9 ماۋسىمدا وتەتىن  پرەزيدەنت سايلاۋىنا قاتىستى ءتۇرلى بولجامدار ايتىلىپ، ساياسي ساراپتامالار جۇرگىزىلىپ، الداعى سايلاۋ جايلى باسىلىمدار جارىسا جازىپ جاتىر. وسى رەتتە سايلاۋعا ءتۇسۋشى ۇمىتكەرلەردىڭ قارىم-قابىلەتى مەن جەڭىسكە جەتۋ مۇمكىندىكتەرىن ءبىلۋ ءۇشىن Qamshy.kz اقپارات اگەنتتىگى سانداردى سويلەتىپ كورگەن ەدى. كانديداتتاردىڭ مىنەز-قۇلقى مەن سايلاۋدا جەڭىسكە جەتۋ مۇمكىندىكتەرى نۋمەرولوگيا تۇرعىسىنان قانداي بولماق؟ بۇل سۇراققا بەلگىلى نۋمەرولوگ قۇرالاي باقىت قىزى جاۋاپ بەرگەن بولاتىن.

ەڭ الدىمەن قاسىم-جومارت توقايەۆتىڭ ساندارىن ەسەپتەي كەلە نۋمەرولوگ مىناداي بولجام جاسادى:

«قاسىم-جومارت كەمەل ۇلىنىڭ باستى كودى – 314. سونىمەن قاتار، مىڭدىق كودى دا بار. ياعني، كودى 314 بولعاندىقتان، بۇل ادامنىڭ ميسسياسى - ادىلەت اكەلۋ. كوپ نارسەنى تارازىلاپ جۇرگەندى جاقسى كورەدى. قانداي دا ءبىر جاعداي بولىپ، ماسەلە تۋىنداسا قولداۋ بىلدىرە الادى. بۇل كىسىنىڭ ساندارىنا ۇڭىلسەك، زاڭ سالاسىندا جاقسى قىزمەت ىستەر ەدى. ءبىراق، باسشى بولسا ادىلەتتى باسشى بولادى. ءتىل مەڭگەرۋگە قابىلەتى وتە جوعارى. سونىمەن قاتار، 1 سانى وتە كوپ. وزىنە سەنىمدى كۇش-جىگەرى مىقتى ادام. وزگەلەرگە ءسوزى جۇرەدى، بىتىمگەر. كوپ نارسەنى جوسپارلايدى، اياق استى شەشىم قابىلداۋى قيىن. مىقتى ساراپشىعا جاتادى. ساندارىندا ەكى 5ء-ى بار پاتريوت، مەيىرىمدى. ەكى 3ء-ى بار، ەسەپكە جۇيرىك.  قورىتا كەلە، بۇل كىسى جاقسى زاڭگەر، قارجىگەر، ساراپشى، ديپلومات، وتە مادەنيەتتى، پوليگلوت، شىدامدى ادامعا جاتادى. مىڭدىق كود ءومىرىنىڭ ەكىنشى جارتىسىندا تۇرعاندىقتان، بۇل ادامعا ورتا جول جوق. ماعان سانداردى ەسەپتەي كەلە ۇناپ وتىرعانى وتە ادىلەتتى جانە قابىلەتى جوعارى. 66 جاسىندا ۇلكەن ارمانى ورىندالادى، جاڭا لاۋازىم، جاڭا جۇمىس كۇتىپ تۇر»، - دەيدى.

سونىمەن قاتار قۇرالاي باقىت قىزى، "بۇگىنگى پرەزيدەنتتىككە ۇسىنىلىپ وتىرعان كانديداتتاردىڭ بارلىعىندا 5 سانى وتە كوپ" دەيدى.  5 سانى كوپ ادامدار پاتريوت، ەلىنە-جەرىنە ادال قىزمەت ەتەتىن جاندار ەكەن.

