي، بالشىقتان  قالانىڭ تازالىعى ەكى ەسە زيان شەگىپ وتىر»، - دەپ دابىل قاعادى تۇرعىندار.

استانامىزعا قىدىرىپ كەلگەن شەتەلدىكتەر قالانىڭ وسىنداي سيقىن كورسە ۇيات، كۇلكىگە قالامىز.

«بۇكىل الەمدى تاڭ قالدىرىپ، ەXPO 2017 وتكىزگەنىمىز ەشكىمنىڭ ەسىنەن شىعا قويعان جوق. سول كورمە ورتالىعىنا جاقىن ورنالاسقان «ۆەنا ورامى» تۇرعىن ءۇي كەشەنىنەن پاتەر جالداعان بىرنەشە شەتەلدىك 2-3 ايدان كەيىن پاتەرلەرىن تاستاپ باسقا جاققا كوشىپ كەتتى. ونداي مىسالدار وتە كوپ. استانانىڭ باسقا اۋداندارىنا كوشسە، ول جاقتاعى ينفراقۇرىلىم ۆەنا ورامىنداعىداي ەمەس. مىقتى. جالپى شەتەلدىكتەر ۆەنا ورامىنىڭ ينفراقۇرىلىمىن كورگەندە نە ويلايدى ەكەن؟ "مىنا قازاقتار استاناسىنىڭ اتىن تۇڭعىش پرەزيدەنتتەرىنىڭ ەسىمىمەن «نۇر-سۇلتان» دەپ وزگەرتتى. تۇڭعىش پرەزيدەنتتەرىن كەرەمەت ماقتايدى. ال، ونىڭ اتىنداعى قالانىڭ سيقى مىناۋ" دەپ كۇلەتىن شىعار... نەتكەن ۇيات...» - دەيدى «ۆەنا ورامى» تۇرعىن ءۇي كەشەنىنىڭ تۇرعىندارى.

ولار ءوز شاعىمدارىن جەتكىزىپ، قالا اكىمدىگىنە تۇرعىن ءۇي كەشەنىندەگى جاعدايدى ءوز كوزىمەن كورىپ كەتۋگە ءوتىنىش ايتىپ وتىر.

ۇسىنعان: نازەركە لابيحان