بۇگىنگى كۇنى كەز-كەلگەن ۇجىم ءوز قىزمەتكەرلەرىنىڭ جاستار قاتارىنان بولعانىن كوكسەيتىنى وتىرىك ەمەس. سوندىقتان تالانتتى، ىسكەر جاستارعا دەگەن سۇرانىس پەن ولاردى ءوز قاتارىنا قوسۋ جولىنداعى كومپانيالار اراسىنداعى باسەكەلەستىك تە قارقىن الىپ تۇر. بۇل جاعدايدىڭ ورىن الۋىنا دا سەبەپ بار. ويتكەنى، رۋحانيات  جاڭارىپ، تەحنولوگيالىق ريەۆوليۋسيالار ورىن الىپ جاتقان ۋاقىتتا زاماناۋي ۇدەرىستەرمەن قاتار تىنىستاپ وسكەن جاستاردىڭ ەڭبەك ونىمدىلىگى، جىلدامدىعى جوعارى بولارى حاق.

ءقازىر Z بۋىن دەپ سانالاتىن 16-18 جاستاعى جاستاردىڭ جۇمىسقا ورنالاسۋ بارىسىنداعى كوزدەيتىندەرى وزدەرىنەن الدەقايدا ەڭبەك تاجىريبەسى كوپ قىزمەتكەرلەرى بار ۇجىمدى تاڭدايدى.

بۇعان دا سەبەپ بار. ويتكەنى، 2000 جىلدان بەرى قاراي دۇنيەگە كەلگەن جاستاردىڭ جۇمىسقا دەگەن كوزقاراسى مۇلدە بولەك. ولار جۇمىستا ۇجىمعا پايدا كەلسىن دەگەن ماقساتپەن ەمەس، وزدەرىنىڭ جەكە مۇددەلەرىن قاناعاتتاندىرۋ ءۇشىن ەڭبەك ەتەدى.

Manpower Group كومپانياسى تالانتتى جاستاردى ۇجىمعا تارتۋ ءۇشىن نە ىستەۋ قاجەتتىگىن جانە ولاردى قالاي قىزىقتىرۋ كەرەكتىگىن زەرتتەپ كورگەن.

مانساپ تۋرالى ۇمىتىڭىز: ءوز باقىتىڭىز ءۇشىن جۇمىس جاساڭىز

جاستار قاۋىمى ءقازىر جەتىستىكتى مانساپ پەن اقشانىڭ مولدىعىنا بالامايدى. كەرىسىنشە ولار ءۇشىن جەتىستىك – ءبىرسارىندى ءومىر سۇرمەۋ، ەل مەن جەر كورۋ، تاجىريبە الماسۋ، جەكە تۇلعا رەتىندە ساپاسىنىڭ ارتۋى.

مانساپ قۋۋ، قىزمەتتىك جوعارىلاۋ سەكىلدى ابىرويلاردى ارمانداۋ – بايىرعىنىڭ ءىسى ىسپەتتى بولىپ قالىپتاسۋدا. قازىرگى جاستار ءوز قارىم-قابىلەتىنە قاراي جۇمىس ىستەۋگە بەيىمدەلگەن.

اركىم ءوزىنىڭ دەڭگەيىنە قاراي ارەكەت ەتەدى. مىسالى، باسشىلىق قىزمەتكە ىڭعايى كەلەتىن ازاماتتار باسقارۋ ءىسىن مەڭگەرىپ، ءوز قابىلەتىن كاسىبي تۇرعىدا دامىتادى. وسى سەكىلدى اركىم ءوزىن كاسىبي تۇرعىدا دامىتىپ، ءوز جاعدايىن جاساۋعا ۇمتىلادى.

ءقازىر الەمدە مىناداي قاعيدا بار: "سەنىڭ جاساپ جاتقان جۇمىسىڭا قانشالىقتى از جالاقى تولەنسە دە، سەن سول قىزمەتىڭنەن ءلاززات الا الساڭ، ءوزىڭدى جاقسى سەزىنە الساڭ، سەن – باقىتتىسىڭ".

وسىعان وراي، قىزمەت ۇسىنۋشى ۇيىمدار دا جۇمىسقا قاراجات تابۋ، ماتەريالدىق جاعدايىن ۇلعايتۋ ماقساتىندا ەمەس، قىزمەتكە ناعىز ماحابباتپەن كەلگەن مامانداردى الۋعا بەيىمدەلىپ كەلەدى.