ال ءامىرجان قوسانوۆ تۋرالى: «بۇل كىسىدە جاڭاشىلدىقتىڭ كودى بار. وتە ءبىلىمدى ادام. ستراتەگ، اسىقپاي شەشىم قابىلدايدى، بارلىعىن جوسپارمەن جاسايدى، قولى اشىق. ماتەماتيكادان مەكتەپتە جاقسى وقىعان بولار دەپ ويلايمىن. ساندارىندا ءۇش 9 بار. ميى كۇندىز-تۇنى دەمالماي ىستەپ تۇراتىن ادامداردىڭ قاتارىنان. باسىنا كوپتەگەن يدەيالار كەلەدى، ويشىل ادام. ساتتىلىككە جاۋاپ بەرەتىن سانى دا جوق ەمەس. بويىندا شىنشىلدىق ىزدەۋى، نامىسشىلدىعى باسىم. بۇل كىسىگە دە بيىلعى جىل ءساتتى جانە نۋمەرولوگيا بويىنشا تولەۋتاي ساتاي ۇلى ەكەۋىنىڭ مۇمكىندىگى بىردەي»، -دەدى.

سادىبەك تۇگەلدىڭ ساندارىندا پسيحولوگتىڭ كودى بار. ارتىنان ءىز قالدىراتىن ادامداردىڭ قاتارىندا. ويى ۇشقىر، ءبىلىمدى ادامعا جاتادى. ادامداردى جاقسى تۇسىنەدى. 1 سانى از، ياعني بۇيىرىپ سويلەگەننەن اقىلداسىپ سويلەگەندى جاقسى كورەدى. ەرتە ەسەيگەن ادامعا جاتادى. 5 سانىنان 3-ەۋ بار. بۇل ادام وتە پاتريوت ادام. وزگەلەرگە مەيىرىمدى، جانى اشىپ تۇرادى. ەنەرگياسى تە كوپ. جاڭاشىلدىققا جاقىن ادام. ويتكەنى كودىندا جاڭاشىلدىق باسىم. ەگەر دارىگەرلىك پەن پسيحولوگيا سالاسىن تاڭداعاندا جاقسى بولار ەدى. ينتۋيسياسى جاقسى، وتە شىنشىل ادام. ءبىراق بيىلعى جىلمەن قاراستىرساق، مۇمكىندىگى وتە از.

امانگەلدى تاسپيحوۆتا دا مىڭدىق كودى بار، ءبىراق ءومىرىنىڭ ءبىرىنشى جارتىسىندا تۇر. جانە ساندارى باسشىلىققا جاقىن. شەنەۋنىكتەردە، ۇكىمەت باسىندا جۇرەتىن ادامداردا وسىنداي ساندار بولادى. جەتەكشىلىك ەتۋگە، بىرەۋدى باعىتتاۋعا جاقىن. ورتا جول جوق، وتە قابىلەتتى ادام. نامىسشىل، امبيسياسى باسىم. ەڭبەكقور ادامداردىڭ قاتارىنان. كوبىنە وزگەنىڭ قامىن ويلاپ كەتەتىنى بار. كوپ ادامدارعا جاقپاي جاتادى. قاسىم-جومارت توقايەۆ، سادىبەك تۇگەلدە 7 سانى بار بولىپ تۇر. امانگەلدى تاسپيحوۆتا 7 سانى جوق. ياعني ادامدارعا كومەكتەسەدى، ءبىراق ادامدار باعالامايدى. قابىلەتى بويىنشا گەوگرافيا، تاريح پاندەرىنەن جاقسى وقىعان بولۋى كەرەك. مىنەزىندە پروكۋرور، ميليسيونەر، تەرگەۋشىنىڭ قابىلەتى كورىنەدى.  ءوز ايتقانىنان قايتپايدى. بيىل مۇمكىندىگى وتە جوعارى ەمەس. ءبىراق باسشىلىققا جاقىن ساندارى بار.

ال نۋمەرولوگيا بويىنشا دانيا ەسپايەۆانىڭ ومىردەگى ميسسياسى – قوعامعا قىزمەت ەتۋ. كوبىنە ۇكىمەت جۇمىستارىن جاقسى اتقارا الادى. 156 دەگەن كودى بار. وتە ەڭبەكقور ادامعا جاتادى. بۇرىنعى پرەزيدەنتىمىز نۇرسۇلتان نازاربايەۆ سياقتى ونىڭ دا 6 سانى وتە كوپ. ايەل ادام بولعاندىقتان كانديداتتاردىڭ ىشىندە ەڭبەكقورلىعىمەن ەرەكشەلەنەدى. بۇل كىسى اقشانى بەرەكەلى ۇستايدى. مىنەزى جاقسى ادامعا جاتادى. اقكوڭىل، كەز كەلگەن اداممەن ءتىل تابىسا بىلەدى. كوپ نارسەنى جۇرەگىنە جاقىن قابىلدايدى، سەزىمتال. 58 جاسىندا جاڭا جۇمىس كۇتىپ تۇر. ءبىراق پرەزيدەنتتىك دەي المايمىن. جالپى جولى بولعىش ادامداردىڭ قاتارىنان.

