"بۇل سايلاۋ بۇرىنعى سايلاۋدان وزگەرەك بولاتىن ءتۇرى بار. دوداعا ءتۇرلى پىكىر يەلەرىنىڭ ات قوسۋى ءوز الدىنا، وسى جولى كوپشىلىك وتە بەلسەندى، قوعامدىق پىكىرتالاس تىم قىزۋ. ءبىرى سايلاۋعا بايكوت جاريالاپ، ەندى ءبىرى ءبىراۋىزدان داۋىس بەرۋدى ۇسىنىپ جاتقان تۇستا، «باياعى جارتاس سول جارتاس» دەگەندەي، «ءبىزسىز دە سايلاۋ وتەر» دەپ بۇك ءتۇسىپ جاتىپ العاندار دا بار. دەگەنمەن، وسى جولى «كونستيتۋسيالىق قۇقىق»، «ءادىل سايلاۋ»، «ءبىز تاڭداعان كانديدات» سىندى سوزدەر ءجيى ايتىلىپ جاتىر. مەنىڭشە، ءبىزدىڭ ەل سوڭعى جىلدار ىشىندە العاش رەت اشىق ساياسات جۇرگىزىپ وتىر. 

ءقازىر ەلدىڭ ءار تۇكپىرىندە، الەۋمەتتىك جەلىلەردە كوپشىلىك سايلاۋ كامپانياسى مەن ەل پرەزيدەنتىنە كانديداتتاردى اشىق تالقىلاي باستادى. بۇل – حالىقتىڭ وسى سايلاۋعا بەيجاي قارامايتىنىن، پرەزيدەنتتىك سايلاۋ ءمانىن تۇسىنەتىنىن اڭعارتسا كەرەك. 

ۇگىت-ناسيحات الاڭىنا شىققان ۇمىتكەرلەر ءارتۇرلى. قاسىم-جومارت توقايەۆ باستى كانديدات رەتىندە كامپانيانىڭ كوشىن باستاپ تۇر. قالعاندارى ءوزارا ۇزەڭگى قاعىسىپ كەلەدى. دەگەنمەن، قاسىم-جومارت توقايەۆ قارا ءۇزىپ كەلەتىنىنە ءبىرازىمىز قازىردەن ءباس تىگىپ وتىرمىز. وعان سەبەپ تە جوق ەمەس.

بىرىنشىدەن، توقايەۆ حالىقارالىق ارەنادا عانا ەمەس، ىشكى الاڭدا دا زور بەدەلگە يە. ەكىنشىدەن، اقوردا توقايەۆ ءرولىنىڭ جۇيەلى تۇردە تەحنولوگيالىق نىعايۋىن قامتاماسىز ەتەدى. كانديداتتاردى ۇسىنۋ كەزەڭىندە اقوردالىق ساياسي تەحنولوگتار توقايەۆتى ەلەكتورالدىق قولداۋدىڭ بار قۋاتىن كورسەتە ءبىلدى. 

تاعى ءبىر ماڭىزدىسى - سايلاۋعا ءامىرجان قوسانوۆ باستاعان وپپوزيسيالىق كۇش وكىلدەرىنىڭ قاتىسۋى. ءا.قوسانوۆ پرەزيدەنتتىك بايگەگە ءپوزيتيۆتى جانە باسەكەلەستىك رەڭ بەرەدى. بۇل - پرەزيدەنتتىك بايگە ەرەكشەلىگىنىڭ ءبىرى. دەگەنمەن، وپپوزيسيالىق كۇشتەردىڭ ورتاسىندا كانديداتقا دەگەن ورتاق پىكىر قالىپتاسپاعان، سونداي-اق وپپوزيسيانىڭ كەيبىر وكىلدەرى بيلىكپەن ەمەس، ءتۇرلى ساياسي كۇشتەردىڭ كانديداتتارىمەن كۇرەسۋدى قالايدى.

وپپوزياعا ءالى دە تاجىريبە جيناقتاۋ جانە جالپى ساياسي تۇعىرنامانى قالىپتاستىرۋ ءۇشىن كۇش بىرىكتىرۋ قاجەت. ساياسي كۇشتەر اۋىزبىرشىلىك تانىتۋعا قابىلەتتى بولۋى ءتيىس. وسى ورايدا ءا.قوسانوۆتىڭ بايگەگە قاتىسۋى ءپوزيتيۆتى قادام. بۇنى ەسكەرگەن ءجون. 

