كەزەكتەن تىس پرەزيدەنت سايلاۋى جاريالانىپ، سايلاۋالدى ۇگىت-ناسيحات ناۋقانى باستالعالى بەرى ءار كانديدات ءوزىنىڭ ۇسىنىسىن حالىققا پاش ەتىپ، ونى ناسيحاتتاپ باعۋدا. وسى رەتتە Qamshy.kz اقپارات اگەنتتىگى قازىرگى بيلىككە قارسى شىعىپ، مەملەكەتتى باسقارۋدى دامەتىپ وتىرعان ۇمىتكەرلەردىڭ سايلاۋالدى باعدارلامالارىندا نەنى ۇمىت قالدىرعانىن اتاپ كورسەتۋگە تىرىستى.

ءامىرجان قوسانوۆ 2 ماڭىزدى سۇراقتى اتتاپ ءوتتى. ولار - قوعامدىق ساياسات جانە جاستار ساياساتى.

سادىبەك تۇگەل دە ءوز باعدارلاماسىندا ماڭىزدى قوس ماسەلەنى ۇمىت قالدىرعان. ەكولوگيا جانە ىشكى ساياسات سىندى ءىرى تاقىرىپتار ۇمىتكەر ءجۋرناليستىڭ باعدارلاماسىنا ىلىنبەي قالدى.

ال جامبىل احمەتبەك ەكولوگيا، ازاماتتار قۇقىعى جانە جاستار ساياساتى سىندى ماسەلەلى سۇراقتاردى اينالىپ ءوتىپتى.

ءۇش ماسەلەنى ۇمىت قالدىرعان ۇمىتكەرلەر قاتارىندا امانگەلدى تاسپيحوۆ تا بار. ونىڭ سايلاۋالدى باعدارلاماسىندا ەكولوگيا، جاستار ساياساتى جانە ىشكى ساياسات تۋرالى ناقتى قادامدار اتالماعان.

تولەۋتاي راحىمبەكوۆ وزگە باسەكەلەستەرىنەن اسىپ ءتۇستى. بۇل كانديدات ەكولوگيا، ازاماتتار قۇقىعى، ىشكى ساياسات جانە سىبايلاس جەمقورلىقپەن كۇرەس سىندى تاقىرىپتارمەن الىستان "سىيلاسقان".

كەلەلى ماسەلەلەردى سايلاۋالدى باعدارلاماسىنا ەنگىزۋدى ۇمىت قالدىرعاندار كوشىن دانيا ەسپايەۆا باستاپ تۇر. ول ءوز باعدارلاماسىنا ەكولوگيا، ازاماتتار قۇقىعى، ىشكى ساياسات، قوعامدىق ساياسات جانە جاستار ساياساتى تۋراسىنداعى ماسەلەلەرگە قاتىستى ەشقانداي ۇسىنىس ەنگىزبەگەن.