رەسەي قورعانىس كۇشتەرى باس شىركەۋىنىڭ قۇرىلىسىنا نۇر-سۇلتان بەرگەن 1 ميلليون رۋبل (5،9 ملن تەڭگە نەمەسە 15 504 دوللار) قازاقستان بيۋدجەتىنەن الىنباعان. بۇل تۋرالى قازاقستان قورعانىس ءمينيسترىنىڭ ورىنباسارى گەنەرال-مايور تيمۋر داندىبايەۆ ازاتتىق راديوسىنا بەرگەن رەسمي جاۋابىندا حابارلادى، دەپ جازادى Qamshy.kz اقپارات اگەنتتىگى. 

ەستەرىڭىزدە بولسا،14 مامىردا قازاقستان قورعانىس ءمينيسترىنىڭ ورىنباسارى گەنەرال-لەيتەنانت ءمۇسلىم التىنبايەۆ "قازاقستاننىڭ قورعانىس ۆەدومستۆوسى رەسەيدەگى باس اسكەري شىركەۋ قۇرىلىسىنا بەلگىلى ءبىر سومادا قارجى اۋداردى" دەگەن. ول "قازاقستان اتىنان ەكىنشى دۇنيەجۇزىلىك سوعىسقا قاتىسقانداردىڭ ەسىمدەرى رەسەيدەگى باس اسكەري شىركەۋدە ساقتالاتىنىن" ايتقان. التىنبايەۆ شىركەۋ قۇرىلىسىنا نۇر-سۇلتاننىڭ قانشا قارجى اۋدارعانىن ايتپاعان.

قورعانىس مينيسترلىگىنىڭ ازاتتىق راديوسىنا ايتۋىنشا، رەسەيدەگى شىركەۋ قۇرىلىسىنا جىبەرىلگەن 1 ميلليون رۋبل دەمەۋشىلەردەن الىنعان. "دەمەۋشىلەر اتتارىن اتاماۋدى ءوتىندى. سەبەبى بۇل كومەك جارناما جاساۋ ءۇشىن ەمەس، باتىرلارعا ماڭگى ەسكەرتكىش ورناتۋ ءۇشىن كورسەتىلگەن" دەپ جازادى ۆەدومستۆو وكىلى.

مينيسترلىك جاۋابىندا قازاقستاننىڭ قورعانىس مينيسترلىگى ەكىنشى دۇنيەجۇزىلىك سوعىسقا قاتىسقان قازاقستاندىق ارداگەرلەرگە "تاعزىم ەتۋ ماقساتىندا ارحيۆ ماتەريالدارىن جيناپ جاتقانىن" ايتقان.

"وسىعان بايلانىستى قازاقستان رەسەي قورعانىس مينيسترلىگىنە ارداگەرلەردىڭ سۋرەتتەرىن، قىسقاشا بيوگرافيالىق مالىمەتتەرىن، سوعىستا قازا تاپقان ارداگەرلەردىڭ ەرلىكتەرى تۋرالى دەرەكتەردى جولدادى. بۇل ماتەريالدار "ەسكە الۋ جولى" گالەرەياسىن قۇرۋ كەزىندە پايدالانىلادى"، - دەيدى ۆەدومستۆو.

ۇسىنعان: ميات كاشىباي