قازاقستاننىڭ ءىرى قالالارىنىڭ ءبىرى – الماتىنىڭ اكىمى باۋىرجان بايبەك Instagram-دا ءوزىنىڭ جەكە پاراقشاسىن اشتى دەپ حابارلايدى Qamshy.kz اقپارات اگەنتتىگى اكىمنىڭ رەسمي Instagram اككاۋنتىنا سىلتەمە جاساپ.
باۋىرجان بايبەك الداعى ۋاقىتتا الماتى قالاسىن دامىتۋعا باعىتتالعان جوسپارلارىمەن ءبولىسىپ، قالا بيلىگىنىڭ تىنىس-تىرشىلىگىمەن تانىستىرماق.
«تاياۋ ارادا «بيۋدجەتكە قاتىسۋ» پيلوتتىق جوباسىن ىسكە قوسامىز. الماتىنىڭ ءار اۋدانىندا جارتى ميللياردقا جۋىق تەڭگەنى تۇرعىنداردىڭ وزدەرى قايدا جۇمسالاتىنىن انىقتايتىن بولادى. قالالىقتار ءوز ۇسىنىستارى مەن جوبالارىن بەرە الادى، ال اشىق داۋىس بەرۋ ولاردىڭ ەڭ ۇزدىكتەرىن انىقتايتىن بولادى. بۇگىن مەن قوعاممەن بايلانىستىڭ تاعى ءبىر ارناسىن اشۋدى ءجون كوردىم. ياعني، سىزدەردىڭ وتىنىشتەرىڭىز بەن تالاپ-تىلەكتەرىڭىزدى تىكەلەي قابىلداپ، اتقارىلعان جۇمىستار تۋرالى كۇندەلىكتى حاباردار ەتەتىن بولامىن»، - دەپ جازدى العاشقى جازباسىندا.
سونىمەن قاتار: «الماتى اكىمدىگىندەگى العاشقى جۇمىس كۇندەرىمدە قالالىقتارمەن اقپاراتتىق بايلانىستىڭ نەگىزگى كوزى الەۋمەتتىك جەلىلەر بولدى. سوندىقتان ءبىز ينستاگرامدا اكىمدىكتىڭ اككاۋنتىن جانە «Open Almaty» قوعامدىق قابىلداۋ ورتالىعىن اشتىق. سىزدەردەن كەلىپ تۇسكەن وتىنىشتەردى زەردەلەي وتىرىپ بۇگىنگى كۇنى بيۋدجەتتىڭ باسىم بولىگىن الەۋمەتتىك ماسەلەلەردى – اباتتاندىرۋ، قوعامدىق كولىكتى دامىتۋ، جول، مەكتەپ، بالاباقشالار، اۋرۋحانالار سالۋعا جانە باسقا دا وزەكتى ماسەلەلەردى شەشۋگە باعىتتادىق»، - دەپ العاشقى كۇننەن باستاپ الەۋمەتتىك جەلىدە بەلسەندى قىزمەت اتقارعانىن تىلگە تيەك ەتتى.
17 ساعات بۇرىن سالىنعان اكىمنىڭ جازباسىن 6 مىڭنان استام ادام ۇناتىپ، مىڭنان استامى پىكىر قالدىرعان. رەسمي پاراقشاعا 31 مىڭ ادام جازىلعان.
دايىنداعان: مارجان سابەت
پىكىر قالدىرۋ