«اق جول» پارتياسىنىڭ اتىنان ءوز كانديداتۋرالارىن ۇسىنعان پرەزيدەنتتىككە ۇمىتكەرلەر قاتارىنا ءماجىلىس دەپۋتتاتتارى قوسىلدى، دەپ حابارلادى پارتيانىڭ باسپا ءسوز قىزمەتى Qamshy.kz اقپارات اگەنتتىگىنە.

«اق جول» پارتياسىنىڭ اتىنان وزدەرىنىڭ كانديداتۋرالارىن ۇسىنعان پرەزيدەنتتىككە ۇمىتكەرلەر قاتارىنا ءماجىلىستىڭ 5 جانە 6 شاقىرىلىمىنىڭ دەپۋتتاتتارى قوسىلدى – بانكير، اقتوبەلىك دانيا ەسپايەۆا جانە نۇر-سۇلتان قالاسىنداعى قازاقستان قۇرىلىسشىلار وداعىنىڭ باسشىسى تالعات ەرعالييەۆ. ولار دا وزدەرىنىڭ كانديداتۋرالارىن قولداۋدى سۇراپ پارتيالاستارىنا ارنايى بەينەۇندەۋ جولدادى.

ەسكە سالا كەتەيىك، پارتيانىڭ سايلاۋعا قاتىسۋى جانە ۇمىتكەرلەردى ۇسىنۋ تۋرالى شەشىم وسى جىلدىڭ 24 ساۋىرىندە وتەتىن سەزدە قابىلدانادى. 13 ساۋىردەگى «اق جول» ورتالىق كەڭەسىنىڭ پلەنۋمى پرەزيدەنتتىك سايلاۋعا ۇمىتكەرلەردى انىقتاي المادى.

بۇدان بۇرىن پارتيا مۇشەلەرىنە وزدەرىنىڭ ۇندەۋلەرىن وسكەمەن قالالىق ءماسليحاتىنىڭ دەپۋتاتى قۋات راحيمبەردين جانە تاراز قالالىق ءماسليحات دەپۋتاتى اسان قوشمامبەتوۆ، اتىراۋدان سەرىك ەرۋبايەۆ، سونداي-اق ءوزىنىڭ شەشىمى جونىندە 13 ءساۋىر كۇنى وتكەن ورتالىق كەڭەستىڭ پلەنۋمىندا مالىمدەگەن بەلگىلى زاڭگەر ەۆگەنيي كينسەل دە جولداعان بولاتىن.

بۇگىن دانيا ەسپايەۆانىڭ (ءماجىلىس دەپۋتاتى، اقتوبەدەگى ەڭ ءىرى بانكتەردىڭ فيليالدارىن بىرنەشە جىلدار بويى باسقارعان) جانە تالعات ەرعالييەۆتىڭ (ءماجىلىستىڭ 5 شاقىرىلىمىنىڭ دەپۋتاتى، قازاقستان قۇرىلىسشىلار وداعىنىڭ ءتوراعاسى) بەينەۇندەۋلەرى جاريالاندى.

پارتيانىڭ زاڭ قىزمەتىنىڭ حابارلاۋىنشا، ۇمىتكەرلەردىڭ كانديداتۋرالارىن ۇسىنۋ ءتىزىمى وسىمەن ءتامامدالدى.

ۇسىنعان: نازەركە لابيحان