وتكەن اپتانىڭ سوڭىندا ءوز ءۇيىنىڭ بالكونىنان "سايلاۋعا بويكوت" دەپ ايقايلاعان "نۇر-سۇلتان" قالاسىنىڭ تۇرعىنى دارحان ومىربايەۆتى پوليسيا ۇستاپ اكەتكەن دەپ جازادى Qamshy.kz اقپارات اگەنتتىگى. 

بۇل تۋرالى 20 مامىردا ازاتتىق راديوسىنىڭ " AZAT NEWS" باعدارلاماسىندا ايتىلدى. 

وقيعا 17 مامىر كۇنى بولعان. سول كۇنى اتاۋلى الەۋمەتتىك كومەك الۋ ءۇشىن ءتورت بالاسىنىڭ قۇجاتىن وتكىزە الماي اشىنعان دارحان ومىربايەۆ ءۇيىنىڭ بالكونىنان الداعى كەلە جاتقان سايلاۋعا قاتىستى بىرنەشە ۇراندى ايقايلاپ ايتىپ، اۋلاعا كورشىلەرى جينالعاندا سايلاۋ تۋرالى پىكىرلەرىن سۇراماق بولعان. كوپ ۇزاماي، ونى پوليسيا قىزمەتكەرلەرى "قوعامدىق ءتارتىپتى بۇزدى" دەپ ۇستاپ، ەرتەسى كۇنى وعان "بيلىك وكىلىنە باعىنبادى" دەگەن ايىپ تاققان.

الايدا، دارحان ومىربايەۆتى ۇستاپ الىپ بارا جاتقانىن ۆيدەوعا تۇسىرگەن سول ماڭداعىلار قۇزىرلى ورگان وكىلدەرى وعان كۇش قولدانعانىن ايتىپ وتىر. دارحان ومىربايەۆتىڭ زايىبى دينارا ومىربايەۆا ازاتتىق تىلشىسىنە پوليسيا وكىلدەرى كۇيەۋى ەكەۋىنىڭ كوزىنە گاز بالون شاشىپ، ولارعا (كۇيەۋى ەكەۋىنە) قارسى ەلەكتروشوك قولدانعانىن ايتقان. راسىندا، كۋاگەرلەر ءتۇسىرىپ العان ۆيدەودا دا ولارعا قارسى پوليسيا كيىمىندەگى ادامداردىڭ ەلەكتروشوك قولدانىپ جۇرگەندەرى انىق بايقالادى.

ال بۇگىن وسى وقيعاعا بايلانىستى نۇر-سۇلتاندا سوت وتىرىسى باستالدى. ءبىراق دارحان ومىربايەۆ ءوزىنىڭ قورعاۋشىسىنىڭ بولماۋىنا بايلانىستى سۋديادان سوتتى كەيىنگە شەگەرۋىن سۇراعان. ال سۋديا وعان قورعاۋشى تابۋىنا تەك ءۇش ساعات قانا بەرىپ، تۇستەن كەيىن سوت وتىرىسى قايتا وتەتىنىن ايتقان. الايدا تۇستەن كەيىن دارحان ومىربايەۆ سوتقا كەلمەگەن. سوت بولسا، ونى كۇشتەپ الىپ كەلۋگە بۇيرىق بەرگەن.