"گولوس دەتي" بايقاۋىنىڭ ءفيناليسى ەرجان ماكسيم مەن ونىڭ اناسى "Talk like" باعدارلاماسىنا سۇحبات بەردى دەپ جازادى Qamshy.kz اقپارات اگەنتتىگى. 

— جەڭىسكە دەگەن سەنىم قانشا پايىز بولدى؟ 

ەرجاننىڭ اناسى: سايىس بارىسىندا تالىمگەرى ۇلكەن ءۇمىت ارتتى. ءبىز دە جەڭىستەن ءۇمىتىمىز بولدى. ءبىراق فينال كەزىندە ەرجان كەشكە دەيىن دايىندىق كەزىندە بولدى. كەي قاتەلىكتەرى بولدى، نوتاسىنا جەتە الماي قالعان جەرلەرى بولدى. سول كەزدە ىشتەي دۇرىس ايتا الماي قالدى ما دەپ ويلادىق. جەڭىسكە دەگەن سەنىم 100 پايىز بولدى دەپ ايتا المايمىن. شامامەن 70-80 پايىز سەنىمدى بولدىق. سەبەبى قارسىلاستار وتە تالانتتى ەدى. 

— "گولوس دەتي" باعدارلاماسى ءادىل وتپەدى" دەگەن رەسەيلىك تانىمال جۇلدىزدار بولدى. قالاي ويلايسىز، سۋپەر فينال ءادىل ءوتتى مە؟

ەرجاننىڭ اناسى: –ءادىل ءوتتى دەپ ويلايمىن. سەبەبى، ءبىز كىم قالاي داۋىس بەرگەنىن بىلە المايمىز عوي. مەن سول كەزدە بۇل تۋرالى ويلاي المادىم. سەبەبى ەرجان ورىنداعان ءان وتە كۇردەلى بولدى. ديماشتىڭ داۋىس تونىندا ايتتى. ۇيىمداستىرۋشىلار دا تاڭعالدى. مەن فينال كەزىندە داۋىسىنا زاقىم كەلمەسە ەكەن دەپ وتىردىم. ناتيجەنى ايتقان كەزدە "اتتەگەن-اي" دەگەن كەز دە بولدى. ويتكەنى، ەرجان بار كۇش جىگەرىمەن ءوز دەڭگەيىندە ايتىپ شىقتى. 

— باعدارلامادا جەڭىسكە جەتكەن قىزدىڭ اناسى السۋ — تانىمال ءانشى، ال اكەسى — قالتالى بيزنەسمەن. ونىڭ جەڭىسكە جەتۋىنە قوماقتى قاراجاتتىڭ كومەگى بولعان جوق پا؟ قالاي ويلايسىز؟

ەرجاننىڭ اناسى: –السۋ وتە قاراپايىم ايەل. قىزى دا سونداي. اقشام بار دەپ شالقايىپ جۇرەتىن ادامدار بولادى عوي. ءبىز بىرگە تاماقتانىپ جۇردىك. مۇمكىن حالىق شىنىمەن السۋدىڭ قىزىنا داۋىس بەرگەن بولار. 

— ماكسيم گالكين "مۇنداي باعدارلامالارعا ءوز بالالارىمدى قاتىستىرماس ەدىم. سەبەبى بالالارىمنىڭ مۇنداي ادىلەتسىزدىككە دۋشار بولعانىن قالامايمىن" دەدى. ءسىز "ەرجاننىڭ ساعىن سىندىرىپ الدىم -اۋ" دەپ وكىنبەدىڭىز بە؟

ەرجاننىڭ اناسى: –جوق، ونداي ويدا بولمادىم. سەبەبى مەن حالىقتىڭ ريزا بولعانىن كوردىم. سەبەبى كوپ ادامنىڭ تۇرىپ، قول شاپالاقتاپ جىلاعانىن دا بايقادىم. ەرجان دا جىلادى. جىلاپ تۇرىپ ءان ايتتى. مەن بالاممەن ءتۇرلى بايقاۋلارعا باردىم. مەن ۇلىمنىڭ قينالىپ ءان ايتقانىن كوردىم، سەزىندىم. ال حالىقتىڭ ۇلكەن ريزاشىلىقپەن تىك تۇرىپ، قول شاپالاقتاعانىن كورىپ، ءوزىمدى جۇباتتىم. 

— ناتيجە شىقتى. قورىتىندى انىقتالدى. سول كەزدە ەرجاننىڭ ايتقان العاشقى ءسوزى قانداي بولدى؟

ەرجاننىڭ اناسى: –ەرجاندى ءبىز كورمەدىك. ءبىزدى شىعارمادى عوي.  ءبارى اياقتالعان سوڭ كوردىك. ول قوبالجىپ، جىلاپ، كوزى مولدىرەپ بىزگە قاراپ تۇردى. مەن ەندى قاتالداۋ قارايمىن. ەرجاننىڭ ادەتى ول ادامنىڭ ءبىرىنشى كوزىنە قاراپ الادى. سول جەردە اكەسى دە بولدى. ءبارىمىز قولداۋ كورسەتتىك. ارينە، وڭاي تيگەن جوق. شىققان كەزدە ەرجاننىڭ داۋسى قارلىعىپ، كىشكەنە اۋىرىپ قالىپتى. بارلىعىمىز ءبىر قۇشاقتاسىپ جىلاپ الدىق. 

— ەرجان، باس جۇلدە الماعانىڭا مۇڭايعان ءساتىڭ بولدى ما؟

ەرجان: –نەگىزى باس جۇلدە الماعانىم دا جاقسى بولدى. ەگەر مەن باس جۇلدە السام، ولار مەنى قۇتتىقتاپ قويا سالاتىن ەدى. ال باس جۇلدە الماعان كەزىمدە، كوپ ادام قولداۋ ءبىلدىرىپ، قۇتتىقتاپ جاتتى. بۇل مەنى قۋانتتى. قولداپ، قولپاشتاعان ادامدارعا العىسىمدى ايتامىن. كەيىن اللا پۋگاچيەۆامەن كەزدەستىك. ول ءوزىنىڭ اقىلىن ايتتى. سونداي-اق ول مەنى تۇسىندە الەمدىك جۇلدىز بولىپ جاتقانىمدى كورگەن. 

— ميلادزە سىزدەردى قالاي شىعارىپ سالدى؟

–قيماي قوشتاستى دەسەك تە بولادى. قازاقستاندا بىرنەشە كونسەرتى بولادى ەكەن. سوعان بايلانىستى ءوز ۇسىنىستارىن ايتتى. سوسىن ەڭ قىزىعى، ميلادزە ازداپ قازاقشا سويلەي باستادى. بىردە ەرجانعا ول "اينالايىن" دەپ ايتقان. بۇل تۋرالى ماعان ەرجان ايتىپ بەردى. كەيىن "قايىرلى كۇن، ەتو دوبرىي دەن؟" دەپ سۇرادى. مەن "ءيا، مۇنى قايدان بىلەسىز" دەپ سۇرادىم. ال ول "باتىرحان ۇيرەتتى" دەپ جاۋاپ بەردى.   

دايىنداعان: اسەل بولات قىزى