ءامىرجان قوسانوۆ ءوزىنىڭ العاشقى ۇگىت-ناسيحات جۇمىستارىن سولتۇستىك قازاقستان وبلىسى، ماعجان جۇمابايەۆ اۋدانى، بۋلايەۆ قالاسىنان باستادى. پرەزيدەنتتىككە كانديداتتىڭ العاشقى كەزدەسۋىنىڭ ۆيدەوسىن Youtube جەلىسىنە جاريالادى دەپ جازادى Qamshy.kz اقپارات اگەنتتىگى.
الەۋمەتتىك جەلىدە "ءامىرجان قوسانوۆ ۇگىت-ناسيحات جۇمىستارىن نە سەبەپتى شالعاي ءارى ورىس ءتىلدى اۋداننان باستادى؟" دەگەن سۇراق تۋىنداپ، قىزۋ تالقىلانۋدا. قوسانوۆ ءوزىنىڭ فەيسبۋك پاراقشاسى ارقىلى بۇل سۇراققا جاۋاپ بەردى.
"سايلاۋ ناۋقانى العاشقى كۇنىنىڭ العاشقى كەزدەسۋىن ۇلى اقىن ماعجان جۇماباۆتىڭ تۋعان جەرىندە وتكىزدىم. مەنىڭ باعدارلامامدا الاش وردا يدەياسىن مەملەكەتتىك يدەيانىڭ ۇستىنى ەتۋ تۋرالى باپ بار.
ماعجان اقىن الاش وردا ۇكىمەتىنىڭ كوسەمدەرىنىڭ ءبىرى بولعان. باستى سيمۆوليزم سوندا!
ونىڭ ۇستىنە ساياساتكەرلەر كوبىنەسە ورتالىقتاعى قالالارمەن شەكتەلىپ جاتادى. اۋىلعا دا بارىپ تۇرۋ كەرەك!
ءار كەزدەسۋدىڭ ءوز ورنى بار. مىنا كەزدەسۋ رەسەيمەن جاقىن ورنالاسقان، باسقا ۇلت وكىلدەرى بارشىلىق قالادا ءوتتى. سوندىقتان ورىس تىلىنە دە جۇگىنىپ وتىرۋعا تۋرا كەلدى.
ءار كەزدەسۋدەن ۆيدەو جىبەرىپ وتىرۋ پارىز ەمەس شىعار. ويتكەنى باعدارلاما تۋرالى اڭگىمە قايتالانىپ وتىرۋى مۇمكىن. سوندىقتان وسى مەسسەدجىمدى بارشا قازاقستانعا، ونىڭ ۇلكەندى-كىشىلى قالالارى مەن شالعايداعى اۋىلىنا ارنالعان حابار دەپ بىلەرسىزدەر"، - دەپ جازدى ءامىرجان قوسانوۆ.
دايىنداعان: اسەل بولات قىزى
