ەلىمىزدە كەزەكتەن تىس پرەزيدەنت سايلاۋى بەلگىلەنىپ، سايلاۋالدى ناۋقاندار باستالعالى بەرى ءتۇرلى ميتينگىلەر مەن باس كوتەرۋلەر ورىن الىپ جاتىر. "شىندىقتان قاشا المايسىڭ" ("وت پراۆدى نە ۋبەجيش») دەپ ۇرانداتقاندار ەندى باس قالادا دا بوي كورسەتە باستادى دەپ حابارلايدى Qamshy.kz اقپارات اگەنتتىگى.
سوڭعى كەزدەرى بوس پلاكات ۇستاعان نەمەسە پلاكات ۇستاعان كەيىپ تانىتقان ازاماتتاردى دا اكىمشىلىك جاۋاپكەرشىلىككە تارتىپ، ولاردىڭ ساياسي-ازاماتتىق پوزيسياسى تۋرالى سۇراق-جاۋاپ جۇرگىزىپ جاتىر پوليسيا قىزمەتكەرلەرى.
دەگەنمەن، ءدۇبىرلى دۇرمەكتىڭ دوداسىنا ءتۇسىپ كەتكەندەر اۋىزدىق بەرمەي كەلەدى. ءىرى شاھارلارداعى ەل نازارىنا ىلىنەتىن جەرلەرگە باننەرلەر ءىلىپ، الەۋمەتتىك جەلىدەگى پاراقشالارىندا ءتۇرلى جازبالار جاريالاپ دەگەندەي، ءوز قۇقىن بارىنشا قورعايتىندارىن كورسەتىپ باعۋدا.
وسىنداي قوعامدىق شارانى ۇيىمداستىرعانداردىڭ بارلىعى الدى 15 تاۋلىكتەن مەرزىم الىپ، ارتى "ۇساق بۇزاقىلىق" بابى بويىنشا زاڭ بۇزعان بولىپ ەسەپتەلىپ، ايىپپۇل ارقالاۋدا.
ينستاگرام جەلىسىندەگى rukh2k19 اتتى اككاۋنت قولدانۋشىسى "شىندىقتان قاشا المايسىڭ" ۇرانىن ناسيحاتتايتىن تاعى ءبىر ەرەكشە دۇنيەنى پاراقشاسىنا جۇكتەدى.
پوسموترەت ەتۋ پۋبليكاسيۋ ۆ Instagram
فوتوعا نازار سالساق، پوليسيا قىزمەتكەرلەرىنىڭ دە اسفالتقا سالىنعان گراففيتي تيپتەس سۋرەتكە نە شارا قولدانارىن بىلمەي، ءارى-سارى كۇيگە ءتۇسىپ تۇرعانىن بايقاۋعا بولادى. دەگەنمەن، بۇل فاكتى ارقىلى جازالانىپ جاتقاندار تۋرالى ەشقانداي اقپارات جاريا بولعان جوق.
ەگەر داعدى باعزى قالىپتا بولسا، كوپ ۇزاماي "جاعىمدى" جاڭالىقتار ەستىپ قالارمىز. ازىرگە – وسى.
پىكىر قالدىرۋ