30 مامىر مەن 2 ماۋسىم كۇندەرى ەلوردا تورىندە ۇلتتىق سپورتتى، ءسالت-داستۇردى ۇلىقتاۋعا ارنالعان تۇڭعىش «Nur-Sultan Ethno Fest» مەرەكەسى وتەدى. نۇر-سۇلتان قالاسى اكىمدىگى مەن ق ر ۇلتتىق سپورت قاۋىمداستىعى بىرلەسىپ ۇيىمداستىراتىن بۇل ەتنو-فەستيۆالدە ەلوردالىقتار مەن قالا قوناقتارى تاماشالايتىن مەرەكەلىك شارالار بىرنەشە كۇنگە جالعاسادى.
اتاپ ايتار بولساق، «Nur-Sultan Ethno Fest» مەرەكەسىنە ارنالىپ «حان-شاتىر» كەشەنىنىڭ ماڭىندا اۋقىمدى ەتنو-قالاشىق بوي كوتەرەدى. بۇل ەتنو-قالاشىقتا ۇلتتىق قولونەر بۇيىمدارىنىڭ ساۋدا ورنى مەن بىرنەشە كورمەلەر، بالالار مەن ەرەسەكتەرگە ارنالعان ۇلتتىق ويىندار وتەتىن سپورتتىق الاڭدار، ءتۇرلى ءۇي جانۋارلارى مەن سپورتتىق اتتاردى قىزىقتايتىن ورىندار، ۇلتتىق جيھازدارمەن جابدىقتالعان كيىز ۇيلەر ورنالاسپاق. بالالارعا ارنالعان تۇڭعىش ەتنو-اتتراكسيون اشىلادى. سونداي-اق، «Nur-Sultan Ethno Fest» مەرەكەسى اياسىندا سول ەتنو-قالاشىق اۋماعىندا جامبى اتۋدان «التىن جەبە» ءى الەم چەمپيوناتى وتەدى. تۇڭعىش ۇيىمداستىرىلعان بۇل الەم چەمپيوناتىنا جيىرماعا جۋىق مەملەكەتتىڭ ايتۋلى مەرگەندەرى قاتىسپاقشى.
بۇل تۋرالى مەرەكەنى ۇيىمداستىرۋشىلاردىڭ ءبىرى، ق ر ۇلتتىق سپورت قاۋىمداستىعىنىڭ اتقارۋشى ديرەكتورى راحات جاقسىباي: «نۇر-سۇلتان قالاسىندا وتەتىن بىرنەشە تۇڭعىش شارانىڭ باسىن قوسقان بۇل «Nur-Sultan Ethno Fest» مەرەكەسىندە قاتىسۋشىلارعا ەستەن كەتپەس قىزىقتار از بولمايدى. ءبىر عانا، «التىن جەبە» ءى الەم چەمپيوناتىنىڭ ءوزى قالىڭ جۇرتشىلىقتى وزىنە ەرىكسىز تارتادى دەپ ويلايمىن. بۇعان دەيىن جامبى اتۋدان «التىن جەبە» باسەكەسى ەلوردا تورىندە ەكى مارتە حالىقارالىق تۋرنير رەتىندە وتكىزىلگەن ەدى. وعان ۆەنگريا، وڭتۇستىك كورەيا، فينليانديا، مالايزيا، تۇركيا، مونعوليا، رەسەي، رۋمىنيا، پولشا سياقتى ەلدەردىڭ ايگىلى مەرگەندەرى قاتىسقان بولاتىن. «التىن جەبە» ءتۋرنيرىنىڭ باس جۇلدەسى ەكى جىل قاتارىنان رۋمىنيالىق سۇرمەرگەن ميحاي كوزمەيگە بۇيىردى. ال، ءتۋرنيردىڭ كۇمىس، قولا جۇلدەلەرىن ءبىزدىڭ ايتبەك سارىباي، ەرالحان ايكوز، ابزال تۋلىبەكوۆ سىندى جاس مەرگەندەرىمىز يەلەندى.
