الماتى وبلىسىندا ەكى شەتەلدىك ازامات كولىك ۇرلاپ ۇستالدى، دەپ حابارلايدى Qamshy.kz اقپارات اگەنتتىگى Zakon.kz سايتىنا سىلتەمە جاساپ.

الماتى-بىشكەك تاس جولىندا جول پوليسياسى الماتى قالاسىندا ۇرلانعان Toyota Land Cruiser Prado اۆتوكولىگىن انىقتاعان.

15 مامىردان 16 مامىرعا قاراعان ءتۇنى Toyota Land Cruiser Prado اۆتوكولىگى ۇرلاندى دەگەن حابارلاما تۇسكەن. اۆتوكولىكتىڭ قاي جەردە ەكەنىن انىقتاۋ ءۇشىن وبلىس پوليسەيلەرى ۇستاۋ جوسپارىن جاريالاپ، رەسپۋبليكالىق الماتى-بىشكەك تاس جولىندا 95 كم جەردەن كولىك ۇرلاعان شەتەلدىك ازاماتتاردى ۇستادى.

اۆتوكولىكتىڭ ىشىندە ەكى ازامات بولعان. ونىڭ ءبىرى رەسەي، ەكىنشىسى – تاجىكستان ازاماتى. ۇستالعاندار كولىكتى الماتى قالاسىندا تانىمايتىن ادامنان ساتىپ العانىن ايتقان.

اۆتوكولىكتى ۇستالعاندارمەن بىرگە الماتى قالاسىنا جەتكىزىپ، قالالىق پوليسياعا تاپسىرىلدى. ۇستالعاندار شىن مانىندە كولىك ۇرلادى ما، الدە الاياقتارعا الداندى ما، ونى الداعى ۋاقىتتا الماتى پوليسياسى انىقتايدى.

ۇسىنعان: مارجان سابەت