پرەزيدەنتتىككە ۇمىتكەر كانديداتتاردىڭ ءبىرى –  دانيا ەسپايەۆا ۇگىت-ناسيحات جۇمىسىن الماتىداعى "اقساي-نان" زاۋىتىنان باستادى دەپ حابارلايدى Qamshy.kz اقپارات اگەنتتىگى.

11 مامىر كۇنى كەشكى ساعات 18:00-دە پرەزيدەنتتىككە ۇمىتكەر رەتىندە رەسمي تىركەلگەن، وسك ءتوراعاسى قولىنان «كانديدات» كۋالىگىن العان ازاماتتار سايلاۋالدى ۇگىت-ناسيحات جۇمىستارىن باستاپ كەتتى. ولار اينالاسى ءبىر اي كولەمىندە ەلدى ارالاپ، اعايىن-جۇرتپەن كەزدەسىپ، تالاپ-تىلەكتەرىن تىڭدايدى، ساۋالدارىنا جاۋاپ بەرەدى. سايلاۋ كۇنى ءوزىنىڭ كانديداتۋراسىن قولداۋعا شاقىرادى.

دەرەككوزدەرىنە سۇيەنسەك، «اق جول» دەموكراتيالىق پارتياسى اتىنان پرەزيدەنتتىككە ۇمىتكەر رەتىندە ۇسىنىلعان دانيا ەسپايەۆا ءوزىنىڭ العاشقى ساپارىن الماتىدان، ناقتىلاي كەتسەك، "اقساي-نان" ناۋبايحاناسىنان باستادى. پرەزيدەنتتىككە ۇمىتكەر دانيا ەسپايەۆا مەن ءماجىلىس دەپۋتاتى ازات پەرۋاشيەۆ باستاعان شتاب وكىلدەرى الماتىلىق جۇمىسشىلارمەن كەزدەسىپ، زاۋىتتىڭ جۇمىسىمەن تانىستى. تاۋلىگىنە 150 توننا نان پىسىرەتىن بۇل زاۋىتتا ءقازىر 1500 ادام جۇمىس ىستەيدى. ولاردىڭ ءارقايسىسىنىڭ ءوز تىلەكتەرى بار. شەشىلمەي جۇرگەن، شەشە الماي جۇرگەن ماسەلەلەرى دە از ەمەس.

«اق جول» قدپ باسپا ءسوز قىزمەتىنە سۇيەنسەك، مەملەكەت تاريحىنداعى تۇڭعىش ايەل-ۇمىتكەر جانە رەسپۋبليكاندىق شتابتىڭ جەتەكشىسى ازات پەرۋاشيەۆ باستاعان ونىڭ جاقتاۋشىلارى كاسىپورىن ۇجىمىنا سايلاۋالدى باعدارلامانىڭ باستى تۇستارىن ايتىپ ءوتتى: بيزنەستى قولداۋ، ۇلتتىق تاۋەلسىزدىك جانە جەمقورلىقپەن كۇرەس.

كاسىپورىن ۇجىمى ەسپايەۆانىڭ الەۋمەتتىك ءونىم كاسىپكەرلەرىنە (تاماق ونىمدەرى، كيىم-كەشەك، بالالارعا ارنالعان تاۋارلار) ارنالعان سالىقتى تومەندەتۋ، بيزنەس نەسيەلەۋدىڭ ۇستەماقىسىن تومەندەتۋ جانە نەسيە مەرزىمىن ۇزارتۋ تۋرالى باعدارلامالىق ۇسىنىستارىنا ريزالىعىن ءبىلدىردى.

ءدانيا ەسپايەۆا مەن ونىڭ شتاب مۇشەلەرى كەزدەسۋ بارىسىندا قويىلعان سۇراقتارعا جاۋاپ بەردى.

كاسىپورىن جۇمىسكەرلەرىنىڭ كوپ بولىگى ايەلدەردەن تۇراتىندىقتان كەزدەسۋدە زەينەتكەرلىك جاسقا بايلانىستى ساۋالدار قويىلدى. سونىمەن قاتار، قالادا تىركەۋى جوق كوپبالالى وتباسىلاردىڭ جاردەماقى جانە باسپانا الۋ مۇمكىنشىلىگى تۋرالى ءسوز قوزعالدى. كومبيناتتا ونداي انالاردىڭ سانى كوپ ەكەن – ولار ءۇي جالداعانىمەن، ءۇي قوجايىندارى ولاردى تىركەۋگە العىسى كەلمەيدى.

«بۇل ماسەلەنى قاراستىرۋعا ۋادە بەرەمىن. كوپتەگەن كاسىپورىنداردىڭ جۇمىسكەرلەرى قالادا تىركەلمەگەن اۋىلدىڭ ازاماتتارى. ولاردىڭ سانى – ۇجىمنىڭ جارتىسى دا بولۋى مۇمكىن. ەگەر ولاردى جۇمىستان شىعارساق – كاسىپورىنداردىڭ جۇمىسى توقتايدى»، - دەدى ەسپايەۆا ءوز كەزەگىندە.

سايلاۋالدى شتاب وكىلدەرى 12 مامىر كۇنى الماتىداعى «جىبەك جولى» بازارىندا بولدى. ءبىرشاما قيىن ماسەلەسى بار بازارداعى ساۋداگەلەر كەزدەسكەن قيىندىقتارى تۋرالى ايتىپ، بازارداعى كەزدەسۋ بىرنەشە ساعاتقا سوزىلدى. ساۋداگەرلەر ءوز تالاپ-تىلەكتەرىن دانيا ەسپايەۆا مەن ونىڭ شتابىنا حات تۇرىندە جەتكىزدى.

ودان كەيىن كەزدەسۋ الماتىداعى 65 جىلدىڭ تاريحى بار «تەمىر-بەتون» زاۋىتىندا جالعاستى. شتاب وكىلدەرى 500-گە جۋىق جۇمىسشىسى بار زاۋىتتىڭ جۇمىسىمەن تانىسىپ، ەڭبەككەرلەرمەن كەزدەستى. مۇندا دا جۇمىسشىلار زەينەت جاسى، الەۋمەتتىك كومەك، ءتۇرعىن-ۇي جانە جەر كەزەگى سەكىلدى ءبىرقاتار ماسەلەلەردى ءسوز ەتتى. وزدەرىنىڭ وتىنىشتەرىن ۇمىتكەر دانيا ءماديقىزىنا اماناتتادى.

ءارى قاراي دانيا ەسپايەۆانىڭ سايلاۋالدى ۇگىت-ناسيحات جۇمىسى تالدىقورعاندا جالعاساتىن بولادى.

ەستەرىڭىزگە سالا كەتسەك، دانيا ەسپايەۆا – تاۋەلسىز قازاقستان تاريحىنداعى پرەزيدەنتتىككە ۇمىتكەر رەتىندە تىركەلگەن تۇڭعىش ايەل كانديدات. ول ءماجىلىس دەپۋتاتى، «اق جول» پارتياسىنىڭ وكىلى.

پرەزيدەنت سايلاۋى 2019 جىلدىڭ 9 ماۋسىمى كۇنى وتەدى.

ۇسىنعان: ماقپال سەمباي