ەندى مىنە، سول «التىن جەبە» ءتۋرنيرى تۇڭعىش رەت الەم چەمپيوناتى دەڭگەيىنە كوتەرىلدى. ق ر مادەنيەت مينيسترلىگىنىڭ جىلدىق كۇنتىزبەلىك جوسپارىنا سايكەس وتكىزىلەتىن بۇل الەمدىك مەرگەندەر سايىسىنا وڭتۇستىك افريكا، وڭتۇستىك كورەيا، رەسەي، رۋمىنيا، تۇركيا، ۆەنگريا جانە بىرنەشە ازيا مەملەكەتتەرىنىڭ اتاقتى مەرگەندەرى ب ا ق سىنايدى. جارىسقا شەت ەلدەردەن ەكى سپورتشى، ۇيىمداستىرۋشى رەتىندە ءبىزدىڭ ەلدەن بەس سپورتشى قاتىسادى. وسى جولى تۇڭعىش الەم چەمپيوناتىنىڭ باس جۇلدەسىن قازاق مەرگەندەرى يەلەنەدى دەگەن ءۇمىتىمىز مول.
ەڭ قىزىعى، ۇمىتىلعان ۇلتتىق داستۇرلەر دە وسى «Nur-Sultan Ethno Fest» مەرەكەسىندە ءبىر جاڭعىرماق. حالىق جادىنان شىعا باستاعان قامشىگەرلىك، تەزگە سالۋ، قولقا سالۋ، تىعىرىققا تىرەۋ، ارقان ءورۋ، قامشى ءورۋ، شاڭىراق كوتەرۋ سەكىلدى ۇلتتىق سالت-داستۇرلەرى جۇرتشىلىق نازارىنا ۇسىنىلىپ، ولاردىڭ شىعۋ تاريحى مەن ءمان-ماعىنالارى باياندالادى. «قولقا سالۋ»، «تەزگە سالۋ»، «مايموڭكەلەۋ»، «تىعىرىققا تىرەۋ» تىركەستەرى قايدان شىققان؟ «Nur-Sultan Ethno Fest» مەرەكەسىن تاماشالاۋشىلارعا ەتنوگراف-عالىم وسى سوزدەردىڭ ماعىنالارىن ىس-جۇزىندە كورسەتەتىن بولادى.
سوندىقتان، اسىرەسە ۇلتتىق ءسالت-داستۇرىمىزدىڭ وسىلايشا سالتانات قۇرعانىن تاماشالاعىسى كەلگەن وتانداستارىمىزعا دەمالىس ۋاقىتتارىن اتالعان مەرزىمدە «حان-شاتىر» ماڭىندا وتكىزۋگە كەڭەس بەرەمىن» دەپ، ءبىزدىڭ قويعان ساۋالعا وراي ەتنو-فەستۆال تۋرالى كەڭىرەك توقتالىپ ءوتتى.
سونىمەن بىرگە، «Nur-Sultan Ethno Fest» مەرەكەسىندە ەرەسەكتەر اراسىندا اۋدارىسپاق، ساداق اتۋ، ارقان تارتۋ، اسىق اتۋ، سەركە كوتەرۋ، نايزا لاقتىرۋ سياقتى كوپتەگەن ۇلتتىق ويىندار كۇن سايىن وتكىزىلىپ تۇرماق. ويىنعا قاتىسۋشىلاردىڭ جەڭىمپازدارىنا ماراپاتتاۋ مەن جۇلدەلى سىيلىقتار تابىس ەتىلەدى. ۇلتتىق ءسالت-داستۇر مەن كىتاپ كورمەلەرى تاماشالانادى. اقىندار ايتىسى مەن كۇي سايىسى ۇيىمداستىرىلادى. ەتنو-قالاشىقتا توسەلگەن بوز كىلەمدە اتاقتى بالۋاندار شەبەرلىك ساباقتارىن جۇرگىزىپ، بالالار مەن ەرەسەكتەر اراسىندا قازاقشا كۇرەس جارىستارىن ۇيىمداستىرادى. ىرگەلەس الاڭدا ءداستۇرلى ساداقان رەسپۋبليكالىق اشىق تۋرنير وتەدى. سونداي-اق، اتا-انالار دا بالالارىمەن بىرگە اۋدارىسپاق، اسىق اتۋ، لاڭگى تەبۋ، قاپپەن سەكىرۋ سەكىلدى جارىستارعا قاتىسۋ مۇمكىندىگى بار. ەتنو-اتتراكسيوندا بۇلدىرشىندەر ءۇشىن ءۇش مەترلىك تاياقتارمەن جۇرەتىن الىپ ادامداردىڭ جارىسى قىزىقتى قويىلىمدار، التىباقاندا تەربەلۋ، پوني اتتارعا ءمىنىپ سەرۋەندەۋ سياقتى كوپتەگەن قىزمەتتەر تەگىن كورسەتىلەدى.
