قازاقستان كوممۋنيستىك حالىق پارتياسىنىڭ ۇمىتكەرى جامبىل احمەتبەكوۆتى 6 مامىردا ورتالىق سايلاۋ كوميسسياسى پرەزيدەنت سايلاۋىنا كانديدات رەتىندە تىركەدى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. 

سايلاۋ كوميسسياسىنىڭ دەرەگىنە قاراعاندا، احمەتبەكوۆ قازاقستاننىڭ 16 وڭىرىنەن 138 294 قول جيناعان. كوميسسيا ونىڭ 135 506-سىن ەسەپكە العان. قازاقستان پرەزيدەنتتىگىنە كانديدات بولۋ ءۇشىن ۇمىتكەر 118 140 قول جيناۋى ءتيىس.

احمەتبەكوۆ قول جيناۋدى 29 ساۋىردە باستاپ، 4 مامىردا اياقتاعان. كانديدات "بۇل جولعى سايلاۋدا جەڭەتىنىمەن سەنەمىن" دەيدى.

— سايلاۋعا قاتىسۋدا تاجىريبەم بار. بۇل جولعى سايلاۋدا ءوزىمدى تانىستىرۋ كامپانياسىن جۇرگىزبەيمىن. حالىق مەنى تانيدى. بۇل جولى الەۋمەتتىك ماسەلەلەرگە دەن قويامىز، - دەدى احمەتبەكوۆ.

جامبىل احمەتبەكوۆ بۇعان دەيىن دە - 2011 جىلى وتكەن پرەزيدەنت سايلاۋىنا قاتىسقان. سول جىلعى سايلاۋدا نازاربايەۆ - 95،55، احمەتبەكوۆ 1،36 پايىز داۋىس العان.

احمەتبەكوۆ 2012 جىلدىڭ 20 قاڭتارىنان بەرى - ءماجىلىس دەپۋتاتى.

بۇعان دەيىن وسك "نۇر وتان" پارتياسى سايلاۋعا ۇمىتكەر رەتىندە ۇسىنعان قازاقستاننىڭ قازىرگى پرەزيدەنتى قاسىم-جومارت توقايەۆ پەن "ۇلى دالا قىراندارى" قوزعالىسى ۇسىنعان ۇمىتكەر سادى-بەك تۇگەل، "قازاقستاننىڭ كاسىپوداقتار فەدەراسياسى" ۇسىنعان امانگەلدى ءتاسپيحوۆتى، "اق جول" پارتياسى ۇسىنعان دانيا ەسپايەۆانى، "اۋىل" پارتياسى ۇسىنعان تولەۋتاي راقىمبەكوۆتى پرەزيدەنتتىككە كانديدات رەتىندە تىركەگەن.