مىسالى، BBDO جانە RCG اتتى جارناما حولدينگتەرى ۋنيۆەرسيتەت قابىرعاسىندا جۇرگەن تومەنگى جانە جوعارى كۋرس ستۋدەنتتەرىنە ارنالعان اقىلى ەڭبەك تاجىريبەسىن جاريالاعان. بۇل جەرگە ەڭبەك تاجىريبەسىنەن وتۋگە بارعان ستۋدەنت ەداۋىر سۋممانى قۇرايتىن جالاقى الادى. بۇدان بولەك، ستۋدەنتتىڭ ەڭبەك ونىمدىلىگى، كاسىبي قابىلەتى، ىنتاسى جوعارى دارەجەلى ماماندارعا ۇناعان جاعدايدا جۇمىسقا شاقىرتۋ الۋعا مۇمكىندىگى بار. ءقازىر بۇل ءادىستى الەمنىڭ بىرنەشە ۇلكەن كومپانيالارى، حولدينگتارى قولدانۋدا.

قوعامدىق جوبالاردى قولعا الىڭىز

بۇگىنگى كۇنگى جاس بۋىن وكىلدەرى الەۋمەتتىك جوبالاردى قولعا الۋدى دۇرىس دەپ ەسەپتەيدى. مىسالى، جاقىندا عانا اياقتالعان فۋتبولدان الەم چەمپيوناتىنىڭ ۇيىمداستىرۋ ىسىنە 17000-نان استام ەرىكتى جاستار اتسالىسقان. بۇل ارقىلى قازىرگى جاستاردىڭ قورشاعان ورتانى ساقتاۋعا، ىزگىلىككە بەت بۇرۋعا، قايىرىمدى بولۋعا، ەكولوگيالىق تازالىققا اسا ۇلكەن كوڭىل بولەتىنىن بايقاۋعا بولادى.

جاس بۋىن قاتارلارىنىڭ كوپشىلىگى ەكو ونىمدەر وندىرەتىن كومپانيالارعا، تازا ساپالى تاۋار وندىرەتىن وندىرىستەرگە، ەلەكتر ەنەرگياسىن، سۋدى ۇنەمدەيتىن ۇجىمدارعا قىزمەتكە ورنالاسقاندى قالايدى.

وسى داعدىلاردىڭ بەلەڭ الۋىنا بايلانىستى الەمدىك ارەناداعى كوپتەگەن ۇجىمدار جۇمىس ۋاقىتىنىڭ ءبىر بولىگى رەتىندە تازا قالا ءۇشىن، سالاۋاتتى ءومىر سالتىن ساقتاۋ ماقساتىندا ءتۇرلى اكسيالار وتكىزىپ تۇرۋدى دۇرىس دەپ ەسەپتەيدى. ولار وسىنداي كىشىگىرىم شارالارى ارقىلى تالانتتى جاستاردى وزىمىزگە تارتامىز دەپ ويلايدى. سونىمەن قاتار، قازىرگى ۋاقىتتا كوپتەگەن ۇجىمدى قاشىقتىقتان جۇمىس ىستەۋ، ەركىن جۇمىس ۋاقىتى سىندى قاعيدالار قالىپتاسىپ كەلەدى. ويتكەنى، جاستار جاعى تاڭنان قارا كەشكە دەيىن كەڭسەدە ورىندىققا تاڭىلىپ وتىرعاندى قالامايتىنى انىق.

قىزمەتكە ادالدىق، تۇراقتىلىق – تالانتتى جاستار تالابى

بارلىق قىزمەت سالالارىندا "جاستار جاعى قىزمەتكە ادال ەمەس، تۇراقتى ەمەس، كوكسەگەندەرى اقشا" دەگەن پىكىر جەلدەي ەسەدى. ءبىراق Audi كومپانياسى 5000 جاس بۋىن وكىلدەرىنەن ساۋالناما الۋ ارقىلى بۇل پىكىردى تولىقتاي جوققا شىعاردى.

راسىندا، Z ۇرپاقتاردىڭ 48 پايىزى ءومىر بويى ءبىر ورىندا تۇراقتى جۇمىس جاساعاندى قالايتىنىن بىلدىرگەن. ساۋالناماعا قاتىسۋشىلاردىڭ تەك قانا 7 پايىزى ءوز مانساپتارىن ءبىر جۇمىس بەرۋشىنىڭ قاراماعىندا وتكىزۋگە دايىن ەمەس ەكەندەرىن بىلدىرگەن.

