رەسەي فەدەراسيا كەڭەسىنىڭ سپيكەرى ۆالەنتينا ماتۆيەنكونىڭ وتستاۆكاعا كەتۋ مۇمكىندىگى تۋرالى جازعانى ءۇشىن "كوممەرسانت" گازەتىنىڭ ەكى ءجۋرناليسىن جۇمىستان شىعارىپ جىبەردى دەپ حابارلايدى Qamshy.kz اقپارات اگەنتتىگى ينتەرفاكس سايتىنا سىلتەمە جاساپ.

وسىنى ەستىگەن ارىپتەستەرى نيەتتىلىك ءبىلدىرىپ، گازەتتەن كەتۋ تۋرالى شەشىم قابىلدادى.

“مەن "كوممەرسانت" باسپا ۇيىنەن كەتۋ تۋرالى شەشىم قابىلدادىم. اكسيونەردىڭ شەشىمى بويىنشا رەسەي فەدەراسيا كەڭەسىنىڭ سپيكەرى ۆالەنتينا ماتۆيەنكونىڭ وتستاۆكاعا كەتۋ مۇمكىندىگى تۋرالى جازعان ماكسيم يۆانوۆ مەنىمەن بىرگە باسپا ۇيىنەن كەتەدى”، - دەپ جازادى جۋرناليست يۆان سافرونوۆ ءوزىنىڭ Facebook پاراقشاسىندا.

بۇل تۋرالى ساياسات ءبولىمىنىڭ رەداكتورى ماكسيم يۆانوۆ تا جازدى.

وسىدان كەيىن باسىلىمدى تاستاپ كەتۋ تۋرالى باس رەداكتوردىڭ ورىنباسارى گلەب چەركاسوۆ حابارلادى. چەركاسوۆپەن ساياسات ءبولىمىنىڭ 11 ءجۋرناليسى كەتۋ تۋرالى نيەت ءبىلدىردى.

چەركاسوۆتىڭ ايتۋىنشا، “اكسيونەردىڭ كادرلىق شەشىمى بويىنشا كەلىسپەگەندەر جۇمىستان كەتتى”.

"كوممەرسانت" باسپا ءۇيىنىڭ باس رەداكتورى ۆلاديمير جەلونكينىڭ مالىمدەۋىنشە، ەكى ءجۋرناليستى جۇمىستان شىعارۋ سەبەبى – "كوممەرسانت" باسىلىمىنىڭ ەرەجەلەرىن بۇزدى. ءارى قاراي جەلونكين ءسوز ايتۋدان باس تارتتى. سونىمەن قاتار، باسپا ۇيىندەگى دەرەككوزدەردىڭ ايتۋىنشا،  ەكى جۋرناليستپەن “قوشتاسۋ” جانجالسىز ءوتتى. ءبىراق بىرنەشە جۋرناليست رەداكسيادان شىعۋ تۋرالى نيەت ءبىلدىردى.

17ء-ساۋىر كۇنى شىققان "سپيكەروۆ دەلات يز ەتيح ليۋدەي" اتتى ماقالا "كوممەرسانت" اكسيونەرلەرىنىڭ نارازىلىعىن تۋعىزدى. بۇل ماقالادا فەدەراسيا كەڭەسىنىڭ سپيكەرى ۆالەنتينا ماتۆيەنكونىڭ وتستاۆكاعا كەتىپ، “زەينەتاقى قورىن” باسقاراتىنى تۋرالى ايتىلعان.

اۋدارعان: يلدار اديلچەنوۆ