الماتى وبلىسىندا قوقىس پوليگونى ورتەندى، دەپ حابارلايدى Qamshy.kz اقپارات اگەنتتىگى zakon.kz سايتىنا سىلتەمە جاساپ. ءورت سالدارىنان الماتىنى ءتۇتىن باستى.

ءورت قاراساي اۋدانى ايتەي اۋىلى ماڭىنداعى قاتتى تۇرمىستىق قالدىقتار پوليگونىندا شىققان. ءبىر گەكتار جەر وتقا ورانعان. قوقىستاعى ءورت ءالى دە سوندىرىلمەگەن، 12 ساعات بويى ورتەنىپ جاتىر.

وسىعان دەيىن ءورتتى سۋمەن ەمەس، توپىراقپەن وشىرۋگە تىرىسىپ جاتقانى تۋرالى حابارلانعان بولاتىن. ويتكەنى ءورت ءسوندىرۋ كولىكتەرى قوقىس ورتەنىپ جاتقان ويىققا تۇسە الماعان.

نە سەبەپتى ورتەنىپ جاتقان پوليگونعا تىكۇشاقتار تارتىلمايدى دەگەن ساۋالعا قازاقستان رەسپۋبليكاسى ىشكى ىستەر مينيسترلىگىنىڭ توتەنشە جاعدايلار كوميتەتى، اتالعان پوليگانعا جاۋاپتى "Kaz Waste Conversion" ج ش س كومپانياسى ءورتتى ءوز كۇشتەرىمەن سوندىرۋگە نيەتتى دەپ جەتكىزگەن. سونىمەن قاتار، توتەنشە جاعدايلار كوميتەتى مۇنداي پوليگونداردا ءورت ءسوندىرۋدىڭ وزىندىك تاسىلدەرى بار ەكەنىن حابارلادى.

الايدا، "Kaz Waste Conversion" ج ش س ەشقانداي مالىمدەمە جاساعان جوق.

ۇسىنعان: مارجان سابەت