«اۋىل» پارتياسىنىڭ وكىلى ت.راحىمبەكوۆ الەۋمەتتىك جەلىلەردەگى ەڭ تانىمال تۇلعانىڭ ءبىرى. قوعامنىڭ ناقتى ءبىر بولىگىنەن بەلسەندى قولداۋ تاۋىپ وتىر. سونداي-اق، حالىقتىڭ 42 پايىزى اۋىلدىق جەرلەردە تۇراتىنىن ەسكەرسەك، سايلاۋالدى جوسپارى دۇرىس قۇرىلسا، «اۋىل» پارتياسىنا ناقتى قولداۋ كورسەتۋ الەۋەتى ۇلعايا تۇسپەك. 

ەلدىڭ ساياسي تاريحىندا تۇڭعىش رەت ەل كاسىپوداقتارى پرەزيدەنتتىككە كانديدات رەتىندە ءوز ادامىن ۇسىندى. ول ءماجىلىستىڭ بۇرىنعى دەپۋتاتى ا.تاسپيحوۆ. كاسىپوداق مۇشەلەرى 2 ملن. استام ادام، ياعني، ول دا وڭاي ەمەس. سايلاۋعا ءا.قوسانوۆتىڭ، ۇلتتىق-پاتريوتتىق كۇشتەر وكىلى س.تۇگەلدىڭ، اگرارلار تاراپىنان ت.راحىمبەكوۆتىڭ، كاسىپوداقتار وكىلى ا.تاسپيحوۆتىڭ قاتىسۋى 2019 جىلعى سايلاۋدى ەرەكشەلەپ تۇر. تىركەۋ كەزەڭىنەن تۇيگەنىمىز - بيلىك قوعاممەن ديالوگقا دايىن. مەنىڭشە، بيلىكتىڭ ىشىندە ەكى توپ قالىپتاسۋدا: ليبەرالدىق رەفورمالاردى جەدەل وتكىزۋدى قالايتىن «رەفورماشىلار» جانە قوعامدىق ستاتۋس-كۆونى قالدىرۋدى ۇسىناتىن «ەسكىشىلدەر». ايتكەنمەن، ولار ورتاق ءتىل تابىسادى، قازىرگى جاعدايدى تۇسىنەدى. ءبىر سوزبەن ايتقاندا، بيلىك ءوزىنىڭ تۇتاستىعى مەن اۋىزبىرشىلىگىن كورسەتەدى.

قىسقاسى، ەلىمىزدە جاقسى وزگەرىس بار. حالىقتا وڭ وزگەرىستەرگە دەگەن ءۇمىت پايدا بولدى. جۇيە وزگەرىپ كەلەدى".

قاناعات ءابىلقايىردىڭ فەيسبۋكتەگى پاراقشاسىنان

"1999 جىل ەدى-اۋ. سايلاۋعا بارعانىمدا سول جەردەگىلەر گازەتكە سۇحبات بەرۋىمدى سۇرادى. "ءقازىر ءتىلشى كەلەدى، ءسىز سايلاۋشى رەتىندە بىر-ەكى سۇراقتارعا جاۋاپ بەرىڭىز" - دەدى. ءبىراق ءتىلشىنى كۇتىپ وتىراتىن ۋاقىتىم بولماي، كەتىپ قالدىم. "جارايدى، ءوزىمىز بىردەڭە قىلارمىز" - دەدى ولار.

تورت-بەس كۇن ءوتتى. 
— وۋ، مىقا، گازەتتە ءجۇرسىڭ عوي، — دەدى بىرەۋ. — سايلاۋ تۋرالى ايتىپسىڭ عوي.
— قانداي گازەت؟ — دەيمىن تاڭ قالىپ. 
ۇيىنەن گازەتتى الىپ شىقتى. سويتسەم، مەن ايتپاعان پىكىرلەر مەنىڭ اتىمنان جازۋلى تۇر. "سايلاۋ وتە جوعارى دەڭگەيدە ءوتىپ جاتىر، سايلاۋشىلاردىڭ باسشىنى تاڭداۋعا دەگەن ىقىلاستارى زور" دەي مە... ەڭ سوڭىندا "تاڭەرتەڭ ەرتە كەلىپ، پرەزيدەنتكە ءبىرىنشى بوپ داۋىس بەردىم" دەگىزىپ قويىپتى. ايتپەسە سايلاۋعا تۇستە بارعانمىن عوي.

— جۋمايسىڭ با؟ — دەيدى اناۋ. سول جولى ەشكىمدى سۇحبات بەرمەگەنىمە سەندىرە المادىم.

سودان سوڭ سايلاۋعا ءبىر-اق رەت باردىم. بارىپ، ەشكىممەن دە امانداسپاستان ۇيگە تايعانمىن. تاعى گازەتكە شىعىپ جۇرسەم ماسقارا عوي.
9-ى كۇنى دە بىرەۋلەرگە ۇستالىپ قالماسام بولعانى..."

مىقتىبەك ورازتاي ۇلىنىڭ فەيسبۋكتەگى پاراقشاسىنان

ۇسىنعان: ماقپال سەمباي