قازاقستان رەسپۋبليكاسىنىڭ كەزەكتەن تىس پرەزيدەنت سايلاۋىنا قاتىسىپ جاتقان ۇمىتكەرلەردىڭ ءبىرى ءامىرجان قوسانوۆ حالىقتان، ناقتىلاي ايتساق، قالتالى ازاماتتاردان كومەك سۇرادى دەپ حابارلايدى Qamshy.kz اقپارات اگەنتتىگى.
ەل اراسىنا اتى تانىمال بولىپ ۇلگەرگەن بەلسەندى كانديدات ءوزىنىڭ الەۋمەتتىك جەلىدەگى پاراقشاسىنا جازبا جاريالاپ، سايلاۋدىڭ سالماعى قالتاسىنا اۋىر ءتۇسىپ جاتقانىن، قالتالى ءھام تىلەۋلەس ازاماتتار بولسا كومەك بەرۋىن سۇرادى. جازبا استىنا ول ءوزىنىڭ بانكتەگى ەسەپ-شوتتارىن قالدىرعان.
وقىرمانعا تۇسىنىكتى ءارى قولايلى بولۋى ءۇشىن كانديدات جازباسىنىڭ ءماتىنىن تولىق بەرۋدى ءجون كوردىك.
"سايلاۋعا تۇسەمىن دەپ شەشكەندە وزىمە ەرەكشە اسەر ەتكەن ەكى نارسە بولدى.
ءبىر زەينەتكەر اعامىز "ءبىر پەنسيامدى بەرەمىن!"، ال ءبىر ستۋدەنت "پاتەردە تۇراتىن جەتى جىگىت ءۇش مىڭ تەڭگەدەن قوسىپ، 21 مىڭ تەڭگە بەرسەك، از بولماي ما؟"، - دەپ ەدى. "ەە، مەن دە كەرەك ەكەنمىن عوي ەلىمە!"، - دەپ ءبىر جاساپ قالىپ ەدىم.
مىنە، سايلاۋ ناۋقانى باستالدى!
سويتسەم، قارجى ماسەلەسى شەشۋشى فاكتوردىڭ ءبىرى ەكەن!
ءوزىمنىڭ جيعان-تەرگەنىم بار، قارجىلى جورا-جولداستار دا بار. "ءبىر ايلىق قانا ناۋقانعا سول جەتكىلىكتى بولىپ قالار" دەپ ويلاعانمىن.
سويتسەم، سايلاۋدىڭ سالماعى باسقاشا ەكەن!
ناسيحات ماتەريالدارىن باسىپ-شىعارۋ، ولاردى تاراتۋ، وبلىستارداعى شتابتاردى قولداۋ، مەنىڭ جانە سەنىمدى وكىلدەرىمنىڭ ءىسساپارلارى، كەزدەسۋ وتەتىن عيماراتتاردى جالعا الۋ، ناسيحاتشى جانە ەرتەڭگى كۇنى باقىلاۋشى بولاتىن ازاماتتاردىڭ قىزمەتى دەگەن قوماقتى قارجىنى قاجەت ەتەتىن شارۋا شاش ەتەكتەن ەكەن. سول سەبەپتى اۋداندىق شتابتاردى قۇرۋ قيىن بوپ جاتىر.
سوندىقتان دا زاڭعا سايكەس اشىلعان ارنايى ەسەپ-شوتىمدى جاريالاپ وتىرمىن.
ونسىز دا قينالىپ جۇرگەن اعايىنعا قولقا سالعانىم ىڭعايسىز بولار. سوندىقتان نەگىزىنەن قالتالى ازاماتتارعا ءوتىنىش جاساپ وتىرمىن.
وسىندا ءبىراز اعايىن ەلىمىزدىڭ تۇكپىر-تۇكپىرىنە شاقىرىپ جاتىر. وعان راحمەت! ءبىراق، بارشا ءوڭىردى شارلاپ شىعۋعا وسى قارجى جاعى قولبايلاۋ بولىپ وتىرعانىن قالاي جاسىرايىن؟ ماسەلەن، وسى كۇندەرى ماشينا جالداپ، رەسپۋبليكالىق شتاب ورنالاسقان استاناعا جاقىن سولتۇستىك وبلىستاردى ارالاۋدى باستادىم. سوندىقتان دا قول ۇشىن بەرەم دەگەن كەز كەلگەن قارجىلى ازاماتقا ريزا بولار ەدىم".
ءبىرشاما ۋاقىت بۇرىن رەداكسياسى وسك جاريالاعان سايلاۋ شىعىندارىنىڭ مولشەرىن وقىرمان نازارىنا ۇسىنعان ەدى. ول ماقالاعا كەلەسى گيپەرسىلتەمە ارقىلى وتە الاسىز:
ۇسىنعان: ادىلەت مادەنيەت
