18 مامىردا قازاقستاندىق كاسىپقوي بوكسشى باتىر جۇكەمبايەۆ  مەكسيكالىق لۋيس حەسۋس ۆيدالەسكە قارسى جەكپە-جەكتە جەڭىسكە جەتتى، دەپ حابارلايدى Qamshy.kz اقپارات اگەنتتىگى. 

كانادانىڭ مونرەال قالاسىنداعى "Montreal Casino" ويىن-ساۋىق كەشەنىندە وتكەن بوكس كەشىندە ءبىرىنشى جارتىلاي ورتا سالماقتا (63،5 كگ) جۇدىرىقتاساتىن باتىر جۇكەمبايەۆ پەن لۋيس حەسۋس ۆيدالەستىڭ  اراسىنداعى جەكپە-جەك 10 راۋندتقا جوسپارلانعان بولاتىن. الايدا، كاسىپقوي بوكستا "777" لاقاپ اتىمەن تانىلىپ كەلە جاتقان جۇكەمبايەۆ قارسىلاسىن ءبىرىنشى راۋندتا-اق  نوكداۋنعا ءتۇسىرىپ، تەحنيكالىق نوكاۋتپەن جەڭىسكە جەتتى. 

"كوتتو" لاقاپ اتىمەن بەلگىلى مەكسيكالىق لۋيس حەسۋس ۆيدالەس 30 جاستا. ول 2011 جىلدان بەرى كاسىپقوي بوكستا ءجۇر. ءبىر كەزدەسۋدەن باسقاسىنىڭ ءبارىن مەكسيكادا وتكىزگەن. ال جۇكەمبايەۆ سوڭعى جەكپە-جەگىن ءدال وسى مونرەال قالاسىندا وتكىزىپ، مەكسيكالىق حيلبەرتو مەسانى (10-5-1، 6 كو) تورەشىلەردىڭ شەشىمىمەن جەڭگەن ەدى.

ەستەرىڭىزگە سالا كەتەيىك، بۇل - باتىر جۇكەمبايەۆتىڭ كاسىپقوي رينگتەگى 16 جەڭىسى. شۋلىق بوكسشى 13 جەكپە-جەكتە قارسىلاستارىن مەرزىمەن بۇرىن ۇتقان. ءدال ءقازىر ول كاسىپقوي بوكسشىلاردىڭ رەيتينگىن جاريالاپ وتىراتىن boxrec.com سايتىنىڭ تىزىمىندە ءوز سالماعىنداعى 1690 بوكسشىنىڭ اراسىندا 27 ورىندا كەلە جاتىر.