قىتايدىڭ ساۋدا كومپانيالارى كيىزبەن جۇمىس ىستەيتىن قازاقستاندىق قولونەر شەبەرلەرىمەن تىعىز بايلانىس ورناتپاقشى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ. 

20-26 مامىر ارالىعىندا قىتايدىڭ مادەنيەت پەن تۋريزم اپتالىعى وتەدى. وعان وسى ەلدىڭ ارتىستەرى، قولونەرشىلەرى، ۋشۋ شەبەرلەرى مەن ساۋداگەرلەرى كەلەدى.

اپتالىققا قىتايدىڭ ىسكەرلىك توپتارى دا كەلەدى. ولار قازاقستاندا جوعارى دارەجەلى تۋريستىك ايماقتاردى قۇرۋعا قاتىستى ءوز ۇسىنىستارىن جاسايدى. ال "استانا اربات" ايماعىندا قىتايلىق باتبىراۋىقتار شوۋى مەن جارمەڭكە ۇيىمداستىرىلادى. ول جەردە جىبەك، ءشاي، زەرگەرلىك بۇيىمدار، كيىم-كەشەك جانە تاعى باسقا زاتتار ساتىلادى.

قىتايدىڭ مادەنيەت جانە تۋريزم مينيسترلىگىنىڭ نۇر-سۇلتانداعى وكىلدىلىگىنىڭ باسشىسى ۆان ءشۋليننىڭ ايتۋىنشا، ءقازىر قىتايلىقتار اراسىندا كيىزدەن جاسالعان بۇيىمدارعا سۇرانىس ارتىپ كەلەدى. وسىعان بايلانىستى بۇل ەلدىڭ كاسىپكەرلەرى ساۋدا بايلانىستارىن ورناتۋعا مۇددەلى.

"سوڭعى كەزدەرى قىتايلىق كاسىپكەرلەر مەن تۋريستەرگە قازاقستاندا كيىزدەن جاسالعان تاۋارلار قاتتى ۇناپ ءجۇر. سەبەبى وسى جەردىڭ شەبەرلەرى ءبارىن ءوز قولىمەن جاسايدى. اپتالىق اياسىندا ساۋدا كومپانيالارى دا كەلەدى. ولار كيىزبەن جۇمىس جاسايتىن شەبەرلەرمەن جاقىن تانىسۋدى كوزدەيدى. ارينە، ساۋدا-ساتتىقپەن اينالىساتىن كومپانيالار الدىمەن جەرگىلىكتى نارىقتى زەرتتەيدى. ودان كەيىن قولونەر شەبەرلەرىمەن بايلانىس جاسايدى"، - دەيدى شۋلين.

ال "Kazakh Tوurism" ۇلتتىق كومپانياسى باسقارما ءتوراعاسىنىڭ ورىنباسارى تيمۋر دۇيسەنعالييەۆتىڭ سوزىنە قاراعاندا، ەۋروپانىڭ تۋريستەرى بارعان جەردىڭ تابيعاتى مەن ءسالت-داستۇرىن زەرتتەپ، جاڭا ەموسيالاردى ىزدەسە، قىتايلىق تۋريستەر زاتتاردى ساتىپ الۋدى جاقسى كورەدى.

"بۇگىندە قازاقستان ارقىلى ۇشاتىن قىتايلىق تۋريستەر ءۇشىن 72 ساعاتتىق ۆيزاسىز رەجيم بار. ءبىز وسى مۇمكىندىكتى بارىنشا پايدالانۋىمىز قاجەت. ماسەلەن، قىتايلىقتار تانىمال برەندتەردى ىزدەيدى. سول ءۇشىن دۋباي، پاريج بەن ميلاندا ايالدايدى. ونداي برەندتەر بىزدە دە ساتىلادى. مىنە، كيىزگە دە قىزىعۋشىلىق وياندى. دەمەك، قازاقستاندىق شوكولاد، بال مەن كونياكتان باسقا دا دۇنيەلەر بار"، - دەپ اتاپ كورسەتتى دۇيسەنعالييەۆ.

نۇر-سۇلتاندا وتەتىن قىتايدىڭ مادەنيەت پەن تۋريزم اپتالىعى اياسىندا 72 ساعاتتىق ۆيزاسىز رەجيممەن ءبىر توپ قىتايلىق تۋريست كەلەدى.

ۇسىنعان: ماقپال سەمباي