2019 جىلعى 15 مامىردا الماتى قىلمىستىق ىستەر بويىنشا مامانداندىرىلعان اۋدانارالىق سوتى «الييەۆ» ۇقت جەتەكشىسى قادىر الييەۆكە جانە قىلمىستىق توپقا قاتىسۋشىلار اڭسار دارتايەۆقا، دميتريي تەرەشين مەن ەرسەن جۇمابايەۆقا ۇكىم شىعاردى دەپ حابارلايدى Qamshy.kz اقپارات اگەنتتىگى ۇقك باسپا ءسوز قىزمەتىنە سىلتەمە جاساپ.

سوتتالعانداردىڭ تورتەۋى دە ق ر قك 125-بابىنىڭ 2-ب. 1)، 8) تارماقتارىمەن، 191-بابىنىڭ 4-ب. 2) تارماعىمەن، 287-بابىنىڭ 3-ب. جانە 390-بابىنىڭ 2-ب. (ادام ۇرلاۋ، توناۋ، قارۋدى، وق-دارىلەردى، جارىلعىش زاتتار مەن جارىلعىش قۇرىلعىلاردى زاڭسىز ساتىپ الۋ، بەرۋ، وتكىزۋ، ساقتاۋ، تاسىمالداۋ نەمەسە الىپ ءجۇرۋ، بيلىك وكىلىنىڭ نەمەسە جاۋاپتى مەملەكەتتىك لاۋازىم اتقاراتىن لاۋازىمدى ادامنىڭ اتاعىن وزدىگىنەن يەمدەنۋ) كوزدەلگەن قىلمىستاردى جاساعانى ءۇشىن كىنالى دەپ تانىلدى.

ۇقت جەتەكشىسى مەن وعان قاتىسۋشىلار ك. الييەۆ، ا. دارتايەۆ، د. تەرەشين مەن ە. جۇمابايەۆ 7 جىل جانە 1 ايعا باس بوستاندىعىنان ايىرۋمەن قاۋىپسىزدىگى ورتاشا تۇزەۋ مەكەمەسىندە جازاسىن وتەۋگە سوتتالدى.

بۇرىن حابارلانعانداي، 2018 جىلعى 10 قازاندا الماتىدا ق ر ۇلتتىق قاۋىپسىزدىك كوميتەتى ىشكى ىستەر مينيسترلىگىمەن بىرلەسىپ، الماتى وبلىسىنىڭ تۇرعىنى ك. الييەۆتىڭ جەتەكشىلىگىندەگى اسا ءقاۋىپتى قارۋلى ۇيىمداسقان قىلمىستىق توپ ارەكەتىن انىقتاپ، جولىن كەستى.

قىلمىستىق توپتىڭ نەگىزىن بۇرىنعى قۇقىق قورعاۋ ورگاندارىنىڭ قىزمەتكەرلەرى قۇراعان، ولار 2018 جىلعى 13 قىركۇيەكتە جامبىل وبلىسىندا وتار ستانسياسىندا كاسىپكەر ر. اگاليۋللينگە قارۋلى شابۋىل جاساپ، 107 مىڭ دوللار، 4 ميلليون رۋبل جانە 23 مىڭ ەۆرو يەمدەنگەن.

ءتىنتۋ ءىس-شارالارى بارىسىندا ۇستالعانداردان 8 پيستولەت پەن قارۋ، 140 بىرلىك ءوق-دارى، راديوستانسيالار، اۆتوموبيلدەردىڭ جالعان نومەرلىك تىركەۋ بەلگىلەرى، ماتادان جاسالعان بەتپەردەلەر، كىسەندەر مەن باسقا دا قاراقشىلىق شابۋىل جاساۋعا ارنالعان قۇرالدار تابىلىپ، الىندى.

جۇرگىزىلگەن جەدەل-تەرگەۋ ىس-شارالارىمەن ۇرلانعان اقشالاي قاراجات جابىرلەنۋشىگە قايتارىلدى.

اۋدارعان: يلدار اديلچەنوۆ