الەۋمەتتىك جەلىدە جۇلدىزاي فورتقا قازاق تىلىندە قىزمەت كورسەتۋدى تالاپ ەتكەنى ءۇشىن جالا جابىلعانى تۋرالى اقپارات قىزۋ تالقىلانۋدا دەپ جازادى Qamshy.kz اقپارات اگەنتتىگى. رۋزا بەيسەنبايتەگىنىڭ ايتۋىنشا، جۇلدىزاي فورت كارىس ازاماتىنان قازاق تىلىندە قىزمەت كورسەتۋدى تالاپ ەتكەن. الايدا كارىس ازاماتى جۇلدىزاي فورتتى "ۇلتارازدىق تۋدىردىڭ" دەپ ايىپتاپ، بالاعاتتاعان. اتالمىش جايتقا بايلانىستى سوت وتىرىسى ءوتىپ جاتىر.
كەشە رۋزا بەيسەنبايتەگى وسكەمەن قالاسىنىڭ پروكۋرورىنا ارىزدانعىسى كەلگەن. الايدا پروكۋرورعا دا، ونىڭ ورىنباسارىنا دا حابارلاسا الماعان. ال قابىلداۋ بولىمىندەگىلەر "ارىزدى ءوزىڭىز كەلىپ جازاسىز" دەپ ايتىپتى. رۋزا بەيسەنبايتەگى "مەن جامباسىم سىنىپ، توسەك تارتىپ جاتقان اداممىن. وسكەمەن قالاسىنا بارا المايمىن" دەپ جاعدايىن تۇسىندىرگەن كەزدە قابىلداۋ بولىمىندەگىلەر "جازىلعاننان كەيىن كەلىپ ارىز جازىڭىز" دەپ جاۋاپ بەرىپتى. ءبىراز ۋاقىتتان كەيىن رۋزا بەيسەنبايتەگى ق ر باس پروكۋراتۋراسىنا حابارلاسقانىمەن، ولار تۇتقانى كوتەرمەپتى. قوعام بەلسەندىسى ق ر باس پروكۋراتۋراسىنىڭ قىزمەتكەرلەرى قازاق تىلىندە قىزمەت كورسەتكىسى كەلمەيتىنىن ايتىپ، ايىپتاپ وتىر. Qamshy.kz اقپارات اگەنتتىگى ءتىل جاناشىرىنىڭ ق ر باس پروكۋراتۋراسىنا جازعان حاتىن ەشقانداي الىپ-قوسپاسىز وقىرمان نازارىنا ۇسىنۋدى ءجون كوردى.
ق ر باس پروكۋرورى عيزات داۋرەنبەك ۇلى نۇرداۋلەتوۆكە اشىق حات
23.05.19 جىلى جەكە بلوگىڭىزعا شاعىم قويماقشى بولعانمەن، ول قيىن ەكەن. 115 قىزمەتى كومەك كورسەتە الماعاندىقتان، باسشىسى ا.ۆ.دۋككارتپەن سويلەسكەنىمدە، اڭگىمەنىڭ سيقى 3 رەت "سالەمەتسىز بە"، 3 رەت «زدراستي» بولدى! مەن وعان "ق ر باس پروكۋراتۋراسىنىڭ لاۋازىمدى قىزمەتىندە وتىرا، قالايشا، مەملەكەتتىك تىلدە امانداسقىڭىز دا كەلمەيدى؟" دەدىم. جاۋابى: «يا ۆاس پروشۋ گوۆوريت پو رۋسسكيي، ەتو يازىك مەجناسيونالنوگو وبششەنيا»؟! وسىعان وراي:
نەلىكتەن باس زاڭ، قۇقىق قاداعالاۋ ورگانىندا، ساۋاتسىز (ق ر زاڭنامالىق نورمالارىنىڭ ەشقايسىسىندا ورىس ءتىلىنىڭ ۇلتارالىق دەگەن ستاتۋسى جوق) جانە ەڭ باستىسى زاڭدى بەلشەسىنەن باساتىن ادام وتىر جانە جوعارى لاۋىزىمدى قىزمەتتە؟!پروكۋراتۋرا قىزمەتكەرلەرى: «ونىڭ ۇلتى قازاق ەمەس»). جوق الدە، كونستيتۋسيا، زاڭنامالىق نورمالاردا قازاق ەمەستەرگە باسقا باپتار جازىلعان با؟
باس پروكۋراتۋرانىڭ «تۆيتتەردەگى» پاراقشاسىنا دا جازباق بولدىم. «گپ رك» دەپ تۇر. ال مەملەكەتتىك تىلدە جوق. ايتىڭىز، قازاق تىلىندە نەگە جوق؟ نەگە؟
پروكۋراتۋرانىڭ فەيسبۋكتەگى پاراقشاسىنا ءبىر اي بۇرىن «قانداي ماسقارا، ق ر باس پروكۋراتۋراسى بولا تۇرا، جازعاندارىڭىز ءبىرىنشى ورىس، ەكىنشىسى قازاق تىلىندە» دەپ جازعانمىن. تۇزەگەن ارەكەت تانىتقان، بۇگىن تاعى بىرنەشە جەردە ءبىرىنشى بولىپ ورىسشا تۇر؟!
