شىمكەنتتە 30-عا جۋىق كوپقاباتتى تۇرعىن ءۇي ءالى كۇنگە كوگىلدىر وتىنعا قوسىلماعان. سونىڭ سالدارىنان ءبىرقاتار پاتەر يەلەرى ءقاۋىپتى بولسا دا گاز باللوندى قولدانىپ ءجۇر. بەتىن اۋلاق قىلسىن، ەگەر جازاتايىم وقىس جاعداي بولا قالعان جاعدايدا بىرنەشە باسپانانىڭ ك ۇلى كوككە ۇشۋى مۇمكىن. سوندا نە ىستەمەك كەرەك؟ ءبىر ەمەس،  بىرنەشە شاڭىراققا تابيعي گاز جەتكىزۋ قانشالىقتى قيىنعا سوعىپ تۇر. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىن نەگىزگە الا وتىرىپ حابارلايدى.

بىرنەشە تۇرعىن ءۇي 50ء-شى جىلدارى قولدانىسقا بەرىلگەن. سودان بەرى مۇنداعىلار گاز باللوندى جاسىرىپ بولسا دا، پايدالانادى. ونىڭ ءقاۋىپتى ەكەنى راس، ارينە. ءبىراق، امال قانشا. ەلەكتر ەنەرگياسىنا قىمبات اقشا تولەگەنشە، سىعىمدالعان گاز باللونىن پايدالانعان ارزان ولارعا. سوندىقتان تۇرعىندار جەتىسكەننەن ەمەس، جەتپەگەننەن وسىنداي قادامعا بارىپ وتىرمىز دەيدى. 

گۇلنارا وردابايەۆا قالانىڭ قاق ورتاسىندا تۇرسا دا ءالى كۇنگە گاز باللوندى پايدالانىپ جۇرگەنىن ايتادى. ونىڭ ءۇيى حاكىم ابايدىڭ ەسىمىمەن اتالاتىن نەگىزگى كوشەنىڭ بىرىندە ورنالاسقان. ءبىراق، سوندا دا كوگىلدىر وتىنعا قول جەتكىزە الماي كەلەدى. 11 پاتەرلى ەكى قاباتتى تۇرعىن ۇيدە كىلەڭ ەگدە كىسىلەر تۇرادى ەكەن. بارلىعىنىڭ پاتەرىندە سىعىمدالعان گاز باللونى بار. ءتىپتى، ارتىعىمەن اكەپ قويادى ەكەن. 

گۇلنارا وردابايەۆا، قالا تۇرعىنى: ءقاۋىپتى، ارينە. ەندى قايتەمىز؟ گاز تاۋسىلىپ قالعان كەزدە، تاماق ىستەمەي وتىرامىز با؟ سۆەت بولسا، قىمبات.

قالالىق توتەنشە جاعداي دەپارتامەنتى ماماندارىنىڭ سوزىنشە، شىمكەنتتە 30 شاقتى كوپقاباتتى تۇرعىن ءۇي كوگىلدىر وتىنعا قوسىلماعان. تۇرعىندار اس-اۋقاتتى ەلەكتر پەشىمەن دايىندايدى. ال، كوپشىلىگى كادىمگى گاز بالونىن پايدالانادى. 

سەيدالى قوسالييەۆ، قالا تۇرعىنى:  بومبا قۇشاقتاپ وتىرعان ادام سەكىلدى وتىرامىز. اللاعا سىيىنىپ، جارىلىپ كەتپەسە ەكەن دەپ. اسىرەسە، تارازدا جارىلعاندا قاتتى قورىقتىم. ەندى قۇداي ساقتاسىن دەپ وتىرمىز. 

كوپقاباتتى ۇيلەرگە گاز كىرگىزۋ اكىمدىك ءۇشىن وڭايعا تۇسپەسى بەلگىلى. ويتكەنى، بارلىق باسپانانىڭ زاڭدى جەكە قوجايىنى بار. ءارى ءۇي جەكەمەنشىك بولعاندىقتان قازىنادان قارجى قاراستىرۋ دا زاڭسىز. تەك، سول نىسانعا دەيىن عانا گاز قۇبىرىن تارتىپ بەرە الادى. قالعانى پاتەر يەسىنىڭ ەسەبىنەن جۇرگىزىلۋى ءتيىس. سول ءۇشىن قالا بيلىگى جاڭعىرتۋ باعدارلاماسىن قولعا الىپ وتىر.

نۇرلان جامانكوزوۆ، قالالىق ەنەرگەتيكا جانە كوممۋنالدىق شارۋاشىلىق باسقارماسى باسشىسىنىڭ ورىنباسارى: تەك قانا، ءبىر باعدارلاما بار. جاڭعىرتۋ بويىنشا، قالاداعى 4 اۋدان اكىمدىگى جۇمىس ىستەپ جاتىر. سول باعدارلاما ارقىلى مەملەكەتتەن قارجى ءبولىنىپ، نەسيە ارقىلى ۇيلەرگە گاز كىرگىزۋگە بولادى.

دەگەنمەن، اق جاعالىلار بۇل ماسەلەنى تەزدەتىپ شەشپەسە بولمايدى دەگەن جۇرت، ەكى جاقتى ايتىسىپ- تارتىسىپ جۇرگەندە اياق استى بالەگە ۇشىراپ قالۋىمىز دا مۇمكىن دەپ قورقىپ وتىر. سول ءۇشىن ءقاۋىپتىڭ الدىن العان ابزال دەيدى ولار.

ۇسىنعان: فاريزا جومارت قىزى