ءوزىن-وزى جاريالاعان دونەسك جانە لۋگانسك حالىق رەسپۋبليكالارىندا رەسەيلىك ءتولقۇجات العان ۋكراينا ازاماتتارى الەۋمەتتىك جاردەماقىلار مەن زەينەتاقىلارىنان ايىرىلۋى مۇمكىن. ول تۋرالى ارداگەرلەر ىستەرى جونىندەگى مينيستر يرينا فريز ءوزىنىڭ Facebook پاراقشاسىندا حابارلادى دەپ جازادى Qamshy.kz اقپارات اگەنتتىگى ۋكراينالىق espreso.tv سايتىنا سىلتەمە جاساپ.
«ۋكراينا تاراپىنان الەۋمەتتىك جاردەماقىلار نەمەسە زەينەتاقى الۋعا بايلانىستى بەنەفيسيار مارتەبەسىن بەرۋدەن باس تارتۋ ءۇشىن رەسەي ءتولقۇجاتتارىن العان ازاماتتاردى دەرەكتەر بازاسىنا قوسۋ تۋرالى ۇسىنىستى وڭدەۋدى باستادىق»، - دەپ جازدى يرينا فريز.
بۇدان بۇرىن ۋكراينانىڭ پرەمەر-مينيسترى ۆلاديمير گرويسمان، ۋكراينانىڭ مينيسترلەر كابينەتى دونباسستا رەسەي بەرگەن ءتولقۇجاتتاردى زاڭسىز دەپ تانۋ تۋرالى شەشىم شىعاراتىنىن حابارلاعان بولاتىن.
الايدا رەسەي پرەزيدەنتىنىڭ باسپا ءسوز حاتشىسى دميتريي پەسكوۆ، دونباسستىڭ تۇرعىندارىنا ءتولقۇجات بەرۋدى جالعاستىراتىنىن، ۋكراينا تاراپىنان مۇنى زاڭسىز دەپ تانۋى جاعدايدى وزگەرتپەيتىنىن اتاپ ءوتتى.
ەستەرىڭىزگە سالا كەتسەك، رەسەي پرەزيدەنتى ۆلاديمير پۋتين وسى جىلدىڭ 24 ساۋىرىندە دونەسك جانە لۋگانسك حالىق رەسپۋبليكالارىنا رەسەيلىك ءتولقۇجاتتاردى جەڭىلدەتىلگەن تۇردە بەرۋ تۋرالى جارلىق شىعارعان بولاتىن. قۇجات رەسمي تۇردە جاريالانعاننان كەيىن بىردەن كۇشىنە ەندى.
ۋكراينانىڭ پرەزيدەنتى ۆلاديمير زەلەنسكيي، ماسكەۋدىڭ بۇل قادامىنا «تەز ءارى اقىلدى» جاۋاپ قايتارامىن دەپ ۋادە ەتكەن. ال پەتر پوروشەنكو بولسا ۋكراينانىڭ ءتولقۇجاتى الەمدى ساياحاتتاۋ كەزىندە رەسەيلىك ءتولقۇجاتتىڭ الدىن ورايتىنىن ايتتى.
دايىنداعان: مارجان سابەت
پىكىر قالدىرۋ