قازاقستان پرەزيدەنتىنە ۇمىتكەرلەردىڭ پىكىرتالاسى 29 مامىر كۇنى ساعات 18.00-دە "حابار" تەلەارناسىنىڭ تىكەلەي ەفيرىندە وتەدى دەپ حابارلايدى Qamshy.kz اقپارات اگەنتتىگى.
2019 جىلدىڭ 9 ماۋسىمىندا وتەتىن قازاقستان پرەزيدەنتىنىڭ كەزەكتەن تىس سايلاۋىنا جەتى ۇمىتكەر وزدەرىن ۇسىنعان بولاتىن:
- قازاقستاننىڭ كوممۋنيستىك حالىقتىق پارتياسىنان جامبىل احمەتبەكوۆ؛
- "اق جول" دەموكراتيالىق پارتياسىنان دانيا ەسپايەۆا؛
- "ۇلت تاعدىرى" قوزعالىسىنىڭ ۇمىتكەرى ءامىرجان قوسانوۆ؛
- "اۋىل" پارتياسىنىڭ وكىلى تولەۋتاي راحىمبەكوۆ؛
- كاسىپوداقتار فەدەراسياسىنىڭ وكىلى امانگەلدى تاسپيحوۆ؛
- Nur Otan پارتياسىنان قاسىم-جومارت توقايەۆ؛
- "ۇلى دالا قىراندارى" قوعامدىق بىرلەستىگىنەن سادىبەك تۇگەل.
"حابار" تەلەارناسىنىڭ تىكەلەي ەفيردە كورسەتەتىن پىكىرتالاس "قازمەديا ورتالىعى" مەدياكەشەنىندە وتەدى. تەلەجۇرگىزۋشىلەر ەرلان يگىسىنوۆ پەن قىمبات دوسجان جۇرگىزەتىن تەلەدەبات ءۇش كەزەڭگە بولىنەدى:
ءبىرىنشى كەزەڭنىڭ تاقىرىبى – "قازاقستاننىڭ ەكونوميكالىق دامۋىنىڭ باسىمدىقتارى". ول ەكى اينالىمدى قامتيدى، دەپ جازىلعان تەلەارنانىڭ حابارلاماسىندا.
ءبىرىنشى اينالىمدا ءاربىر كانديدات ءوزىنىڭ سايلاۋالدى باعدارلاماسىن تانىستىرۋى كەرەك. ەكىنشى اينالىمدا قاتىسۋشىلار قارسىلاستارىنا ەكى سۇراقتان قويا الادى، سونداي-اق ەكى سۇراققا جاۋاپ بەرەدى.
ەكىنشى كەزەڭنىڭ تاقىرىبى – "قازاقستاننىڭ الەۋمەتتىك جاڭعىرتىلۋى". ءبىرىنشى اينالىمدا پرەزيدەنتتىككە كانديداتتار تاقىرىپ بويىنشا ءسوز سويلەيدى، ال ەكىنشى اينالىمدا جۇرگىزۋشىنىڭ ءبىر سۇراعىنا جاۋاپ بەرەدى.
ءۇشىنشى كەزەڭنىڭ تاقىرىبى – "سايلاۋشىلارعا ءسوز". پرەزيدەنتتىككە ۇمىتكەرلەر قازاقستان حالقىنا ۇندەۋ جاسايدى.
ۇسىنعان: ماقپال سەمباي
