ادام اعزاسى، مۇشەلەرى ءومىر سۇرۋگە لايىقتالىپ جاراتىلعان. قۇدايدىڭ قۇدىرەتىنە شەك جوق دەرسىز، نەگىزى، ادامدا ارتىق اعزا جوق. ءبىراق ءتۇرلى اۋرۋلار مەن قاتەرلى ىسىكتەرگە شالدىققاندا كەيبىر اعزالاردى تۇگەل الىپ تاستاپ، قالىپتى ءومىر سۇرە بەرۋگە بولادى. سونىمەن، قانداي اعزالاردىڭ قاجەتتىلىگى تومەن؟

مەديسينا عالىمدارى ادامعا اقىل تىستەرى مەن سوقىر ىشەكتىڭ قاجەتتىلىگى تۋرالى ءالى داۋلاسىپ كەلە جاتىر. ءبىرىنشىسى، جانعا باتىپ بارا جاتسا، جەڭىلدەۋ «قۇتىلاتىن» دۇنيە. ال سوقىر ىشەكتىڭ تولىپ قالۋى ناتيجەسىندە ادام پىشاققا تۇسۋگە ءماجبۇر بولادى. ادامداردىڭ باسىم بولىگىنىڭ سوقىر ىشەكتى 20-25 جاسىنا دەيىن الدىرىپ تاستايتىنىن العا تارتقان عالىمدار بۇل اعزانى مۇلدە قاجەتسىز دەپ سانايدى. ال قارسى توپ اعزا تولىق قالىپتاسقانشا اس قورىتۋ جۇيەلەرىنىڭ ارتىق زاتتارمەن بۇلىنبەسى ءۇشىن سوقىر ىشەكتى قاجەت دەپ ەسەپتەيدى.

ادام قاي جاسىندا سوقىر ىشەكتەن ارىلسا دا، بۇل مۇشەسىز ءومر سۇرە بەرەدى. سونداي-اق، سوقىر ىشەكتىڭ جوقتىعى ادامعا ەشقانداي قولايسىزدىق پەن اۋىرسىنۋ تۋعىزبايدى.

سوقىر ىشەكتەن وزگە ىشكى اعزالاردىڭ بارلىعى ادام بالاسىنا قاجەت. دەگەنمەن، ولاردىڭ بەلگىلى ءبىر بولىگىمەن دە ءبىرقالىپتى ءومىر سۇرۋگە ابدەن بولادى.

مىسالى، ادام بالاسى ءبىر بۇيرەكپەن ءومىر سۇرە الادى. ءبىر بۇيرەكپەن الاڭدا دوپ تەۋىپ جۇرگەن فۋتبولشىلار دا بار. سونىمەن قاتار، وكپەنىڭ ءبىر جاعىمەن، اسقازاننىڭ جارتىسىمەن، باۋىردىڭ جارتى بولىگىمەن امالداپ كۇن كورۋگە بولادى. سونىمەن قاتار، كوپشىلىك ءوت جولى اقاۋىنا ۇشىرايدى. وسى رەتتە ادام اعزاسى ءوتسىز دە ءومىر سۇرە الاتىنىن ايتا كەتكەن ءجون.

"ادام اعزاسىنىڭ 25 پايىزىن الىپ تاستاعان كۇندە دە ءتىرى جۇرۋگە بولادى"، - دەپ ءتامسىل ايتادى عالىمدار توبى. ءبىراق اتالعان مۇشەلەردى الىپ تاستاۋعا دۋشار بولعان جاندار قاتاڭ ديەتا مەن ءتۇرلى دارى-دارمەكتەردى ۋاقىتىلى قابىلداپ ءجۇرۋى ءتيىس.

قالاي دەسەك تە، ادامدار اعزاسىن الىپ تاستاۋدى دارىگەرلەر ونىڭ ءومىرىن ساقتاپ قالۋدىڭ ەڭ سوڭعى جولى رەتىندە كورەدى.

«ادام اعزاسىنىڭ اقاۋلارى» دەگەن كىتابىندا چيپ روۋ "كولىك ءۇش دوڭگەلەكپەن تە جۇرە الادى، ءبىراق بۇل ءتورت دوڭگەلەكتىڭ ورنىن الماستىرا المايدى" دەپ جازادى.

اعزالارىڭىزعا اقاۋ تۇسپەسىن!