كەشەدەن بەرى الەۋمەتتىك جەلىدە اتىراۋداعى پوليسيا دەپارتامەنتى باستىعىنىڭ ات مىنگەن ۆيدەوسى قىزۋ تالقىعا تۇسكەن بولاتىن. اتالمىش ۆيدەو بويىنشا ءىىم دە مالىمدەمە جاساپ، تەرگەۋ جۇمىستارىن باستاعانىن ايتتى. ءتىپتى توقايەۆتىڭ ءوزى بۇل ءىستى قاتاڭ باقىلاۋىنا الىپ، شارا قولداناتىنىن جەتكىزگەن-دى.
"ءىىم ە.تۇرعىمبايەۆقا اتىراۋ وبلىستىق پوليسيا دەپارتامەنتى باستىعىنىڭ ەرسى ارەكەتىنە قاتىستى قىزمەتتىك تەكسەرۋ جۇرگىزۋدى تاپسىردىم. قاتاڭ شارا قولدانىلاتىن بولادى"،- دەپ جازدى پرەزيدەنت.
گەنەرالدى اتقا مىنگىزگەن كىم؟
ايان دۇيسەمبايەۆ قىزىلقوعا اۋدانى باسشىلىعى مەن جەرلەستەرىنىڭ شاقىرتۋىن قابىل الىپ، ءوزىنىڭ تۋعان جەرىنە بارعان. جاقىندا عانا شەنى جوعارىلاعان ايان دۇيسەمبايەۆقا وسىعان بايلانىستى جەرلەستەرى ات مىنگىزەدى. ۆيدەونىڭ وزىنەن اۋىل تۇرعىندارىنىڭ ىستىق ىقىلاسىن كورۋگە بولادى.
اتالمىش جايتقا قاتىستى فەيسبۋكتە ءتۇرلى پىكىرلەر جازىلدى. سولاردىڭ قاتارىندا ەرجان جاۋباي دا بار. ول ءوز جازباسىندا ەلباسىنىڭ "ۇلى دالانىڭ جەتى قىرى" ماقالاسىن تىلگە تيەك ەتەدى.
— ەلباسى "ۇلى دالانىڭ جەتى قىرى" ماقالاسىنىڭ العاشقى تارماعىندا:
"تۋ ۇستاعان سالت اتتى جاۋىنگەردىڭ بەينەسى – باتىرلار زامانىنىڭ ەڭ تانىمال ەمبلەماسى، سونىمەن قاتار، اتتى اسكەردىڭ پايدا بولۋىنا بايلانىستى قالىپتاسقان كوشپەندىلەر الەمى «مادەني كودىنىڭ» ايرىقشا ەلەمەنتى" - دەگەن بولاتىن.
ال قازاقتىڭ قۋانسا — ات مىنگىزىپ، شاپان جاباتىنى، ارازداسسا ات-شاپان ايىپ بەرەتىن ءداستۇرى بارى ەجەلدەن بەلگىلى. ونى دالەلدەپ جاتۋدىڭ كەرەگى جوق.
دەمەك، قازاقتىڭ ارعى تامىرىندا اتقا ءمىنۋ ەشقانداي قىلمىس ەمەس!
ال ءوزىنىڭ سايلاۋالدى باعدارلاماسىندا قازاقستان رەسپۋبليكاسىنىڭ تۇڭعىش پرەزيدەنتى — ەلباسى نۇرسۇلتان نازاربايەۆتىڭ ساياساتىن جالعاستىراتىن، ساباقتاستىراتىن قاسىم-جومارت توقايەۆ اتىراۋ حالقى، سونىڭ ىشىندە ءوزىنىڭ تۋعان اۋىلى ات مىنگىزىپ شاپان جاپقان پوليسيا دەپارتامەنتى باستىعى جايلى:
"ءىىم ە.تۇرعىمبايەۆقا اتىراۋ وبلىستىق پوليسيا دەپارتامەنتى باستىعىنىڭ ەرسى ارەكەتىنە قاتىستى قىزمەتتىك تەكسەرۋ جۇرگىزۋدى تاپسىردىم. قاتاڭ شارا قولدانىلاتىن بولادى" - دەگەن ەكەن.
ويلانىپ كورىڭىز، قاسىم-جومارت كەمەل ۇلى ەلباسىنىڭ ساياساتىن قولداي ما، الدە قازاقتىڭ سالت-داستۇرىنە قارسى شىعا ما؟ - دەپ جازدى تاۋەلسىز جۋرناليست ەرجان جاۋباي.
