اقتوبەنىڭ №2 قالالىق سوتىنىڭ كۇن تارتىبىندە ق ر ازاماتى باۋىرجان يۋنۋسوۆتىڭ "شىعىس مۇناي جانە سەرۆيستىك قىزمەت كورسەتۋ" ج ش س بۇرىنعى باس ديرەكتورى، جۇڭگو ازاماتى چجان ءليچۋننىڭ ۇستىنەن ق ر قك 152-بابى بويىنشا "ق ر ەڭبەك زاڭدىلىعىن بۇزدى" دەگەن ايىپپەن شاعىمى پايدا بولدى دەپ جازادى Qamshy.kz اقپارات اگەنتتىگى Times.kz سايتىنا سىلتەمە جاساپ. 

ەر ادامنىڭ ايتۋىنشا، جۇڭگو ازاماتى قازاقستان رەسپۋبليكاسىنىڭ ەڭبەك زاڭدىلىعىن بۇزدى دەپ سانايدى جانە شارا قولدانۋدى سۇرايدى.

يۋنۋسوۆتىڭ ايتۋىنشا، وتكەن جىلدىڭ ماۋسىم ايىنان باستاپ ول "شىعىس مۇناي جانە سەرۆيستىك قىزمەت كورسەتۋ" مەكەمەسىنىڭ بۇرعىلاۋ بريگاداسىندا، "كوكجيدە" قۇدىعى ماڭىندا ينجەنەر-تەحنولوگ بولىپ جۇمىس جاساعان. وسى جۇمىستى اتقارۋ بارىسىندا العان ومىرتقا جاراقاتىنان اياقتارى سەمىپ قالا جازداپتى.

وتكەن جىلدىڭ 20-ماۋسىمىندا ءبىر سكۆاجينادان ەكىنشى سكۆاجيناعا بارا جاتقان تۇستا بۇرعىلاۋ بريگاداسى مىنگەن اۆتوبۋس شايقالىپ كەتىپ، باۋىرجان وقىس قيمىلدان قاتتى سوعىلىپ ارتىنشا ارقاسىنىڭ قاتتى اۋىرعانىن بايقايدى. اقتوبە قالاسىنا دەيىن تىنىشتاندىراتىن دارى-دارمەكتىڭ ارقاسىندا جەتەدى.

جاراقات بويىنشا جۇرگىزىلگەن تەكسەرۋ امالدارى ونىڭ جۇمىس بارىسىندا بولعانىن انىقتاپ بەرەدى. وسىلايشا ەر ادام ءۇشىنشى توپتاعى مۇگەدەككە اينالدى. راس، ايتا كەتۋ كەرەك، العاشقى وتانى قىتايلىق كومپانيا تولەدى. ءبىراق كەيىننەن جۇمىسشىعا "اۋىرساڭ – جۇمىستان شىق!" دەپ قۋىپ شىعىپتى. ايىنا شامامەن 200 مىڭ تەڭگە شاماسىندا تابىس تاباتىن باۋىرجان ءقازىر مۇگەدەكتىگى ءۇشىن الاتىن زەينەتاقىمەن كۇن كورۋدە. وعان 20 جاستاعى قىزى قامقورلىق كورسەتۋدە.

جۇڭگو كومپانيالارى قازاقستان سوتىن ءبىر تىڭداپ، ءبىر تىڭدامايدى...

ومىرتقاسى شويىرىلعان باۋىرجان يۋسۋپوۆ بۇرعىلاۋ بريگاداسىنىڭ ينجەنەر-تەحنولوگى قىزمەتىن قايتارۋ ءۇشىن ادۆوكات جالداپ، سوتتا ءوز قۇقىعىن قورعاپ شىعۋعا بارىن سالعان. ويتكەنى، ينجەنەر-تەحنولوگ ءوزىنىڭ باسىنان وتكەن بارلىق جاعدايعا چجان ءليچۋندى كىنالى دەپ سانايدى.

"بۇرعىلاۋ كومپانياسىنىڭ قازاقستان زاڭدارىنا باعىنبايتىنى مەنى قىنجىلتادى. مەن جۇمىستا ءجۇرىپ مۇگەدەك اتاندىم. ال ءقازىر كەز-كەلگەن ماسەلەمدى تەك سوت ارقىلى شەشەتىن جاعدايعا جەتتىم. جاراقات العاننان كەيىن مەنى سوت شەشىمىمەن جۇمىسقا الۋىن العانىمەن، ارتىنشا كوپكە ۇزاماي شىعارىپ جىبەردى"، - دەيدى باۋىرجان يۋنۋسوۆ.

ينجەنەر-تەحنولوگتىڭ ويىنشا، چجان ليچۋن قازاقستان زاڭدارىنا قۇرمەت تانىتپايدى ءارى ولارعا باعىنعىسى كەلمەيدى.

اۋدارعان: ادىلەت مادەنيەت