قازىرگى جاستار ءبىر جۇمىس ورىنىنان ءوزىنىڭ قاجەتتىلىكتەرىن وتەيتىن، قىزمەتتەن ءلاززات الا الاتىن ورىن تاپسا، ياعني، "كومفورت ايماعىن" كەزىكتىرسە، سول ورىننان قوزعالۋعا اسا ءبىر قۇلشىنىس تانىتا قويمايدى. جاستاردىڭ كوپشىلىگىنىڭ پىكىرى بويىنشا، جالپى مانسابىندا جەتى رەتتەن كوپ جۇمىس ورىنىن اۋىستىرۋ تىم ارتىق. بۇل جاعداي ولاردى تۇراقسىزدىققا الىپ بارادى ەكەن.

Audi كومپانياسىنىڭ زەرتتەۋ ناتيجەلەرىنە قايتا ورالساق. جاستاردىڭ كوپشىلىگى ءبىر جۇمىس بەرۋشىنىڭ قول استىندا مىناداي تالاپتارى ورىندالسا عانا قالۋعا دايىن ەكەن: مانساپتىق ءوسۋ، بىلىكتىلىگىن ارتتىرۋ جانە قىزىعۋشىلىق تانىتقان يدەيالارىنا قولداۋ كورسەتىپ، جاقسى قاراجات تولەۋ.

جاستاردى ۇجىمعا تارتۋ ءۇشىن قاجەتتى جاعدايدى جاساۋ كەرەك

قازىرگى ۋاقىتتاعى جۇمىس ورىنىنا سۇرانىسى ارتىپ تۇرعان جاستار "ساۋساعىندا باتىرماسى بار" ۇرپاقتار قاتارىنان بولعاندىقتان، ولار ءۇشىن عالامتوردىڭ الاتىن ءرولى ۇلكەن. ولار ءوز ومىرلەرىن عالامتور مەن ءتۇرلى گادجەتتەرسىز ەلەستەتە المايدى. ەڭ اقىرى، ءتىلى شىعا قويماعان بالالاردىڭ ءوزى ۇيالى تەلەفوننان ويىن ويناپ، وپ-وڭاي باسقارىپ وتىرادى.

ەكىنشىدەن، جاستار كەڭسەنىڭ الىس-جاقىن ەكەندىگىنە، ونىڭ ورنالاسۋ ايماعىنا، كەڭسە جانىندا ورنالاسقان مادەني ءھام ويىن-ساۋىق نىساندارىنا دا ۇلكەن كوڭىل بولەدى. جۇمىستان كەيىن سەرۋەندەيتىن ساياباقتار دا بۇل رەتتە ماڭىزدى ءرول وينايدى.

كوپ تاپسىرما جۇكتەۋ – جاستاردىڭ بىلىكتىلىگىن ارتتىراتىن فاكتور

جاڭا بۋىن وكىلدەرى اقپاراتتاردى ءبىر ۋاقىتتا ءتۇرلى كوزدەردەن قابىلداي الادى. مىسالى، پلانشەتتەن، ۇيالى تەلەفوننان، كومپيۋتەردەن، نوۋتبۋكتان، تەلەديداردان.

سوندىقتان، ولاردىڭ جۇكتەمەلەرىن ارتتىرۋ، ەڭبەك جىلدامدىعىن تالاپ ەتۋ – ونىمدىلىكتى ارتتىرۋعا، بىلىكتىلىك دەڭگەيىن كوتەرۋگە سەبەپ بولاتىن دۇنيە.

جالپى، بۇگىنگى ماقالامىزدا تالانتتى جاستاردى ءوزىڭىزدىڭ ۇجىمىڭىزدىڭ مۇشەسى ەتۋ ءۇشىن قاجەتتى دەپ سانالاتىن بىرنەشە قاجەتتىلىكتەردى كورسەتتىك دەگەن ويدامىز.

تالانتتى جاستار – ۇجىمنىڭ باسەكەگە قابىلەتتىلىگىن ارتتىرىپ، بولاشاعىنىڭ جارقىن بولۋىنا ۇلەس قوسۋعا قاجەتتى ماماندار.