لاۋازىمدى قىزمەتتەگى ازامات ءوزىنىڭ تۋعان جەرىنە بارىپ، جەرلەستەرىنىڭ ىقىلاسىنا بولەنسە، نەسى ايىپ؟! ءيا، جەمقورلىق دەندەپ كەتكەن زاماندا ونىڭ سەبەپ-سالدارىمەن كۇرەسۋ قاجەت-اق. الايدا بۇل جەردە ءبارى باسقاشا. ايان دۇيسەمبايەۆ تۇلپاردى جاسىرىن جاعدايدا الىپ جاتقان جوق. كەرىسىنشە حالىقتىڭ كوزىنشە اتقا ءمىنىپ، سۋرەتكە دە ءتۇسىپ جاتىر. مۇنى حالىقتىڭ جەرلەسىنە ىستىق ىقىلاسى، زور قۇرمەتى دەپ ءتۇسىنۋ كەرەك.
سونداي-اق ءوزىن "قىزىلقوعانىڭ قۇرمەتتى ازاماتىمىن" دەپ تانىستىرعان ەسەنباي نۇروۆ دەگەن ازامات فەيسبۋك ارقىلى ءوز جەرلەسىنە اراشا ءتۇستى.
— داستۇرىمىزدە ەل سىيلاعان، تانىمال تۇلعاعا بەرىلەتىن مۇنداي جورالعىنى تارتۋ نەمەسە تارالعى دەپ اتايدى. بۇل تارتۋ – تارالعى سول ازاماتتىڭ ەڭبەگىن باعالاي وتىرىپ، كەيىنگى ۇرپاققا ۇلگى-ونەگە رەتىندە ۇسىنىلعان. تۋعان جەرى مۇنداي قۇرمەت كورسەتە الماسا ەلگە، جەرگە سىن دەپ قارالعان.
وسىنداي ونەگەلى ءىستى اتقارعان قىزىلقوعا اۋدانى باسشىلىعى مەن شاقىرتۋدى قابىل الىپ جەرلەستەرىمەن كەزدەسكەن ايان ءىنىمىزدىڭ مىنگەن اتىن ورىنسىز الىنعان سىيلىق دەپ قابىلداسا، ۇلتتىق بىرلىگىمىزدىڭ، ماڭگىلىك ەل بولۋ جولىنداعى قاعيدالارىمىزدىڭ ورەسكەل بۇزىلعاندىعى دەپ ەسەپتەيمىن، - دەپ جازدى قىزىلقوعا اۋدانىنىڭ قۇرمەتتى ازاماتى.
ميلليونداعان دوللار پارا العان ازاماتتاردىڭ قاسىندا ەلدىڭ الدىندا گەنەرالعا جەرلەستەرىنىڭ ات مىنگىزىپ، قۇرمەت كورسەتكەنى ايىپ پا؟ جەمقورلىقپەن كۇرەسۋدى حالىق قوس قولداپ قولدايدى. الايدا بۇل ۇلتتىق قۇندىلىقپەن، سالت-داستۇرمەن كۇرەسۋ دەگەندى بىلدىرمەسە كەرەك. كەرىسىنشە بۇل ارەكەتتى حالىقتىڭ ىستىق ىقىلاسىنا بولەنگەن لاۋازىمدى قىزمەتكەردىڭ باسىن ءيىپ، ەلىنىڭ الدىنا كەلۋى دەپ ۇقپايمىز با؟
توقايەۆتىڭ كەز كەلگەن داۋلى جايتتى باسا نازارعا الىپ، twitter جەلىسى ارقىلى مالىمدەمە جاساۋى جاقسى قادام. بۇل ونىڭ سايلاۋ الدىندا جاقسى ۇپاي جيناۋىنا دا سەپتىگىن تيگىزەتىنى راس...
دەسەك دە، 9 مامىردا وتكەن "ماڭگىلىك پولكتە" ءسسسر-دىڭ تۋىن جەلبىرەتىپ، ءستاليننىڭ پورترەتىن ۇستاعاندارعا نەگە تىيىم جوق؟ ءتىپتى تاۋەلسىز قازاقستاندا ءوز ەلىندە جۇرگەندەي اتقا ءمىنىپ شىرەنگەن كازاكتارعا نەگە توقتاۋ جاسالىنبايدى؟
توقسان اۋىز ءسوزدى توبىقتاي تۇيىندەيتىن بولساق، اتاق-ابىرويلى ازاماتقا ات مىنگىزىپ، يىعىنا شاپان جاباتىن قازاقپىز. ەرتەڭ تاعى بىرەۋدىڭ يىعىنا شاپان جابىلدى دەلىك. ونى دا جەمقورلىق دەپ ۇعاتىن بولساق، ۇلتتىق داستۇرىمىزگە سىن ەمەس پە؟ ونسىز دا جاستاردىڭ بويىنا قازاقىلىق پەن سالت-سانانى، ۇلكەندى سىيلاۋ مەن قۇرمەتتەۋدى سىڭىرە الماي وتىرعان جوقپىز با؟
...ال ازاماتقا ات مىنگىزگەن ايىپ پا؟
پىكىر قالدىرۋ