"Balapan" تەلەارناسىنىڭ ءبىر بالاپانى كوز جۇمدى دەپ حابارلايدى Qamshy.kz اقپارات اگەنتتىگى.

بۇل تۋرالى بالالار جازۋشىسى، ادەبيەت سىنشىسى ەلدوس توقتارباي ءوزىنىڭ فەيسبۋكتەگى پاراقشاسىندا جازدى.

"اۋىر قازا... تالانتتى بالا ەدى... رامازان ايىندا دۇعا ەتىپ ەدىك... ورنى تولماس وكىنىش... قىسقا عۇمىر... نە دەگەن اۋىر ەدى... اللا الدىنان جارىلقاسىن! اتا- اناڭا، تۋعاندارىڭا سابىر بەرسىن!" دەلىنگەن جازبادا.

ەسكە سالساق، وسىدان بىرنەشە كۇن بۇرىن الەۋمەتتىك جەلىدەگى اعا-اپالارى قۇتجان باعلاننىڭ اپاتقا ءتۇسىپ، اۋىر حالدە جاتقانىن جازىپ، حالىقتا دۇعا تىلەيىك دەگەن جازبالار قالدىرىپ ەدى.

"اپات ايتىپ كەلمەيدى عوي... ەكى كۇن بۇرىن 13 جاسار قۇتجان باعلان عالىمبەك ۇلى ەسىمدى بالاقاي جول اپاتىنا ءتۇستى.

باعلان بالاپان ارناسىنداعى "ويلان، تاپ!"، "ءبىز دە بال بولعانبىز"، "قۋىر، قۋىر، قۋىرماش"، "دۇرىس-بۇرىس" باعدارلامالارىن جۇرگىزگەن، تالابى تاۋداي تالانتى بالا. سونداي-اق، قازاق راديوسىندا "بالداۋرەن" بالالار باعدارلاماسىن جۇرگىزدى.

ءوزى ۆەلوسپورتقا دا قاتىسادى. سپورت شەبەرىنە ۇمىتكەر. وسى سپورتتىڭ كەزەكتى جاتتىعۋى بارىسىندا سپورتتىق ۆەلوسيپەدپەن جول جيەگىندە كەلە جاتقاندا، جۇك كولىگىمەن سوقتىعىسىپ، وتە اۋىر جاراقات الدى. ءقازىر ءومىر مەن ءولىم اراسىندا، وتە اۋىر جاعدايدا (كومادا) جاتىر.

قادىرمەندى اعايىن، جاراتۋشى اللا تاعالادان بالانىڭ اماندىعىن تىلەيىك. وقىعان ناماز، قۇرانىمىزدا ءھام تاراۋىق نامازىندا وسى بالانىڭ دەنساۋلىعىن دۇعاعا قوسساڭىزدار. قاسيەتتى رامازان ايىنداعى دۇعا-تىلەكتەرىمىز قابىل بولسىن!" دەگەن ماتىندەگى جازبالاردى كوپتەپ تاراتىپ، كۇللى قازاق كىشكەنتاي بالاقاي ءۇشىن دۇعا تىلەگەن ەدى. 

ۇسىنعان: ماقپال سەمباي