كەرەكۋدەگى پروكۋراتۋراعا حابارلاسساق، ءبارى ورىسشا سويلەيدى. «پروكۋراتۋرا وبل.، .... سلۋشاەت». قىزمەتتى تەك ورىس تىلىندە جۇرگىزەدى. سەرۆيستىك مەكەمەلەردەن مەملەكەتتىك تىلدە بىلمەي قىزمەتىنەن قۋىلعان جاعدايلار جوق ەمەس.
جوعارى جازىلعاندارىما بايلانىستى سۇراق: سىزدەر قاي ەلدىڭ باس پروكۋراتۋراسىسىزدار؟
ەگەر كورشى مەملەكەتتىڭ قول استىندا بولماساڭىزدار، ءوز قىزمەتتەرىڭىزدى سايت، سوت، كابينەتتەرىڭىزدەگى، قوعامداعى، ءبىر سوزبەن وسى مەملەكەتتەگى، مەملەكەت زاڭدارىنا سايكەس اتقارۋلارىڭىزدى تالاپ ەتەمىن! 30 جىل قازاقستان رەسپۋبليكاسى بولا تۇرا، مەملەكەت ءتىلى قازاق ءتىلى بولا تۇرا، تىم بولماسا 300 ءسوز جاتتاپ الۋعا بولاتىن ەدى عوي. سوندىقتان ءوزىڭدى ورىسشاعا ماجبۇرلەيتىن باس پروكۋراتۋرا قىزمەتكەرلەرىنىڭ، ءوز لاۋازىمىن يەلەنۋگە ەش مورالدىق تا، زاڭدىق تا قۇقى جوق!
وسىنى كورە تۇرىپ، نەگە ماسەلەدەن بەيحابار بولاتىندارىڭىز تۇسىنىكسىز. سوندىقتان دا مەن مەملەكەتتىڭ ءتىلىن قورعاۋعا ءماجبۇرمى باس پروكۋراتۋرا زاڭدى ساقتاي ما، تاپتاي ما؟ مۇنداي ورەسكەلدىك قاي ەلدە بار؟ كەرىسىنشە، ءار مەملەكەتتە، ءوزىنىڭ ءتىلىن مەمورگان قورعايدى. ال بىزدە بىزدە ماسقارا، ءوز-وزىنىڭ ءتىلىن قورلاپ، قورلاتقىزىپ وتىرعان مەمورگان قىزمەتكەرلەرى قايتا سوتقا سۇيرەلەۋگە سەپتىگىن تيگىزىپ وتىر! ءداپ ءقازىر، رەسپۋبليكاعا تانىمال، بەلگىلى ءتىل جاناشىرى جۇلدىزاي فورت سوتقا تارتىلىپ وتىر. سايىپ كەلگەندە، قازاق تىلىندە قىزمەت تۇتىنعىسى كەلگەنى ءۇشىن، قارسى جاقتىڭ جالاسىمەن، پوليسيا قىزمەتكەرلەرىنىڭ قولداۋىمەن! وسى مەملەكەتتىڭ پروكۋراتۋراسى بولساڭىزدار، وسى مەملەكتتىڭ زاڭىن، ونىمەن قورعالعان مەملەكەت ءتىلىنىڭ قورعالۋىن قاداعالاۋىڭىزدى تالاپ ەتەمىن، ق ر باس پروكۋرورى گيزات ءىنىم!
قازاقستاننىڭ باس پروكۋرورى عيزات داۋرەنبەك ۇلى!
جەكە بلوگىعىزعا شاعىمىمدى ورنالاستىرا الماي، دۋككارتىڭىز شەكتەن شىعارلىق سوزدەر ايتقاندىقتان، سىزگە امال جوق، اشىق حات جازۋعا ءماجبۇل بولدىم! بلوگىڭىز ارقىلى دا، سايتىڭىز ارقىلى دا جاۋاپتى بەرەتىن ءوزىڭىز ەمەس ەكەنىن بىلەمىن. ءبىراق قازاقستاننىڭ باس پروكۋرورى رەتىندە قازاق ءتىلدى سايتتاردى وقيسىز دەپ سەنەمىن جانە سىزدەن جاۋاپ كۇتەمىن!
قۇرمەتپەن، رۋزا بەيسەنبايتەگى،
كەرەكۋ قالاسى
