ارمەنيا پرەزيدەنتى ارمەن ساركيسيان ەۋرازيا مەديا فورۋمى تۋرالى جانە سەنات سپيكەرى، فورۋمدى ۇيىمداستىرۋ كوميتەتىنىڭ ءتورايىمى داريعا نازاربايەۆانىڭ تالانتى تۋرالى ايتتى دەپ جازادى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"ەۋرازيالىق كەڭىستىكتەگى جۋرناليستىك ورتاعا ۇلكەن ىقپال ەتكەن كەرەمەت ينستيتۋتتى قۇتتىقتاعىم كەلەدى. مەن ەۋرازيالىق مەديافورۋم تۋرالى ويلانعان كەزدە، ەكى نەمەسە ءۇش ۇعىم پايدا بولادى. ەۆرازيا دەگەنىمىز نە؟ ول جاي عانا گەوگرافيا ەمەس. مەنىڭ تۇسىنىگىمدە ەۋرازيا ءبىر ءسوزدىڭ شەڭبەرىنە سىيمايتىن ۇعىم. ءبىز ەۋرازيا تۋرالى ايتقاندا، قازاقستاندى ۇمىت قالدىرۋعا بولمايدى. ەۋرازيا بۇل – وركەنيەت، ۇلى جىبەك جولى، ليەۆ گۋميليەۆتىڭ فيلوسوفياسى جانە نۇرسۇلتان نازاربايەۆتىڭ ماسكەۋ مەملەكەتتىك ۋنيۆەرسيتەتىندە سويلەگەن ءسوزى"، - دەدى ارمەن ساركيسيان الماتىداعى فورۋم الدىندا. 

سونىمەن قاتار ارمەنيا باسشىسى ەۋرازيالىق مەديافورۋمدى ءبىرىنشى كەزەكتە داريعا نازاربايەۆامەن بايلانىستىرادى.

"ءبىزدىڭ تۇسىنىگىمىزدە بۇل فورۋم ول –  ءبىرىنشى كەزەكتە داريعا نۇرسۇلتان قىزى نازاربايەۆا، تۇڭعىش پرەزيدەنت نۇرسۇلتان ءابىش ۇلى باستاعان قازاقستان ۇكىمەتىنىڭ قولداۋى جانە ونىڭ ارقاسىندا وسى فورۋمنىڭ شىنىمەن دە ورىن العانى. بۇل جاققا بىرنەشە جىلدان بەرى كەلمەگەن سوڭ مەن وتە جاعىمدى اسەردەمىن. ويلاپ قاراسام، ءبىزدىڭ ومىرىمىزدە وزگەرمەيتىن نارسەلەر بار ەكەن. ول سىزبەن (رەد. داريعا نازاربايەۆامەن) بىرگە جۇمىس ىستەي باستاعان جانە سىزبەن بىرگە جۇمىس جاساپ كەلە جاتقان ادامدار. سونىمەن قاتار،  بۇل ءسىزدىڭ وزىڭىزبەن بىرگە ۇزاق جىلدار بويى بىرگە جۇمىس جاساي الاتىن ادامداردى تاڭداۋداعى تالانتىڭىز. سىزگە ۇلكەن العىس ايتقىم كەلەدى"، - دەدى ارمەنيا پرەزيدەنتى داريعا نازاربايەۆاعا ايتقان لەبىزىندە.

ايتا كەتەيىك، XVI ەۋرازيالىق مەديافورۋم الماتىدا 22-24 مامىر كۇندەرى وتەدى. 

ۇسىنعان: ميات كاشىباي