ءبىر ەمەس، التى كەلىنشەكتى «سۇيەم» دەپ الداپ كەلگەن الفونس جىگىت ىزدەستىرىلىپ جاتىر. ءبىرىن نەسيەگە كىرگىزىپ، ەكىنشىسىنە بالا تۋعىزىپ، ءۇشىنشىسىنىڭ جيعان-تەرگەنىن الىپ كەتكەن. تاقىرعا وتىرعان كەلىنشەكتەر يمانىنداي سەنىپ جۇرگەن ازاماتىنىڭ بالا-شاعاسى بار ەكەنىن تەك پوليسەيلەردەن ەسىتىپ مەڭ زەڭ كۇيدە. ازاماتتىق نەكەدەن ونىڭ بەس ايەلدەن تۋعان التى بالاسى جان-جاقتا. ال، ءبىر ەركەك ءۇشىن تۇكسىز قالعان انالار راميل بايراموۆتى جەر-كوكتەن ىزدەپ تاپپاي ءجۇر. بۇل تۋرالى Qamshy.kz اقپارات اگەنتتىگى ەۋرازيا ءبىرىنشى ارناسىنا سىلتەمە جاساپ حابارلايدى. 

يۋليا نيكولەنكو ازاماتتىق نەكەدەگى كۇيەۋىمەن ءۇش جىل بۇرىن الەۋمەتتىك جەلىدە تانىسقان. "اجىراسقانمىن، بالام بار، كومەكتەسىپ تۇرامىن" دەگەن جىگىتكە الدانىپ قالعانىن ايتادى. تىم قامقورلىق تانىتقانىنا ەسى اۋىپ، بىرگە تۇرۋعا كەلىسكەن. ءبىر ۇل تاۋىپ تا بەرگەن. ءىشى-باۋىرىنا كىرىپ، ابدەن سەنىمىنەن شىققان سوڭ، ءوز باسىنداعى پروبلەمالارىن ايتا باستادى دەيدى. شەشەم اۋىرىپ جاتىر، ءحالى مۇشكىل دەپ قوماقتى قاراجات سۇراپتى. ال،  كەلىنشەك بولسا قولىنان كەلگەن كومەگىن اياماعان.  

"شامامەن 500 مىڭ تەڭگە الدى مەنەن. تاعى اعامنىڭ كولىگىن ءبولىپ تولەيمىن دەپ ساتىپ العان. سول بويى نە كولىك، نە اقشاسى جوق. ءۇش جىل بولدى قاشىپ ءجۇر. مەن تۋعاندارىمنىڭ الدىندا قارا بەت بولىپ قالدىم"، - دەيدى ادانعان كەلىنشەكتىڭ ءبىرى يۋليا نيكولەنكو.

قارا بەت بولعان تەك يۋليا نيكولەنكو عانا ەمەس. قۇلاي ءسۇيدىم دەگەن سوزىنە قۇلاعان تاعى بەس كەلىنشەك بار. بارىنە بالا تۋعىزىپ، اقشالارىن العان سوڭ ءىزىن سۋىتقان. الدانعان ايەلدەر ءبىر-بىرىن الەۋمەتتىك جەلى ارقىلى تاپقان. بىرىنە ءاميرمىن، ەكىنشىسىنە ءساميرمىن دەپ وتىرىكتى ۇيىپ-توككەن. ءتىپتى، ءبىرى شىمكەنتتىڭ تۇرعىنى. انەل ورازبايەۆا دا كوزىن ماحابباتپەن بايلاعان ازاماتقا اپەرگەن نەسيەسىن تولەپ، ءبىر ۇلىن قۇشاقتاپ قالعان. 

"قىزداردى ىزدەگەن مەن. ءقازىر التى كەلىنشەكپىز. ونىڭ 2017 جىلى ەكى بالاسى ەكى ايەلدەن، 2018 جىلى تاعى ەكى ايەلدەن ەكى بالاسى تۋىلدى. بارىمىزگە ايتىپ كەلگەن ءبىرىنشى جارىنان 8-9 جاستاعى ەكى بالاسى بار"، - دەيدى الدانعا كەلىنشەكتىڭ ءبىرى انەل ورازبايەۆا.

سوندا ەر ازاماتتىڭ بەس ايەلدەن التى بالاسى بار. سابيلەرىن قۇشاقتاپ قالعان كەلىنشەكتەر بۇرىن بىر-بىرىنە كۇندەس بولسا، ەندى مۇڭداس. سەبەبى، بولىسە الماي جۇرگەن سۇيىكتىلەرىن ىزدەۋگە كىرىسكەن. اكەلىك مىندەتىن مىندەتتەۋ ءۇشىن ەمەس، نەسيەلەرىن تولەپ، كولىكتەرىن قايتارۋ. ال امير، سامير دەپ ءوزىن سان ەسىممەن اتاعان «دون جۋان» وسى. شىن اتى - راميل بايراموۆ ەكەن. 

"التى بىردەي كەلىنشەك جەر-كوكتەن ىزدەگەن راميل بايراموۆتىڭ شەشەسى الماتىنىڭ قاق ورتاسىنداعى وسى ۇيدە تۇرادى. ءبىراق، اناسى بىزگە جاۋاپ بەرمەك تۇگىلى ەسىگىن دە اشپادى. ايتۋىنشا، ۇلىنىڭ زاڭدى نەكەدە ەكى بالاسى بار. سولارمەن بىرگە تۇرادى. ال، جولدان قوسىلعان كەلىندەرىنىڭ ءبىرىن دە تانىمايدى ەكەن". 

ءبىراق، الدانعان كەلىنشەكتەر ەكس-ەنەسىمەن تانىسقانىن، ارالاسقانىن ايتادى. ءتىپتى، قوڭىراۋ شالىپ، وتباسىنداعى اۋىر جاعدايلارىمەن بولىسەتىن بولعان. ءقازىر وبلىستىق پوليسيا دەپارتامەنتىنە بەس ايەلدەن ارىز تۇسكەن.

«قازىرگى تاڭدا ق ر قك 190 بابىنا ياعني الاياقتىق فاكتىسى بويىنشا سوتقا دەيىنگى تەرگەۋ امالدارى ءجۇرىپ جاتىر. سونىمەن قاتار ءۇش ارىزدى ءبىر وندىرىسكە بىرىكتىرۋ قاراستىرۋدا. سونىمەن قاتار شىمكەنت قالاسىندا دا بۇل ازاماتقا قاتىستى ارىز تۇسكەنى انىقتالدى»، - دەپ مالىمدەدى الماتى وبلىستىق پوليسيا دەپارتامەنتى باسپا ءسوز قىزمەتىنىڭ رەسمي وكىلى سەرىك ۇپييەۆ.

سەزىمنىڭ جەتەگىندە كەتكەن ايەلدەر ەكس-كۇيەۋىنىڭ ءتۇرىن باسقالارى جاتتاپ السا دەيدى. ويتكەنى، وزدەرى قۇساپ بوتەننىڭ نەسيەسىن تولەپ، جالعىزباستى انا اتانعاندارىن قالامايدى.

ۇسىنعان: نازەركە لابيحان