نۇر-سۇلتان قالاسىنداعى جاتاقحانالاردىڭ بىرىنەن ءورت شىعىپ، 350-دەن استام ادام ەۆاكۋاسيالانىپ، 20-دان استام ادام مەديسينالىق كومەككە جۇگىندى. ول تۋرالى جۋرناليستەرگە ق ر ءىىم توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەتوۆ حابارلادى دەپ جازادى Qamshy.kz اقپارات اگەنتتىگى نۇر-سۇلتان قالاسى تجد باسپا ءسوز قىزمەتىنە سىلتەمە جاساپ.

«2 مامىر كۇنى ساعات  10:39-دا نۇر-سۇلتان قالاسىنىڭ توتەنشە جاعدايلار دەپارتامەنتىنە دوسمۇحامەد ۇلى كوشەسىندە ورنالاسقان بەس قاباتتى جاتاقحانادان ءورت شىققانى تۋرالى دابىل قاعىلدى. ءورت ەكىنشى قاباتتاعى اۋماعى 20 كۆ.م بولاتىن بولمەدەن شىققان. ءورت سوندىرۋشىلەر جالىندى  11.05-تە اۋىزدىقتاپ، 11.15-تە تولىعىمەن ءسوندىردى»، - دەدى نۇراحمەتوۆ.

اۆتوباسپالداقتىڭ كومەگىمەن عيماراتتان 32 ادام قۇتقارىلدى. «جاتاقحانادان 350 ادام وزدىگىمەن ەۆاكۋاسيالاندى، مەديسينالىق كومەككە 20-دان استام ادام جۇگىندى، ونىڭ 14ء-ى بالا»، - دەپ ءتۇسىندىردى ءىىم وكىلى.

ءورت سوندىرۋگە قالالىق تج دەپارتامەنتىنەن بارلىعى 66 ادام، 18 ءورت ءسوندىرۋ تەحنيكاسى جۇمىلدىرىلدى. زارداپ شەككەندەرگە جەدەل مەديسينالىق جانە پسيحولوگيالىق كومەك كورسەتۋ ءۇشىن «اپاتتار مەديسيناسى ورتالىعىنىڭ» قىزمەتكەرلەرى بولدى.

جەرگىلىكتى اقپارات اگەنتتىكتەرىنىڭ حابارلاۋىنشا، وقيعا ورنىنا بارعان قالا اكىمى باقىت سۇلتانوۆ عيماراتتىڭ جاعدايىن انىقتاپ، زارداپ شەككەندەرگە كومەكتەسۋدى تاپسىرعان. ءورتتىڭ سەبەبى انىقتالۋدا.