16 مامىردا قاراعاندى وبلىستىق سوتىنىڭ عيماراتىندا ەكى جىلعا سوتتالعان بالقاش قالاسىنىڭ تۇرعىنى الەكساندر گيت اپەللياسيالىق القا سوت شەشىمىن وقىعان سوڭ سوتقا قاتىسۋشىلاردىڭ كوزىنشە كۇرە تامىرىن كەستى. سوتتالۋشى وسىلايشا العاشقى ينستانسيانىڭ ۇكىمىن وزگەرىسسىز قالدىرعان سوت شەشىمىنە نارازىلىق بىلدىرگەن دەپ جازادى Qamshy.kz اقپارات اگەنتتىگى ازاتتىق راديوسىنا سىلتەمە جاساپ.
الەكساندر گيتكە اۋرۋحانادا مەديسينالىق كومەك كورسەتىلگەن سوڭ پوليسيا بولىمشەسىنە الىپ كەتكەن. وقيعانى ءوز كوزىمەن كورگەن ەكىنشى سوتتالۋشى ەۆگەنيي گلازكوۆ بىلاي دەدى:
"الەكساندر ەكەۋىمىز اپەللياسيالىق سوت ءادىل شەشىم شىعاراتىن شىعار دەپ ۇمىتتەنگەن ەدىك. ەكەۋىمىز دە ايىپتاۋ سيپاتىنداعى ۇكىممەن كەلىسپەيمىز، سەبەبى كىنالى ەمەسپىز. ءبىز جانار-جاعار ماي ۇرلاعان جوقپىز. وعان دالەل بار. ال ەندى ناتيجەسىندە ءبىز سوتتالىپ، جۇمىسىمىزدان جانە جەپ وتىرعان نانىمىزدان ايرىلدىق. التى ميلليون تەڭگە تۇراتىن كولىگىمدى دە كامپەسكەلەپ الدى، - دەيدى.
الەنكساندر گيت پەن ەۆگەنيي گلازكوۆ وسى جىلدىڭ ناۋرىز ايىندا "قىزمەتتىك وكىلەتىن پايدالانىپ، سەنىپ تاپسىرىلعان مۇلىكتى يەمدەنۋ" بابى بويىنشا ەكى جىلعا سوتتالىپ، مۇلىكتەرى تاركىلەنگەن.
سوتتالۋشىلاردىڭ ادۆوكاتى سوت ۇكىمىنە قايتا شاعىم تۇسىرەتىنىن ايتىپ، ايىپتالۋشىلاردىڭ ۇرلىعى دالەلدەنبەگىنىن ايتتى.
"سوت پريستاۆتارى مەن قورعاپ وتىرعان ازاماتتىڭ تاعى دا وز-وزىنە قول جۇمساماس ءۇشىن شارا قولداندى، ايتپەسە ول تاعى دا مويىن تامىرىن كەسپەك بولعان. جەدەل جاردەم كولىگى ونى الىپ كەتتى، وعان مەديسينالىق كومەك كورسەتتى. سودان سوڭ پوليسيا بولىمشەسىنە اپاردى، وندا ودان سۇراق-جاۋاپ الىندى. ماتەريالدى تىركەپ، ''وز-وزىنە قول جۇمساۋعا تىرىسۋ" فاكتىسى بويىنشا سوتقا دەيىنگى تەرگەۋ جۇرەتىن شىعار. پروسەسسۋالدىق شەشىمنىڭ قالاي بولاتىنى ازىرگە بەلگىسىز. ءبىراق ققالاي بولعاندا دا ۇكىم جانە اپەللسيالىق ينستانسيا شەشىمىمەن كەلىسپەيمىز جانە كاسساسياعا شاعىمدانامىز"، - دەدى سوتتالۋشىلار ادۆوكاتى سەرگەي گالكو.
قاراعاندى وبلىستىق سوتى وقيعاعا بايلانىستى بىلاي دەپ تۇسىنىكتەمە بەرگەن:
"اپەللياسيالىق ينستانسيانىڭ ءىستى زەرتتەۋىنە جەتكىلىكتى ۋاقىتى بولدى. القا ۇكىمدى وزگەرىسسىز قالدىردى. سوت شەشىمى وقىلعان سوڭ اپەللياسيالىق ينستانسيا شەشىمىمەن كەلىسپەگەن سوتتالۋشى گيت لەزۆيەمەن ءوزىن جاراقاتتاعان. اپەللياسيالىق ينستانسيا بويىنشا سوت اكتىسىنە شاعىمدانۋ ءتارتىبى سوتتالۋشىلارعا تۇسىندىرىلگەن ەدى. سوتتالۋشىعا ۋاقىتىندا مەديسينالىق كومەك كورسەتىلدى"، - دەدى سۋديا روزا نۇرماحانوۆا.
ۇسىنعان: ميات كاشىباي