تولەۋتاي ساتاي ۇلى راحىمبەكوۆتىڭ دا مىڭدىق كودى بار. مىسالى، نۋمەرولوگيا بويىنشا دانيا ەسپايەۆا قاراپايىم ادامدارعا جاتادى. ال تولەۋتاي ساتاي ۇلى ءبىراز ەرەكشەلەنەدى. ءوزىن وتە جوعارى ۇستايدى. وتە جولى بولعىش، كوپ نارسە ساتتىلىكتىڭ ارقاسىندا كەلگەن. وتە جولى بولعىش ادامداردىڭ قاتارىندا. بۇكىل ۇمىتكەرلەردىڭ ىشىندە 2،7،8 سانى بار. ەل الدىندا ءوزىن ۇستاي الادى. سويلەي الادى. بىرەۋگە ءسوزى وتەدى. ءبىراق 6 سانى جوق. ياعني جۇمىس ىستەسە، قولايلى گرافيك ىزدەيدى. 54 جاسى وتە جاقسى جىل، مۇمكىندىگى وتە جوعارى. 54 جاسىندا ءوزىن كورسەتە الاتىن جىل.

جامبىل احمەتبەكتىڭ ساندارىندا 1 سانى وتە كوپ. 1 سانى كوبىندە ديكتاتورلاردا بولادى. ءسوزى وزگەلەرگە جۇرەدى، بۇيىرىپ سويلەي بىلەدى. ءسوزى ناقتى، ويى اشىق. ءومىرىنىڭ ەكىنشى جارتىسى جەڭىل دەپ تۇر. مانساپ جولىندا ۇلكەن جەتىستىككە جەتۋگە مۇمكىندىگى جوعارى. ءساتتى سانى جوق. سوندىقتان بۇل ادامعا كوپ نارسە ەڭبەك پەن مىنەزدىڭ ارقاسىندا كەلگەن. مىنەزى، كۇش-جىگەرى مىقتى. الدىنا ايقىن ماقسات قويا الادى. سوعان جەتۋ جولىندا كەز كەلگەن قيىندىققا توتەپ بەرەتىن ادام. تازالىقتى وتە جاقسى كورەدى. ومىردەگى ميسسياسى – اكىم بولۋ، ادەمىلىك اكەلۋ، جەتەكشىلىك ەتۋ. بۇل ادامدا دا باسشىلىققا جاقىن ساندار بار. 58 جاس وتە جاقسى جىل. جاڭا ءومىر باستالادى، ءوزىن جاڭا قىرىنان كورسەتەدى. بۇل كىسىنىڭ قاسىم-جومارت توقايەۆتان كەيىنگى مۇمكىندىگى جوعارى.

وسىلاي ءاربىر كانديداتتىڭ ساندارمەن ساياسي پورترەتىن جاساعان نۋمەرولوگ قۇرالاي باقىت قىزى كىمنىڭ قاي ورىندا بولاتىنى جايلى بولجام جاسادى. ونىڭ ايتۋىنشا، ءبىرىنشى ورىندا – قاسىم-جومارت توقايەۆ، ەكىنشى ورىندا – جامبىل احمەتبەك، ءۇشىنشى ورىندا – ءامىرجان قوسانوۆ پەن تولەۋتاي راقىمبەكوۆ بولۋى مۇمكىن. قالعان كانديداتتاردىڭ جەڭىسكە جەتۋ مۇمكىندىگى نۋمەرولوگيا بويىنشا تومەن بولىپ تۇر، - دەيدى نۋمەرولوگ.

بۇل جاي عانا نۋمەرولوگيالىق بولجام عانا. كىمنىڭ جەڭىسكە جەتەرىن الداعى سايلاۋ انىقتايتىن بولادى.

مارجان سابەت