سەنات ءتوراعاسى داريعا نازاربايەۆا جۇمىس ساپارىمەن قازاق تاعامتانۋ اكادەمياسىنا جانە بالالارعا ارنالعان ءسۇت ونىمدەرىن ءوندىرۋشى "اميران" زاۋىتىنا باردى دەپ حابارلايدى Qamshy.kz اقپارات اگەنتتىگى tengrinews.kz سايتىنىڭ مالىمەتىن نەگىزگە الا وتىرىپ. 

"ءبىز سەناتتا بارلىق قۇجاتتارعا، زەرتتەۋلەر مەن ستاستيكالىق مالىمەتتەرگە سۇيەنە وتىرىپ ۇلكەن ساراپتاما جاسادىق. ساراپتاما ناتيجەسىنەن تۇسىنگەنىمىز، قازىرگى وتاندىق نارىقتا بالالار تاعامىن ءوندىرۋ سالاسىنا دۇرىس نازار اۋدارىلمايدى. ەلىمىزدەگى بالالار تاعامدارىنىڭ شامامەن 90 پايىزعا جۋىعى شەتەلدەن تاسىمالدانادى. ول ءونىمنىڭ جارامدىلىق مەرزىمىنە، قانداي قوسپالار قوسىلعانىنا ەشكىم جاۋاپ بەرمەيدى. ونداي تاۋارلار شالعاي جەرلەردەن اكەلىنەتىندىكتەن ساقتاۋ مەرزىمى دە تىم ۇلكەن، كەيبىرى جىلداپ ساقتالا بەرەدى، شىنىمدى ايتسام، ءبىز بالالارىمىزعا نە بەرىپ جاتقانىمىزدى ويلاۋدىڭ ءوزى قورقىنىشتى"، - دەدى داريعا نازاربايەۆا.

سەنات ءتوراعاسى قازاق تاعامتانۋ اكادەمياسىنىڭ ۇجىمىمەن كەزدەسىپ، تاعامنىڭ ساپاسى مەن قاۋىپسىزدىگىن تەكسەرەتىن زەرتحانالاردىڭ جۇمىسىمەن تانىستى.

"ءبىرىنشى كەزەكتە، ورگانيكالىق تازا ونىمدەر كىشكەنتاي بالالارى بار وتباسىلارعا قولجەتىمدى بولۋى كەرەك. بىزدە بيە سۇتىنەن جاسالاتىن بالالارعا ارنالعان ازىق-تۇلىك ونىمدەرى بار. قانتسىز. مۇنداي ونىمدەردى تۇتىنۋ – الەمدەگى كەز كەلگەن ديەتولوگتىڭ ارمانى"، - دەدى داريعا نۇرسۇلتان قىزى.

اۋدارعان: داۋرەن سىبانباي